Sukta 105

105.1

19 trita aptyah, kutsa angiraso va, vishve devah, panktih, 8 yava madhya mahabrihati, 19 trishtup

च॒न्द्रमा॑ अ॒प्स्व १ न्तरा सु॑प॒र्णो धा॑वते दि॒वि ।
न वो॑ हिरण्यनेमयः प॒दं वि॑न्दन्ति विद्युतो वि॒त्तं मे॑ अ॒स्य रो॑दसी ॥१॥

Chandrama apsva 1 ntara suparno dhavate divi
Na vo hiranyanemayah padam vindanti vidyuto vittam me asya rodasi

105.2

अर्थ॒मिद् वा उ॑ अ॒र्थिन॒ आ जा॒या यु॑वते॒ पति॑म् ।
तु॒ञ्जाते॒ वृष्ण्यं॒ पय॑ः परि॒दाय॒ रसं॑ दुहे वि॒त्तं मे॑ अ॒स्य रो॑दसी ॥२॥

Arthamid va u arthina a jaya yuvate patim
Tunjate vrishnyam payah paridaya rasam duhe vittam me asya rodasi

105.3

मो षु दे॑वा अ॒दः स्व १ रव॑ पादि दि॒वस्परि॑ ।
मा सो॒म्यस्य॑ श॒म्भुव॒ः शूने॑ भूम॒ कदा॑ च॒न वि॒त्तं मे॑ अ॒स्य रो॑दसी ॥३॥

Mo shu deva adah sva 1 rava padi divaspari
Ma somyasya shambhuvah shune bhuma kada chana vittam me asya rodasi

105.4

य॒ज्ञं पृ॑च्छाम्यव॒मं स तद् दू॒तो वि वो॑चति ।
क्व॑ ऋ॒तं पू॒र्व्यं ग॒तं कस्तद् बि॑भर्ति॒ नूत॑नो वि॒त्तं मे॑ अ॒स्य रो॑दसी ॥४॥

Yagyam prichchhamyavamam sa tad duto vi vochati
Kva ritam purvyam gatam kastad bibharti nutano vittam me asya rodasi

105.5

अ॒मी ये दे॑वा॒ः स्थन॑ त्रि॒ष्वा रो॑च॒ने दि॒वः ।
कद् व॑ ऋ॒तं कदनृ॑तं॒ क्व॑ प्र॒त्ना व॒ आहु॑तिर्वि॒त्तं मे॑ अ॒स्य रो॑दसी ॥५॥

Ami ye devah sthana trishva rochane divah
Kad va ritam kadanritam kva pratna va ahutirvittam me asya rodasi

105.6

कद् व॑ ऋ॒तस्य॑ धर्ण॒सि कद् वरु॑णस्य॒ चक्ष॑णम् ।
कद॑र्य॒म्णो म॒हस्प॒थाति॑ क्रामेम दू॒ढ्यो॑ वि॒त्तं मे॑ अ॒स्य रो॑दसी ॥६॥

Kad va ritasya dharnasi kad varunasya chakshanam
Kadaryamno mahaspathati kramema dudhyo vittam me asya rodasi

105.7

अ॒हं सो अ॑स्मि॒ यः पु॒रा सु॒ते वदा॑मि॒ कानि॑ चित् ।
तं मा॑ व्यन्त्या॒ध्यो॒ ३ वृको॒ न तृ॒ष्णजं॑ मृ॒गं वि॒त्तं मे॑ अ॒स्य रो॑दसी ॥७॥

Aham so asmi yah pura sute vadami kani chit
Tam ma vyantyadhyo 3 vriko na trishnajam mrigam vittam me asya rodasi

105.8

सं मा॑ तपन्त्य॒भित॑ः स॒पत्नी॑रिव॒ पर्श॑वः ।
मूषो॒ न शि॒श्ना व्य॑दन्ति मा॒ध्य॑ः स्तो॒तारं॑ ते शतक्रतो वि॒त्तं मे॑ अ॒स्य रो॑दसी ॥८॥

Sam ma tapantyabhitah sapatniriva parshavah
Musho na shishna vyadanti madhyah stotaram te shatakrato vittam me asya rodasi

105.9

अ॒मी ये स॒प्त र॒श्मय॒स्तत्रा॑ मे॒ नाभि॒रात॑ता ।
त्रि॒तस्तद् वेदा॒प्त्यः स जा॑मि॒त्वाय॑ रेभति वि॒त्तं मे॑ अ॒स्य रो॑दसी ॥९॥

Ami ye sapta rashmayastatra me nabhiratata
Tritastad vedaptyah sa jamitvaya rebhati vittam me asya rodasi

105.10

अ॒मी ये पञ्चो॒क्षणो॒ मध्ये॑ त॒स्थुर्म॒हो दि॒वः ।
दे॒व॒त्रा नु प्र॒वाच्यं॑ सध्रीची॒ना नि वा॑वृतुर्वि॒त्तं मे॑ अ॒स्य रो॑दसी ॥१०॥

Ami ye panchokshano madhye tasthurmaho divah
Devatra nu pravachyam sadhrichina ni vavriturvittam me asya rodasi

105.11

सु॒प॒र्णा ए॒त आ॑सते॒ मध्य॑ आ॒रोध॑ने दि॒वः ।
ते से॑धन्ति प॒थो वृकं॒ तर॑न्तं य॒ह्वती॑र॒पो वि॒त्तं मे॑ अ॒स्य रो॑दसी ॥११॥

Suparna eta asate madhya arodhane divah
Te sedhanti patho vrikam tarantam yahvatirapo vittam me asya rodasi

105.12

नव्यं॒ तदु॒क्थ्यं॑ हि॒तं देवा॑सः सुप्रवाच॒नम् ।
ऋ॒तम॑र्षन्ति॒ सिन्ध॑वः स॒त्यं ता॑तान॒ सूर्यो॑ वि॒त्तं मे॑ अ॒स्य रो॑दसी ॥१२॥

Navyam tadukthyam hitam devasah supravachanam
Ritamarshanti sindhavah satyam tatana suryo vittam me asya rodasi

105.13

अग्ने॒ तव॒ त्यदु॒क्थ्यं॑ दे॒वेष्व॒स्त्याप्य॑म् ।
स न॑ः स॒त्तो म॑नु॒ष्वदा दे॒वान् य॑क्षि वि॒दुष्ट॑रो वि॒त्तं मे॑ अ॒स्य रो॑दसी ॥१३॥

Agne tava tyadukthyam deveshvastyapyam
Sa nah satto manushvada devan yakshi vidushtaro vittam me asya rodasi

105.14

स॒त्तो होता॑ मनु॒ष्वदा दे॒वाँ अच्छा॑ वि॒दुष्ट॑रः ।
अ॒ग्निर्ह॒व्या सु॑षूदति दे॒वो दे॒वेषु॒ मेधि॑रो वि॒त्तं मे॑ अ॒स्य रो॑दसी ॥१४॥

Satto hota manushvada devam achchha vidushtarah
Agnirhavya sushudati devo deveshu medhiro vittam me asya rodasi

105.15

ब्रह्मा॑ कृणोति॒ वरु॑णो गातु॒विदं॒ तमी॑महे ।
व्यू॑र्णोति हृ॒दा म॒तिं नव्यो॑ जायतामृ॒तं वि॒त्तं मे॑ अ॒स्य रो॑दसी ॥१५॥

Brahma krinoti varuno gatuvidam tamimahe
Vyurnoti hrida matim navyo jayatamritam vittam me asya rodasi

105.16

अ॒सौ यः पन्था॑ आदि॒त्यो दि॒वि प्र॒वाच्यं॑ कृ॒तः ।
न स दे॑वा अति॒क्रमे॒ तं म॑र्तासो॒ न प॑श्यथ वि॒त्तं मे॑ अ॒स्य रो॑दसी ॥१६॥

Asau yah pantha adityo divi pravachyam kritah
Na sa deva atikrame tam martaso na pashyatha vittam me asya rodasi

105.17

त्रि॒तः कूपेऽव॑हितो दे॒वान् ह॑वत ऊ॒तये॑ ।
तच्छु॑श्राव॒ बृह॒स्पति॑ः कृ॒ण्वन्नं॑हूर॒णादु॒रु वि॒त्तं मे॑ अ॒स्य रो॑दसी ॥१७॥

Tritah kupevahito devan havata utaye
Tachchhushrava brihaspatih krinvannanhuranaduru vittam me asya rodasi

105.18

अ॒रु॒णो मा॑ स॒कृद् वृक॑ः प॒था यन्तं॑ द॒दर्श॒ हि ।
उज्जि॑हीते नि॒चाय्या॒ तष्टे॑व पृष्ट्याम॒यी वि॒त्तं मे॑ अ॒स्य रो॑दसी ॥१८॥

Aruno ma sakrid vrikah patha yantam dadarsha hi
Ujjihite nichayya tashteva prishtyamayi vittam me asya rodasi

105.19

ए॒नाङ्गू॒षेण॑ व॒यमिन्द्र॑वन्तो॒ ऽभि ष्या॑म वृ॒जने॒ सर्व॑वीराः ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥१९॥

Enangushena vayamindravanto bhi shyama vrijane sarvavirah
Tanno mitro varuno mamahantamaditih sindhuh prithivi uta dyauh