Sukta 122

122.1

Tritiyo nakah, 1-5 bhriguh, vishvakarma, trishtup, 4-5 jagati

ए॒तं भा॒गं परि॑ ददामि वि॒द्वान् विश्व॑कर्मन् प्रथम॒जा ऋ॒तस्य॑ ।
अ॒स्माभि॑र्द॒त्तं ज॒रसः॑ प॒रस्ता॒दच्छि॑न्नं॒ तन्तु॒मनु॒ सं त॑रेम ॥१॥

Etam bhagam pari dadami vidvan vishvakarman prathamaja ritasya
Asmabhirdattam jarasah parastadachchhinnam tantumanu sam tarema

122.2

त॒तं तन्तु॒मन्वेके॑ तरन्ति॒ येषां॑ द॒त्तं पित्र्य॒माय॑नेन ।
अ॒ब॒न्ध्वेके॒ दद॑तः प्र॒यच्छ॑न्तो॒ दातुं॒ चेच्छिक्षा॒न्त्स स्व॒र्ग ए॒व ॥२॥

Tatam tantumanveke taranti yesham dattam pitryamayanena
Abandhveke dadatah prayachchhanto datum chechchhikshantsa svarga eva

122.3

अ॒न्वार॑भेथामनु॒संर॑भेथामे॒तं लो॒कं श्र॒द्दधा॑नाः सचन्ते ।
यद् वां॑ प॒क्वं परि॑विष्टम॒ग्नौ तस्य॒ गुप्त॑ये दम्पती॒ सं श्र॑येथाम् ॥३॥

Anvarabhethamanusanrabhethametam lokam shraddadhanah sachante
Yad vam pakvam parivishtamagnau tasya guptaye dampati sam shrayetham

122.4

य॒ज्ञं यन्तं॒ मन॑सा बृ॒हन्त॑म॒न्वारो॑हामि॒ तप॑सा॒ सयो॑निः ।
उप॑हूता अग्ने ज॒रसः॑ प॒रस्ता॑त् तृ॒तीये॒ नाके॑ सध॒मादं॑ मदेम ॥४॥

Yagyam yantam manasa brihantamanvarohami tapasa sayonih
Upahuta agne jarasah parastat tritiye nake sadhamadam madema

122.5

शु॒द्धाः पू॒ता यो॒षितो॑ य॒ज्ञिया॑ इ॒मा ब्र॒ह्मणां॒ हस्ते॑षु प्रपृ॒थक् सा॑दयामि ।
यत्का॑म इ॒दम॑भिषि॒ञ्चामि॑ वो॒ऽहमिन्द्रो॑ म॒रुत्वा॒न्त्स ददातु॒ तन्मे॑ ॥५॥

Shuddhah puta yoshito yagyiya ima brahmanam hasteshu praprithak sadayami
Yatkama idamabhishinchami vohamindro marutvantsa dadatu tanme