সূক্ত 105

105.1

১৯ ত্রিত আপ্ত্যঃ, কুত্স আঙ্গিরসো বা। বিশ্বে দেবাঃ। পংক্তিঃ, ৮ যব মধ্য মহাবৃহতী, ১৯ ত্রিষ্টুপ্।

চন্দ্রমা অপ্স্ব ১ ন্তরা সুপর্ণো ধাবতে দিবি ।
ন বো হিরণ্যনেময়ঃ পদং বিন্দন্তি বিদ্যুতো বিত্তং মে অস্য রোদসী ॥১॥

অর্থমিদ্ বা উ অর্থিন আ জায়া যুবতে পতিম্ ।
তুঞ্জাতে বৃষ্ণ্যং পয়ঃ পরিদায় রসং দুহে বিত্তং মে অস্য রোদসী ॥২॥

মো ষু দেবা অদঃ স্ব ১ রব পাদি দিবস্পরি ।
মা সোম্যস্য শম্ভুবঃ শূনে ভূম কদা চন বিত্তং মে অস্য রোদসী ॥৩॥

যজ্ঞং পৃচ্ছাম্যবমং স তদ্ দূতো বি বোচতি ।
ক্ব ঋতং পূর্ব্যং গতং কস্তদ্ বিভর্তি নূতনো বিত্তং মে অস্য রোদসী ॥৪॥

অমী যে দেবাঃ স্থন ত্রিষ্বা রোচনে দিবঃ ।
কদ্ ব ঋতং কদনৃতং ক্ব প্রত্না ব আহুতির্বিত্তং মে অস্য রোদসী ॥৫॥

কদ্ ব ঋতস্য ধর্ণসি কদ্ বরুণস্য চক্ষণম্ ।
কদর্যম্ণো মহস্পথাতি ক্রামেম দূঢ্যো বিত্তং মে অস্য রোদসী ॥৬॥

অহং সো অস্মি যঃ পুরা সুতে বদামি কানি চিৎ ।
তং মা ব্যন্ত্যাধ্যো ৩ বৃকো ন তৃষ্ণজং মৃগং বিত্তং মে অস্য রোদসী ॥৭॥

সং মা তপন্ত্যভিতঃ সপত্নীরিব পর্শবঃ ।
মূষো ন শিশ্না ব্যদন্তি মাধ্যঃ স্তোতারং তে শতক্রতো বিত্তং মে অস্য রোদসী ॥৮॥

অমী যে সপ্ত রশ্ময়স্তত্রা মে নাভিরাততা ।
ত্রিতস্তদ্ বেদাপ্ত্যঃ স জামিত্বায় রেভতি বিত্তং মে অস্য রোদসী ॥৯॥

অমী যে পঞ্চোক্ষণো মধ্যে তস্থুর্মহো দিবঃ ।
দেবত্রা নু প্রবাচ্যং সধ্রীচীনা নি বাবৃতুর্বিত্তং মে অস্য রোদসী ॥১০॥

সুপর্ণা এত আসতে মধ্য আরোধনে দিবঃ ।
তে সেধন্তি পথো বৃকং তরন্তং যহ্বতীরপো বিত্তং মে অস্য রোদসী ॥১১॥

নব্যং তদুক্থ্যং হিতং দেবাসঃ সুপ্রবাচনম্ ।
ঋতমর্ষন্তি সিন্ধবঃ সত্যং তাতান সূর্যো বিত্তং মে অস্য রোদসী ॥১২॥

অগ্নে তব ত্যদুক্থ্যং দেবেষ্বস্ত্যাপ্যম্ ।
স নঃ সত্তো মনুষ্বদা দেবান্ যক্ষি বিদুষ্টরো বিত্তং মে অস্য রোদসী ॥১৩॥

সত্তো হোতা মনুষ্বদা দেবাঁ অচ্ছা বিদুষ্টরঃ ।
অগ্নির্হব্যা সুষূদতি দেবো দেবেষু মেধিরো বিত্তং মে অস্য রোদসী ॥১৪॥

ব্রহ্মা কৃণোতি বরুণো গাতুবিদং তমীমহে ।
ব্যূর্ণোতি হৃদা মতিং নব্যো জায়তামৃতং বিত্তং মে অস্য রোদসী ॥১৫॥

অসৌ যঃ পন্থা আদিত্যো দিবি প্রবাচ্যং কৃতঃ ।
ন স দেবা অতিক্রমে তং মর্তাসো ন পশ্যথ বিত্তং মে অস্য রোদসী ॥১৬॥

ত্রিতঃ কূপেঽবহিতো দেবান্ হবত ঊতয়ে ।
তচ্ছুশ্রাব বৃহস্পতিঃ কৃণ্বন্নংহূরণাদুরু বিত্তং মে অস্য রোদসী ॥১৭॥

অরুণো মা সকৃদ্ বৃকঃ পথা যন্তং দদর্শ হি ।
উজ্জিহীতে নিচায্যা তষ্টেব পৃষ্ট্যাময়ী বিত্তং মে অস্য রোদসী ॥১৮॥

এনাঙ্গূষেণ বয়মিন্দ্রবন্তো ঽভি ষ্যাম বৃজনে সর্ববীরাঃ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥১৯॥