Sukta 30

30.1

Dighayushyam, 1-17 unmochanah (ayushkamah), ayushyam, anushtup, 1 pathyapanktih, 9 bhurik, 12 chatushpada virad-jagati, 14 virata-prastarapanktih, 17 tryavasana shat-pada jagati

आ॒वत॑स्त आ॒वतः॑ परा॒वत॑स्त आ॒वतः॑ ।
इ॒हैव भ॑व॒ मा नु गा॒ मा पूर्वा॒ननु॑ गाः पि॒तॄनसुं॑ बध्नामि ते दृ॒ढम् ॥१॥

Avatasta avatah paravatasta avatah
Ihaiva bhava ma nu ga ma purvananu gah pitrinasum badhnami te dridham

30.2

यत् त्वा॑भिचे॒रुः पुरु॑षः॒ स्वो यदर॑णो॒ जनः॑ ।
उ॒न्मो॒च॒न॒प्र॒मो॒च॒ने उ॒भे वा॒चा व॑दामि ते ॥२॥

Yat tvabhicheruh purushah svo yadarano janah
Unmochanapramochane ubhe vacha vadami te

30.3

यद् दु॒द्रोहि॑थ शेपि॒षे स्त्रि॒यै पुं॒से अचि॑त्त्या ।
उ॒न्मो॒च॒न॒प्र॒मो॒च॒ने उ॒भे वा॒चा व॑दामि ते ॥३॥

Yad dudrohitha shepishe striyai punse achittya
Unmochanapramochane ubhe vacha vadami te

30.4

यदेन॑सो मा॒तृकृ॑ता॒च्छेषे॑ पि॒तृकृ॑ताच्च॒ यत्।
उ॒न्मो॒च॒न॒प्र॒मो॒च॒ने उ॒भे वा॒चा व॑दामि ते ॥४॥

Yadenaso matrikritachchheshe pitrikritachcha yat
Unmochanapramochane ubhe vacha vadami te

30.5

यत् ते मा॒ता यत् ते पि॒ता जा॒मिर्भ्राता॑ च॒ सर्ज॑तः ।
प्र॒त्यक् से॑वस्व भेष॒जं ज॒रद॑ष्टिं कृणोमि त्वा ॥५॥

Yat te mata yat te pita jamirbhrata cha sarjatah
Pratyak sevasva bheshajam jaradashtim krinomi tva

30.6

इ॒हैधि॑ पुरुष॒ सर्वे॑ण॒ मन॑सा स॒ह।
दू॒तौ य॒मस्य॒ मानु॑ गा॒ अधि॑ जीवपु॒रा इ॑हि ॥६॥

Ihaidhi purusha sarvena manasa saha
Dutau yamasya manu ga adhi jivapura ihi

30.7

अनु॑हूतः॒ पुन॒रेहि॑ वि॒द्वानु॒दय॑नं प॒थः ।
आ॒रोह॑णमा॒क्रम॑णं॒ जीव॑तोजीव॒तोऽय॑नम् ॥७॥

Anuhutah punarehi vidvanudayanam pathah
Arohanamakramanam jivatojivatoyanam

30.8

मा बि॑भे॒र्न म॑रिष्यसि ज॒रद॑ष्टिं कृणोमि त्वा ।
निर॑वोचम॒हं यक्ष्म॒मङ्गे॑भ्यो अङ्गज्व॒रं तव॑ ॥८॥

Ma bibherna marishyasi jaradashtim krinomi tva
Niravochamaham yakshmamangebhyo angajvaram tava

30.9

अ॒ङ्ग॒भे॒दो अ॑ङ्गज्व॒रो यश्च॑ ते हृदयाम॒यः ।
यक्ष्मः॑ श्ये॒न इ॑व॒ प्राप॑प्तद् वा॒चा सा॒ढः प॑रस्त॒राम् ॥९॥

Angabhedo angajvaro yashcha te hridayamayah
Yakshmah shyena iva prapaptad vacha sadhah parastaram

30.10

ऋषी॑ बोधप्रतीबो॒धाव॑स्व॒प्नो यश्च॒ जागृ॑विः ।
तौ ते॑ प्रा॒णस्य॑ गो॒प्तारौ॒ दिवा॒ नक्तं॑ च जागृताम् ॥१०॥

Rishi bodhapratibodhavasvapno yashcha jagrivih
Tau te pranasya goptarau diva naktam cha jagritam

30.11

अ॒यम॒ग्निरु॑प॒सद्य॑ इ॒ह सूर्य॒ उदे॑तु ते ।
उ॒देहि॑ मृ॒त्योर्ग॑म्भी॒रात् कृ॒ष्णाच्चि॒त् तम॑स॒स्परि॑ ॥११॥

Ayamagnirupasadya iha surya udetu te
Udehi mrityorgambhirat krishnachchit tamasaspari

30.12

नमो॑ य॒माय॒ नमो॑ अस्तु मृ॒त्यवे॒ नमः॑ पि॒तृभ्य॑ उ॒त ये नय॑न्ति ।
उ॒त्पार॑णस्य॒ यो वेद॒ तम॒ग्निं पु॒रो द॑धे॒ऽस्मा अ॑रिष्टता॑तये ॥१२॥

Namo yamaya namo astu mrityave namah pitribhya uta ye nayanti
Utparanasya yo veda tamagnim puro dadhesma arishtatataye

30.13

ऐतु॑ प्रा॒ण ऐतु॑ मन॒ ऐतु॒ चक्षु॒रथो॒ बल॑म्।
शरी॑रमस्य॒ सं वि॑दां॒ तत् प॒द्भ्यां प्रति॑ तिष्ठतु ॥१३॥

Aitu prana aitu mana aitu chakshuratho balam
Shariramasya sam vidam tat padbhyam prati tishthatu

30.14

प्रा॒णेना॑ग्ने चक्षु॑षा॒ सं सृ॑जे॒मं समी॑रय त॒न्वा॒३सं बले॑न ।
वेत्था॒मृत॑स्य॒ मा नु गा॒न्मा नु भूमि॑गृहो भुवत् ॥१४॥

Pranenagne chakshusha sam srijemam samiraya tanva3sam balena
Vetthamritasya ma nu ganma nu bhumigriho bhuvat

30.15

मा ते॑ प्रा॒ण उप॑ दस॒न्मो अ॑पा॒नोऽपि॑ धायि ते ।
सूर्य॒स्त्वाधि॑पतिर्मृ॒त्योरु॒दाय॑च्छतु र॒श्मिभिः॑ ॥१५॥

Ma te prana upa dasanmo apanopi dhayi te
Suryastvadhipatirmrityorudayachchhatu rashmibhih

30.16

इ॒यम॒न्तर्व॒दति जि॒ह्वा ब॒द्धा प॑निष्प॒दा।
त्वया॒ यक्ष्मं॒ निर॑वोचं श॒तं रोपी॑श्च त॒क्मनः॑ ॥१६॥

Iyamantarvadati jihva baddha panishpada
Tvaya yakshmam niravocham shatam ropishcha takmanah

30.17

अ॒यं लो॒कः प्रि॒यत॑मो दे॒वाना॒मप॑राजितः ।
यस्मै॒ त्वमि॒ह मृ॒त्यवे॑ दि॒ष्टः पु॑रुष जज्ञि॒षे।
स च॒ त्वानु॑ ह्वयामसि॒ मा पु॒रा ज॒रसो॑ मृथाः ॥१७॥

Ayam lokah priyatamo devanamaparajitah
Yasmai tvamiha mrityave dishtah purusha jagyishe
Sa cha tvanu hvayamasi ma pura jaraso mrithah