Sukta 31

31.1

Krityapariharanam, 1-12 shakrah, krityadushanam, anushtup, 11 brihatigarbha anushtup, 12 pathyabrihati

यां ते॑ च॒क्रुरा॒मे पात्रे॒ यां च॒क्रुर्मि॒श्रधा॑न्ये ।
आ॒मे मां॒से कृ॒त्यां यां च॒क्रुः पुनः॒ प्रति॑ हरामि॒ ताम् ॥१॥

Yam te chakrurame patre yam chakrurmishradhanye
Ame manse krityam yam chakruh punah prati harami tam

31.2

यां ते॑ च॒क्रुः कृ॑क॒वाका॑व॒जे वा॒ यां कु॑री॒रिणि॑ ।
अव्यां॑ ते कृ॒त्यां यां च॒क्रुः पुनः॒ प्रति॑ हरामि॒ ताम् ॥२॥

Yam te chakruh krikavakavaje va yam kuririni
Avyam te krityam yam chakruh punah prati harami tam

31.3

यां ते॑ च॒क्रुरेक॑शफे पशू॒नामु॑भ॒याद॑ति ।
ग॒र्द॒भे कृ॒त्यां यां च॒क्रुः पुनः॒ प्रति॑ हरामि॒ ताम् ॥३॥

Yam te chakrurekashaphe pashunamubhayadati
Gardabhe krityam yam chakruh punah prati harami tam

31.4

यां ते॑ च॒क्रुर॑मू॒लायां॑ वल॒गं वा॑ नरा॒च्याम्।
क्षेत्रे॑ ते कृ॒त्यां यां च॒क्रुः पुनः॒ प्रति॑ हरामि॒ ताम् ॥४॥

Yam te chakruramulayam valagam va narachyam
Kshetre te krityam yam chakruh punah prati harami tam

31.5

यां ते॑ च॒क्रुर्गार्ह॑पत्ये पूर्वा॒ग्नावु॒त दु॒श्चितः॑ ।
शाला॑यां कृ॒त्यां यां च॒क्रुः पुनः॒ प्रति॑ हरामि॒ ताम् ॥५॥

Yam te chakrurgarhapatye purvagnavuta dushchitah
Shalayam krityam yam chakruh punah prati harami tam

31.6

यां ते॑ च॒क्रुः स॒भायां॒ यां च॒क्रुर॑धि॒देव॑ने ।
अ॒क्षेषु॑ कृ॒त्यां यां च॒क्रुः पुनः॒ प्रति॑ हरामि॒ ताम् ॥६॥

Yam te chakruh sabhayam yam chakruradhidevane
Aksheshu krityam yam chakruh punah prati harami tam

31.7

यां ते॑ च॒क्रुः सेना॑यां॒ यां च॒क्रुरि॑ष्वायु॒धे।
दु॒न्दु॒भौ कृ॒त्यां यां च॒क्रुः पुनः॒ प्रति॑ हरामि॒ ताम् ॥७॥

Yam te chakruh senayam yam chakrurishvayudhe
Dundubhau krityam yam chakruh punah prati harami tam

31.8

यां ते॑ कृ॒त्यां कूपे॑ऽवद॒धुः श्म॑शा॒ने वा॑ निच॒ख्नुः ।
सद्म॑नि कृ॒त्यां यां च॒क्रुः पुनः॒ प्रति॑ हरामि॒ ताम् ॥८॥

Yam te krityam kupevadadhuh shmashane va nichakhnuh
Sadmani krityam yam chakruh punah prati harami tam

31.9

यां ते॑ च॒क्रुः पु॑रुषा॒स्थे अ॒ग्नौ संक॑सुके च॒ याम्।
म्रो॒कं नि॑र्दा॒हं क्र॒व्यादं॒ पुनः॒ प्रति॑ हरामि॒ ताम् ॥९॥

Yam te chakruh purushasthe agnau sankasuke cha yam
Mrokam nirdaham kravyadam punah prati harami tam

31.10

अप॑थे॒ना ज॑भारैणां॒ तां प॒थेतः प्र हि॑ण्मसि ।
अधी॑रो मर्या॒धीरे॑भ्यः॒ सं ज॑भा॒राचि॑त्त्या ॥१०॥

Apathena jabharainam tam pathetah pra hinmasi
Adhiro maryadhirebhyah sam jabharachittya

31.11

यश्च॒कार॒ न श॒शाक॒ कर्तुं॑ श॒श्रे पाद॑म॒ङ्गुरि॑म्।
च॒कार॑ भ॒द्रम॒स्मभ्य॑मभ॒गो भग॑वद्भ्यः ॥११॥

Yashchakara na shashaka kartum shashre padamangurim
Chakara bhadramasmabhyamabhago bhagavadbhyah

31.12

कृ॒त्या॒कृतं॑ वल॒गिनं॑ मू॒लिनं॑ शपथे॒य्यऽम्।
इन्द्र॒स्तं ह॑न्तु मह॒ता व॒धेना॒ग्निर्वि॑ध्यत्व॒स्तया॑ ॥१२॥

Krityakritam valaginam mulinam shapatheyyam
Indrastam hantu mahata vadhenagnirvidhyatvastaya