Sukta 158

158.1

6 dirghatama auchathyah, ashvinau, trishtup, 6 anushtup

वसू॑ रु॒द्रा पु॑रु॒मन्तू॑ वृ॒धन्ता॑ दश॒स्यतं॑ नो वृषणाव॒भिष्टौ॑ ।
दस्रा॑ ह॒ यद् रेक्ण॑ औच॒थ्यो वां॒ प्र यत् स॒स्राथे॒ अक॑वाभिरू॒ती ॥१॥

Vasu rudra purumantu vridhanta dashasyatam no vrishanavabhishtau
Dasra ha yad rekna auchathyo vam pra yat sasrathe akavabhiruti

को वां॑ दाशत् सुम॒तये॑ चिद॒स्यै वसू॒ यद् धेथे॒ नम॑सा प॒दे गोः ।
जि॒गृ॒तम॒स्मे रे॒वती॒ः पुरं॑धीः काम॒प्रेणे॑व॒ मन॑सा॒ चर॑न्ता ॥२॥

Ko vam dashat sumataye chidasyai vasu yad dhethe namasa pade goh
Jigritamasme revatih purandhih kamapreneva manasa charanta

यु॒क्तो ह॒ यद् वां॑ तौ॒ग्र्याय॑ पे॒रुर्वि मध्ये॒ अर्ण॑सो॒ धायि॑ प॒ज्रः ।
उप॑ वा॒मव॑ः शर॒णं ग॑मेयं॒ शूरो॒ नाज्म॑ प॒तय॑द्भि॒रेवै॑ः ॥३॥

Yukto ha yad vam taugryaya perurvi madhye arnaso dhayi pajrah
Upa vamavah sharanam gameyam shuro najma patayadbhirevaih

उप॑स्तुतिरौच॒थ्यमु॑रुष्ये॒न्मा मामि॒मे प॑त॒त्रिणी॒ वि दु॑ग्धाम् ।
मा मामेधो॒ दश॑तयश्चि॒तो धा॒क् प्र यद् वां॑ ब॒द्धस्त्मनि॒ खाद॑ति॒ क्षाम् ॥४॥

Upastutirauchathyamurushyenma mamime patatrini vi dugdham
Ma mamedho dashatayashchito dhak pra yad vam baddhastmani khadati ksham

न मा॑ गरन् न॒द्यो॑ मा॒तृत॑मा दा॒सा यदीं॒ सुस॑मुब्धम॒वाधु॑ः ।
शिरो॒ यद॑स्य त्रैत॒नो वि॒तक्ष॑त् स्व॒यं दा॒स उरो॒ अंसा॒वपि॑ ग्ध ॥५॥

Na ma garan nadyo matritama dasa yadim susamubdhamavadhuh
Shiro yadasya traitano vitakshat svayam dasa uro ansavapi gdha

दी॒र्घत॑मा मामते॒यो जु॑जु॒र्वान् द॑श॒मे यु॒गे ।
अ॒पामर्थं॑ य॒तीनां॑ ब्र॒ह्मा भ॑वति॒ सार॑थिः ॥६॥

Dirghatama mamateyo jujurvan dashame yuge
Apamartham yatinam brahma bhavati sarathih