Sukta 159

159.1

5 dirghatama auchathyah, dyavaprithivi, jagati

प्र द्यावा॑ य॒ज्ञैः पृ॑थि॒वी ऋ॑ता॒वृधा॑ म॒ही स्तु॑षे वि॒दथे॑षु॒ प्रचे॑तसा ।
दे॒वेभि॒र्ये दे॒वपु॑त्रे सु॒दंस॑से॒त्था धि॒या वार्या॑णि प्र॒भूष॑तः ॥१॥

Pra dyava yagyaih prithivi ritavridha mahi stushe vidatheshu prachetasa
Devebhirye devaputre sudansasettha dhiya varyani prabhushatah

159.2

उ॒त म॑न्ये पि॒तुर॒द्रुहो॒ मनो॑ मा॒तुर्महि॒ स्वत॑व॒स्तद्धवी॑मभिः ।
सु॒रेत॑सा पि॒तरा॒ भूम॑ चक्रतुरु॒रु प्र॒जाया॑ अ॒मृतं॒ वरी॑मभिः ॥२॥

Uta manye pituradruho mano maturmahi svatavastaddhavimabhih
Suretasa pitara bhuma chakratururu prajaya amritam varimabhih

159.3

ते सू॒नव॒ः स्वप॑सः सु॒दंस॑सो म॒ही ज॑ज्ञुर्मा॒तरा॑ पू॒र्वचि॑त्तये ।
स्था॒तुश्च॑ स॒त्यं जग॑तश्च॒ धर्म॑णि पु॒त्रस्य॑ पाथः प॒दमद्व॑याविनः ॥३॥

Te sunavah svapasah sudansaso mahi jagyurmatara purvachittaye
Sthatushcha satyam jagatashcha dharmani putrasya pathah padamadvayavinah

159.4

ते मा॒यिनो॑ ममिरे सु॒प्रचे॑तसो जा॒मी सयो॑नी मिथु॒ना समो॑कसा ।
नव्यं॑नव्यं॒ तन्तु॒मा त॑न्वते दि॒वि स॑मु॒द्रे अ॒न्तः क॒वय॑ः सुदी॒तय॑ः ॥४॥

Te mayino mamire suprachetaso jami sayoni mithuna samokasa
Navyannavyam tantuma tanvate divi samudre antah kavayah suditayah

159.5

तद् राधो॑ अ॒द्य स॑वि॒तुर्वरे॑ण्यं व॒यं दे॒वस्य॑ प्रस॒वे म॑नामहे ।
अ॒स्मभ्यं॑ द्यावापृथिवी सुचे॒तुना॑ र॒यिं ध॑त्तं॒ वसु॑मन्तं शत॒ग्विन॑म् ॥५॥

Tad radho adya saviturvarenyam vayam devasya prasave manamahe
Asmabhyam dyavaprithivi suchetuna rayim dhattam vasumantam shatagvinam