UtshovChapter 15
15.1
सूत उवाच
एतस्मिन्नेव काले तु भगिन्यौ ते तपोधन
अपश्यतां समायान्तमुच्चैःश्रवसमन्तिकात्
Suta uvacha
Etasminneva kale tu bhaginyau te tapodhana
Apashyatam samayantamuchchaihshravasamantikat
15.2
यं तं देवगणाः सर्वे हृष्टरूपा अपूजयन्
मथ्यमानेऽमृते जातमश्वरत्नमनुत्तमम्
Yam tam devaganah sarve hrishtarupa apujayan
Mathyamanemrite jatamashvaratnamanuttamam
15.3
महौघबलमश्वानामुत्तमं जवतां वरम्
श्रीमन्तमजरं दिव्यं सर्वलक्षणलक्षितम्
Mahaughabalamashvanamuttamam javatam varam
Shrimantamajaram divyam sarvalakshanalakshitam
15.4
शौनक उवाच
कथं तदमृतं देवैर्मथितं क्व च शंस मे
यत्र जज्ञे महावीर्यः सोऽश्वराजो महाद्युतिः
Shaunaka uvacha
Katham tadamritam devairmathitam kva cha shansa me
Yatra jagye mahaviryah soshvarajo mahadyutih
15.5
सूत उवाच
ज्वलन्तमचलं मेरुं तेजोराशिमनुत्तमम्
आक्षिपन्तं प्रभां भानोः स्वशृङ्गैः काञ्चनोज्ज्वलैः
Suta uvacha
Jvalantamachalam merum tejorashimanuttamam
Akshipantam prabham bhanoh svashringaih kanchanojjvalaih
15.6
काञ्चनाभरणं चित्रं देवगन्धर्वसेवितम्
अप्रमेयमनाधृष्यमधर्मबहुलैर्जनैः
Kanchanabharanam chitram devagandharvasevitam
Aprameyamanadhrishyamadharmabahulairjanaih
15.7
व्यालैराचरितं घोरैर्दिव्यौषधिविदीपितम्
नाकमावृत्य तिष्ठन्तमुच्छ्रयेण महागिरिम्
Vyalairacharitam ghorairdivyaushadhividipitam
Nakamavritya tishthantamuchchhrayena mahagirim
15.8
अगम्यं मनसाप्यन्यैर्नदीवृक्षसमन्वितम्
नानापतगसंघैश्च नादितं सुमनोहरैः
Agamyam manasapyanyairnadivrikshasamanvitam
Nanapatagasanghaishcha naditam sumanoharaih
15.9
तस्य पृष्ठमुपारुह्य बहुरत्नाचितं शुभम्
अनन्तकल्पमुद्विद्धं सुराः सर्वे महौजसः
Tasya prishthamuparuhya bahuratnachitam shubham
Anantakalpamudviddham surah sarve mahaujasah
15.10
ते मन्त्रयितुमारब्धास्तत्रासीना दिवौकसः
अमृतार्थे समागम्य तपोनियमसंस्थिताः
Te mantrayitumarabdhastatrasina divaukasah
Amritarthe samagamya taponiyamasansthitah
15.11
तत्र नारायणो देवो ब्रह्माणमिदमब्रवीत्
चिन्तयत्सु सुरेष्वेवं मन्त्रयत्सु च सर्वशः
Tatra narayano devo brahmanamidamabravit
Chintayatsu sureshvevam mantrayatsu cha sarvashah
15.12
देवैरसुरसंघैश्च मथ्यतां कलशोदधिः
भविष्यत्यमृतं तत्र मथ्यमाने महोदधौ
Devairasurasanghaishcha mathyatam kalashodadhih
Bhavishyatyamritam tatra mathyamane mahodadhau
15.13
सर्वौषधीः समावाप्य सर्वरत्नानि चैव हि
मन्थध्वमुदधिं देवा वेत्स्यध्वममृतं ततः
Sarvaushadhih samavapya sarvaratnani chaiva hi
Manthadhvamudadhim deva vetsyadhvamamritam tatah