Sukta 157

157.1

6 dirghatama auchathyah, ashvinau, jagati, 5-6 trishtup

अबो॑ध्य॒ग्निर्ज्म उदे॑ति॒ सूर्यो॒ व्यु १षाश्च॒न्द्रा म॒ह्या॑वो अ॒र्चिषा॑ ।
आयु॑क्षाताम॒श्विना॒ यात॑वे॒ रथं॒ प्रासा॑वीद् दे॒वः स॑वि॒ता जग॒त् पृथ॑क् ॥१॥

Abodhyagnirjma udeti suryo vyu 1shashchandra mahyavo archisha
Ayukshatamashvina yatave ratham prasavid devah savita jagat prithak

157.2

यद् यु॒ञ्जाथे॒ वृष॑णमश्विना॒ रथं॑ घृ॒तेन॑ नो॒ मधु॑ना क्ष॒त्रमु॑क्षतम् ।
अ॒स्माकं॒ ब्रह्म॒ पृत॑नासु जिन्वतं व॒यं धना॒ शूर॑साता भजेमहि ॥२॥

Yad yunjathe vrishanamashvina ratham ghritena no madhuna kshatramukshatam
Asmakam brahma pritanasu jinvatam vayam dhana shurasata bhajemahi

157.3

अ॒र्वाङ् त्रि॑च॒क्रो म॑धु॒वाह॑नो॒ रथो॑ जी॒राश्वो॑ अ॒श्विनो॑र्यातु॒ सुष्टु॑तः ।
त्रि॒व॒न्धु॒रो म॒घवा॑ वि॒श्वसौ॑भग॒ः शं न॒ आ व॑क्षद् द्वि॒पदे॒ चतु॑ष्पदे ॥३॥

Arvang trichakro madhuvahano ratho jirashvo ashvinoryatu sushtutah
Trivandhuro maghava vishvasaubhagah sham na a vakshad dvipade chatushpade

157.4

आ न॒ ऊर्जं॑ वहतमश्विना यु॒वं मधु॑मत्या न॒ः कश॑या मिमिक्षतम् ।
प्रायु॒स्तारि॑ष्टं॒ नी रपां॑सि मृक्षतं॒ सेध॑तं॒ द्वेषो॒ भव॑तं सचा॒भुवा॑ ॥४॥

A na urjam vahatamashvina yuvam madhumatya nah kashaya mimikshatam
Prayustarishtam ni rapansi mrikshatam sedhatam dvesho bhavatam sachabhuva

157.5

यु॒वं ह॒ गर्भं॒ जग॑तीषु धत्थो यु॒वं विश्वे॑षु॒ भुव॑नेष्व॒न्तः ।
यु॒वम॒ग्निं च॑ वृषणाव॒पश्च॒ वन॒स्पतीँ॑रश्विना॒वैर॑येथाम् ॥५॥

Yuvam ha garbham jagatishu dhattho yuvam vishveshu bhuvaneshvantah
Yuvamagnim cha vrishanavapashcha vanaspatinrashvinavairayetham

157.6

यु॒वं ह॑ स्थो भि॒षजा॑ भेष॒जेभि॒रथो॑ ह स्थो र॒थ्या॒ ३ राथ्ये॑भिः ।
अथो॑ ह क्ष॒त्रमधि॑ धत्थ उग्रा॒ यो वां॑ ह॒विष्मा॒न् मन॑सा द॒दाश॑ ॥६॥

Yuvam ha stho bhishaja bheshajebhiratho ha stho rathya 3 rathyebhih
Atho ha kshatramadhi dhattha ugra yo vam havishman manasa dadasha