সূক্ত 157

157.1

৬ দীর্ঘতমা ঔচথ্যঃ। অশ্বিনৌ। জগতী, ৫-৬ ত্রিষ্টুপ্।

অবোধ্যগ্নির্জ্ম উদেতি সূর্যো ব্যু ১ষাশ্চন্দ্রা মহ্যাবো অর্চিষা ।
আয়ুক্ষাতামশ্বিনা যাতবে রথং প্রাসাবীদ্ দেবঃ সবিতা জগৎ পৃথক্ ॥১॥

157.2

যদ্ যুঞ্জাথে বৃষণমশ্বিনা রথং ঘৃতেন নো মধুনা ক্ষত্রমুক্ষতম্ ।
অস্মাকং ব্রহ্ম পৃতনাসু জিন্বতং বয়ং ধনা শূরসাতা ভজেমহি ॥২॥

157.3

অর্বাঙ্ ত্রিচক্রো মধুবাহনো রথো জীরাশ্বো অশ্বিনোর্যাতু সুষ্টুতঃ ।
ত্রিবন্ধুরো মঘবা বিশ্বসৌভগঃ শং ন আ বক্ষদ্ দ্বিপদে চতুষ্পদে ॥৩॥

157.4

আ ন ঊর্জং বহতমশ্বিনা যুবং মধুমত্যা নঃ কশয়া মিমিক্ষতম্ ।
প্রায়ুস্তারিষ্টং নী রপাংসি মৃক্ষতং সেধতং দ্বেষো ভবতং সচাভুবা ॥৪॥

157.5

যুবং হ গর্ভং জগতীষু ধত্থো যুবং বিশ্বেষু ভুবনেষ্বন্তঃ ।
যুবমগ্নিং চ বৃষণাবপশ্চ বনস্পতীঁরশ্বিনাবৈরয়েথাম্ ॥৫॥

157.6

যুবং হ স্থো ভিষজা ভেষজেভিরথো হ স্থো রথ্যা ৩ রাথ্যেভিঃ ।
অথো হ ক্ষত্রমধি ধত্থ উগ্রা যো বাং হবিষ্মান্ মনসা দদাশ ॥৬॥