Sukta 156

156.1

5 dirghatama auchathyah, vishnuh, jagati

भवा॑ मि॒त्रो न शेव्यो॑ घृ॒तासु॑ति॒र्विभू॑तद्युम्न एव॒या उ॑ स॒प्रथा॑ः ।
अधा॑ ते विष्णो वि॒दुषा॑ चि॒दर्ध्य॒ः स्तोमो॑ य॒ज्ञश्च॒ राध्यो॑ ह॒विष्म॑ता ॥१॥

Bhava mitro na shevyo ghritasutirvibhutadyumna evaya u saprathah
Adha te vishno vidusha chidardhyah stomo yagyashcha radhyo havishmata

156.2

यः पू॒र्व्याय॑ वे॒धसे॒ नवी॑यसे सु॒मज्जा॑नये॒ विष्ण॑वे॒ ददा॑शति ।
यो जा॒तम॑स्य मह॒तो महि॒ ब्रव॒त् सेदु॒ श्रवो॑भि॒र्युज्यं॑ चिद॒भ्य॑सत् ॥२॥

Yah purvyaya vedhase naviyase sumajjanaye vishnave dadashati
Yo jatamasya mahato mahi bravat sedu shravobhiryujyam chidabhyasat

156.3

तमु॑ स्तोतारः पू॒र्व्यं यथा॑ वि॒द ऋ॒तस्य॒ गर्भं॑ ज॒नुषा॑ पिपर्तन ।
आस्य॑ जा॒नन्तो॒ नाम॑ चिद् विवक्तन म॒हस्ते॑ विष्णो सुम॒तिं भ॑जामहे ॥३॥

Tamu stotarah purvyam yatha vida ritasya garbham janusha pipartana
Asya jananto nama chid vivaktana mahaste vishno sumatim bhajamahe

156.4

तम॑स्य॒ राजा॒ वरु॑ण॒स्तम॒श्विना॒ क्रतुं॑ सचन्त॒ मारु॑तस्य वे॒धस॑ः ।
दा॒धार॒ दक्ष॑मुत्त॒मम॑ह॒र्विदं॑ व्र॒जं च॒ विष्णु॒ः सखि॑वाँ अपोर्णु॒ते ॥४॥

Tamasya raja varunastamashvina kratum sachanta marutasya vedhasah
Dadhara dakshamuttamamaharvidam vrajam cha vishnuh sakhivam apornute

156.5

आ यो वि॒वाय॑ स॒चथा॑य॒ दैव्य॒ इन्द्रा॑य॒ विष्णु॑ः सु॒कृते॑ सु॒कृत्त॑रः ।
वे॒धा अ॑जिन्वत् त्रिषध॒स्थ आर्य॑मृ॒तस्य॑ भा॒गे यज॑मान॒माभ॑जत् ॥५॥

A yo vivaya sachathaya daivya indraya vishnuh sukrite sukrittarah
Vedha ajinvat trishadhastha aryamritasya bhage yajamanamabhajat