Sukta 104

104.1

9 kutsa angirasah, indrah, trishtup

योनि॑ष्ट इन्द्र नि॒षदे॑ अकारि॒ तमा नि षी॑द स्वा॒नो नार्वा॑ ।
वि॒मुच्या॒ वयो॑ऽव॒सायाश्वा॑न् दो॒षा वस्तो॒र्वही॑यसः प्रपि॒त्वे ॥१॥

Yonishta indra nishade akari tama ni shida svano narva
Vimuchya vayovasayashvan dosha vastorvahiyasah prapitve

ओ त्ये नर॒ इन्द्र॑मू॒तये॑ गु॒र्नू चि॒त् तान् त्स॒द्यो अध्व॑नो जगम्यात् ।
दे॒वासो॑ म॒न्युं दास॑स्य श्चम्न॒न् ते न॒ आ व॑क्षन् त्सुवि॒ताय॒ वर्ण॑म् ॥२॥

O tye nara indramutaye gurnu chit tan tsadyo adhvano jagamyat
Devaso manyum dasasya shchamnan te na a vakshan tsuvitaya varnam

अव॒ त्मना॑ भरते॒ केत॑वेदा॒ अव॒ त्मना॑ भरते॒ फेन॑मु॒दन् ।
क्षी॒रेण॑ स्नात॒ः कुय॑वस्य॒ योषे॑ ह॒ते ते स्या॑तां प्रव॒णे शिफा॑याः ॥३॥

Ava tmana bharate ketaveda ava tmana bharate phenamudan
Kshirena snatah kuyavasya yoshe hate te syatam pravane shiphayah

यु॒योप॒ नाभि॒रुप॑रस्या॒योः प्र पूर्वा॑भिस्तिरते॒ राष्टि॒ शूर॑ः ।
अ॒ञ्ज॒सी कु॑लि॒शी वी॒रप॑त्नी॒ पयो॑ हिन्वा॒ना उ॒दभि॑र्भरन्ते ॥४॥

Yuyopa nabhiruparasyayoh pra purvabhistirate rashti shurah
Anjasi kulishi virapatni payo hinvana udabhirbharante

प्रति॒ यत् स्या नीथाद॑र्शि॒ दस्यो॒रोको॒ नाच्छा॒ सद॑नं जान॒ती गा॑त् ।
अध॑ स्मा नो मघवञ्चर्कृ॒तादिन्मा नो॑ म॒घेव॑ निष्ष॒पी परा॑ दाः ॥५॥

Prati yat sya nithadarshi dasyoroko nachchha sadanam janati gat
Adha sma no maghavancharkritadinma no magheva nishshapi para dah

स त्वं न॑ इन्द्र॒ सूर्ये॒ सो अ॒प्स्व॑नागा॒स्त्व आ भ॑ज जीवशं॒से ।
मान्त॑रां॒ भुज॒मा री॑रिषो न॒ः श्रद्धि॑तं ते मह॒त इ॑न्द्रि॒याय॑ ॥६॥

Sa tvam na indra surye so apsvanagastva a bhaja jivashanse
Mantaram bhujama ririsho nah shraddhitam te mahata indriyaya

अधा॑ मन्ये॒ श्रत् ते अस्मा अधायि॒ वृषा॑ चोदस्व मह॒ते धना॑य ।
मा नो॒ अकृ॑ते पुरुहूत॒ योना॒विन्द्र॒ क्षुध्य॑द्भ्यो॒ वय॑ आसु॒तिं दा॑ः ॥७॥

Adha manye shrat te asma adhayi vrisha chodasva mahate dhanaya
Ma no akrite puruhuta yonavindra kshudhyadbhyo vaya asutim dah

मा नो॑ वधीरिन्द्र॒ मा परा॑ दा॒ मा न॑ः प्रि॒या भोज॑नानि॒ प्र मो॑षीः ।
आ॒ण्डा मा नो॑ मघवञ्छक्र॒ निर्भे॒न्मा न॒ः पात्रा॑ भेत् स॒हजा॑नुषाणि ॥८॥

Ma no vadhirindra ma para da ma nah priya bhojanani pra moshih
Anda ma no maghavanchhakra nirbhenma nah patra bhet sahajanushani

अ॒र्वाङेहि॒ सोम॑कामं त्वाहुर॒यं सु॒तस्तस्य॑ पिबा॒ मदा॑य ।
उ॒रु॒व्यचा॑ ज॒ठर॒ आ वृ॑षस्व पि॒तेव॑ नः शृणुहि हू॒यमा॑नः ॥९॥

Arvangehi somakamam tvahurayam sutastasya piba madaya
Uruvyacha jathara a vrishasva piteva nah shrinuhi huyamanah