Sukta 40

40.1

8 kanvo ghaurah, brahmanaspatih, pragathah – vishama brihatyah, samah satobrihatyah

उत्ति॑ष्ठ ब्रह्मणस्पते देव॒यन्त॑स्त्वेमहे ।
उप॒ प्र य॑न्तु म॒रुत॑ः सु॒दान॑व॒ इन्द्र॑ प्रा॒शूर्भ॑वा॒ सचा॑ ॥१॥

Uttishtha brahmanaspate devayantastvemahe
Upa pra yantu marutah sudanava indra prashurbhava sacha

त्वामिद्धि स॑हसस्पुत्र॒ मर्त्य॑ उपब्रू॒ते धने॑ हि॒ते ।
सु॒वीर्यं॑ मरुत॒ आ स्वश्व्यं॒ दधी॑त॒ यो व॑ आच॒के ॥२॥

Tvamiddhi sahasasputra martya upabrute dhane hite
Suviryam maruta a svashvyam dadhita yo va achake

प्रैतु॒ ब्रह्म॑ण॒स्पति॒ः प्र दे॒व्ये॑तु सू॒नृता॑ ।
अच्छा॑ वी॒रं नर्यं॑ प॒ङ्क्तिरा॑धसं दे॒वा य॒ज्ञं न॑यन्तु नः ॥३॥

Praitu brahmanaspatih pra devyetu sunrita
Achchha viram naryam panktiradhasam deva yagyam nayantu nah

यो वा॒घते॒ ददा॑ति सू॒नरं॒ वसु॒ स ध॑त्ते॒ अक्षि॑ति॒ श्रव॑ः ।
तस्मा॒ इळां॑ सु॒वीरा॒मा य॑जामहे सु॒प्रतू॑र्तिमने॒हस॑म् ॥४॥

Yo vaghate dadati sunaram vasu sa dhatte akshiti shravah
Tasma ilam suvirama yajamahe supraturtimanehasam

प्र नू॒नं ब्रह्म॑ण॒स्पति॒र्मन्त्रं॑ वदत्यु॒क्थ्य॑म् ।
यस्मि॒न्निन्द्रो॒ वरु॑णो मि॒त्रो अ॑र्य॒मा दे॒वा ओकां॑सि चक्रि॒रे ॥५॥

Pra nunam brahmanaspatirmantram vadatyukthyam
Yasminnindro varuno mitro aryama deva okansi chakrire

तमिद् वो॑चेमा वि॒दथे॑षु श॒म्भुवं॒ मन्त्रं॑ देवा अने॒हस॑म् ।
इ॒मां च॒ वाचं॑ प्रति॒हर्य॑था नरो॒ विश्वेद् वा॒मा वो॑ अश्नवत् ॥६॥

Tamid vochema vidatheshu shambhuvam mantram deva anehasam
Imam cha vacham pratiharyatha naro vishved vama vo ashnavat

को दे॑व॒यन्त॑मश्नव॒ज् जनं॒ को वृ॒क्तब॑र्हिषम् ।
प्रप्र॑ दा॒श्वान् प॒स्त्या॑भिरस्थितान्त॒र्वाव॒त् क्षयं॑ दधे ॥७॥

Ko devayantamashnavaj janam ko vriktabarhisham
Prapra dashvan pastyabhirasthitantarvavat kshayam dadhe

उप॑ क्ष॒त्रं पृ॑ञ्ची॒त हन्ति॒ राज॑भिर्भ॒ये चि॑त् सुक्षि॒तिं द॑धे ।
नास्य॑ व॒र्ता न त॑रु॒ता म॑हाध॒ने नार्भे॑ अस्ति व॒ज्रिण॑ः ॥८॥

Upa kshatram princhita hanti rajabhirbhaye chit sukshitim dadhe
Nasya varta na taruta mahadhane narbhe asti vajrinah