Sukta 29

29.1

Rakshoghnam, 1-15 chatanah, jatavedah, mantroktah, trishtup, 3 tripada virannama gayatri, 5 purotijagati virad-jagati, 12-15 anushtup ( 12 bhurik, 14 chatushpada parabrihati kakummati

पु॒रस्ता॑द् यु॒क्तो व॑ह जातवे॒दोऽग्ने॑ वि॒द्धि क्रि॒यमा॑णं॒ यथे॒दम्।
त्वं भि॒षग् भे॑ष॒जस्या॑सि क॒र्ता त्वया॒ गामश्वं॒ पुरु॑षं सनेम ॥१॥

Purastad yukto vaha jatavedogne viddhi kriyamanam yathedam
Tvam bhishag bheshajasyasi karta tvaya gamashvam purusham sanema

29.2

तथा॒ तद॑ग्ने कृणु जातवेदो॒ विश्वे॑भिर्दे॒वैः स॒ह सं॑विदा॒नः ।
यो नो॑ दि॒देव॑ यत॒मो ज॒घास॒ यथा॒ सो अ॒स्य प॑रि॒धिष्पता॑ति ॥२॥

Tatha tadagne krinu jatavedo vishvebhirdevaih saha sanvidanah
Yo no dideva yatamo jaghasa yatha so asya paridhishpatati

29.3

यथा॒ सो अ॒स्य प॑रि॒धिष्पता॑ति तथा॒ तद॑ग्ने कृणु जातवेदः ।
विश्वे॑भिर्दे॒वैः स॒ह सं॑विदा॒नः ॥३॥

Yatha so asya paridhishpatati tatha tadagne krinu jatavedah
Vishvebhirdevaih saha sanvidanah

29.4

अ॒क्ष्यौ॒३नि वि॑ध्य॒ हृद॑यं॒ नि वि॑ध्य जि॒ह्वां नि तृ॑न्द्धि॒ प्र द॒तो मृ॑णीहि ।
पि॒शा॒चो अ॒स्य य॑त॒मो ज॒घासाग्ने यविष्ठ॒ प्रति॒ तं शृ॑णीहि ॥४॥

Akshyau3ni vidhya hridayam ni vidhya jihvam ni trinddhi pra dato mrinihi
Pishacho asya yatamo jaghasagne yavishtha prati tam shrinihi

29.5

यद॑स्य हृ॒तं विहृ॑तं॒ यत् परा॑भृतमा॒त्मनो॑ ज॒ग्धं य॑तम॒त् पि॑शा॒चैः ।
तद॑ग्ने वि॒द्वान् पुन॒रा भ॑र॒ त्वं शरी॑रे मां॒समसु॒मेर॑यामः ॥५॥

Yadasya hritam vihritam yat parabhritamatmano jagdham yatamat pishachaih
Tadagne vidvan punara bhara tvam sharire mansamasumerayamah

29.6

आ॒मे सुप॑क्वे श॒बले॒ विप॑क्वे॒ यो मा॑ पिशा॒चो अश॑ने द॒दम्भ॑ ।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥६॥

Ame supakve shabale vipakve yo ma pishacho ashane dadambha
Tadatmana prajaya pishacha vi yatayantamagado3yamastu

29.7

क्षि॒रे मा॑ म॒न्थे य॑त॒मो द॒दम्भा॑कृष्टप॒च्ये अश॑ने धा॒न्ये॒३यः ।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥७॥

Kshire ma manthe yatamo dadambhakrishtapachye ashane dhanye3yah
Tadatmana prajaya pishacha vi yatayantamagado3yamastu

29.8

अ॒पां मा॒ पाने॑ यत॒मो द॒दम्भ॑ क्र॒व्याद् या॑तू॒नां शय॑ने॒ शया॑नम्।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥८॥

Apam ma pane yatamo dadambha kravyad yatunam shayane shayanam
Tadatmana prajaya pishacha vi yatayantamagado3yamastu

29.9

दिवा॑ मा॒ नक्तं॑ यत॒मो द॒दम्भ॑ क्रव्या॒द् या॑तू॒नां शय॑ने॒ शया॑नम्।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥९॥

Diva ma naktam yatamo dadambha kravyad yatunam shayane shayanam
Tadatmana prajaya pishacha vi yatayantamagado3yamastu

29.10

क्र॒व्याद॑मग्ने रुधि॒रं पि॑शा॒चं म॑नो॒हनं॑ जहि जातवेदः ।
तमिन्द्रो॑ वा॒जी वज्रे॑ण हन्तु छि॒नत्तु॒ सोमः॒ शिरो॑ अस्य धृ॒ष्णुः ॥१०॥

Kravyadamagne rudhiram pishacham manohanam jahi jatavedah
Tamindro vaji vajrena hantu chhinattu somah shiro asya dhrishnuh

29.11

स॒नाद॑ग्ने मृणसि यातु॒धाना॒न् न त्वा॒ रक्षां॑सि॒ पृत॑नासु जिग्युः ।
स॒हमू॑रा॒ननु॑ दह क्र॒व्यादो॒ मा ते॑ हे॒त्या मु॑क्षतः॒ दैव्या॑याः ॥११॥

Sanadagne mrinasi yatudhanan na tva rakshansi pritanasu jigyuh
Sahamurananu daha kravyado ma te hetya mukshatah daivyayah

29.12

स॒माह॑र जातवेदो॒ यद्धृ॒तं यत् परा॑भृतम्।
गात्रा॑ण्यस्य वर्धन्तामं॒शुरि॒वा प्या॑यताम॒यम् ॥१२॥

Samahara jatavedo yaddhritam yat parabhritam
Gatranyasya vardhantamanshuriva pyayatamayam

29.13

सोम॑स्येव जातवेदो अं॒शुरा प्या॑यताम॒यम्।
अग्ने॑ विर॒प्शिनं॒ मेध्य॑मय॒क्ष्मं कृ॑णु॒ जीव॑तु ॥१३॥

Somasyeva jatavedo anshura pyayatamayam
Agne virapshinam medhyamayakshmam krinu jivatu

29.14

ए॒तास्ते॑ अग्ने स॒मिधः॑ पिशाच॒जम्भ॑नीः ।
तास्त्वं जु॑षस्व॒ प्रति॑ चैना गृहाण जातवेदः ॥१४॥

Etaste agne samidhah pishachajambhanih
Tastvam jushasva prati chaina grihana jatavedah

29.15

ता॒र्ष्टा॒घीर॑ग्ने स॒मिधः॒ प्रति॑ गृह्णाह्य॒र्चिषा॑ ।
जहा॑तु क्र॒व्याद् रू॒पं यो अ॑स्य मां॒सं जिही॑र्षति ॥१५॥

Tarshtaghiragne samidhah prati grihnahyarchisha
Jahatu kravyad rupam yo asya mansam jihirshati