Sukta 106

106.1

7 kutsa angirasah, vishve devah, jagati, 7 trishtup

इन्द्रं॑ मि॒त्रं वरु॑णम॒ग्निमू॒तये॒ मारु॑तं॒ शर्धो॒ अदि॑तिं हवामहे ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥१॥

Indram mitram varunamagnimutaye marutam shardho aditim havamahe
Ratham na durgad vasavah sudanavo vishvasmanno anhaso nishpipartana

106.2

त आ॑दित्या॒ आ ग॑ता स॒र्वता॑तये भू॒त दे॑वा वृत्र॒तूर्ये॑षु श॒म्भुव॑ः ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥२॥

Ta aditya a gata sarvatataye bhuta deva vritraturyeshu shambhuvah
Ratham na durgad vasavah sudanavo vishvasmanno anhaso nishpipartana

106.3

अव॑न्तु नः पि॒तर॑ः सुप्रवाच॒ना उ॒त दे॒वी दे॒वपु॑त्रे ऋता॒वृधा॑ ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥३॥

Avantu nah pitarah supravachana uta devi devaputre ritavridha
Ratham na durgad vasavah sudanavo vishvasmanno anhaso nishpipartana

106.4

नरा॒शंसं॑ वा॒जिनं॑ वा॒जय॑न्नि॒ह क्ष॒यद्वी॑रं पू॒षणं॑ सु॒म्नैरी॑महे ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥४॥

Narashansam vajinam vajayanniha kshayadviram pushanam sumnairimahe
Ratham na durgad vasavah sudanavo vishvasmanno anhaso nishpipartana

106.5

बृह॑स्पते॒ सद॒मिन्न॑ः सु॒गं कृ॑धि॒ शं योर्यत् ते॒ मनु॑र्हितं॒ तदी॑महे ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥५॥

Brihaspate sadaminnah sugam kridhi sham yoryat te manurhitam tadimahe
Ratham na durgad vasavah sudanavo vishvasmanno anhaso nishpipartana

106.6

इन्द्रं॒ कुत्सो॑ वृत्र॒हणं॒ शची॒पतिं॑ का॒टे निबा॑ह्ल॒ ऋषि॑रह्वदू॒तये॑ ।
रथं॒ न दु॒र्गाद् व॑सवः सुदानवो॒ विश्व॑स्मान्नो॒ अंह॑सो॒ निष्पि॑पर्तन ॥६॥

Indram kutso vritrahanam shachipatim kate nibahla rishirahvadutaye
Ratham na durgad vasavah sudanavo vishvasmanno anhaso nishpipartana

106.7

दे॒वैर्नो॑ दे॒व्यदि॑ति॒र्नि पा॑तु दे॒वस्त्रा॒ता त्रा॑यता॒मप्र॑युच्छन् ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥७॥

Devairno devyaditirni patu devastrata trayatamaprayuchchhan
Tanno mitro varuno mamahantamaditih sindhuh prithivi uta dyauh