Sukta 30

30.1

Sammanasyam, 1-7 atharva, chandramah, sammanasyam, anushtup, 5 virad jagati, 6 prastarapanktih, 7 trishtup

सहृ॑दयं सांमन॒स्यमवि॑द्वेषं कृणोमि वः ।
अ॒न्यो अ॒न्यम॒भि ह॑र्यत व॒त्सं जा॒तमि॑वा॒घ्न्या ॥१॥

Sahridayam sammanasyamavidvesham krinomi vah
Anyo anyamabhi haryata vatsam jatamivaghnya

अनु॑व्रतः पि॒तुः पु॒त्रो मा॒त्रा भ॑वतु॒ संम॑नाः ।
जा॒या पत्ये॒ मधु॑मतीं॒ वाचं॑ वदतु शन्ति॒वाम् ॥२॥

Anuvratah pituh putro matra bhavatu sammanah
Jaya patye madhumatim vacham vadatu shantivam

मा भ्राता॒ भ्रात॑रं द्विक्ष॒न्मा स्वसा॑रमु॒त स्वसा॑ ।
स॒म्यञ्चः॒ सव्र॑ता भू॒त्वा वाचं॑ वदत भ॒द्रया॑ ॥३॥

Ma bhrata bhrataram dvikshanma svasaramuta svasa
Samyanchah savrata bhutva vacham vadata bhadraya

येन॑ दे॒वा न वि॒यन्ति॒ नो च॑ विद्वि॒षते॑ मि॒थः ।
तत् कृ॑ण्मो॒ ब्रह्म॑ वो गृ॒हे सं॒ज्ञानं॒ पुरु॑षेभ्यः ॥४॥

Yena deva na viyanti no cha vidvishate mithah
Tat krinmo brahma vo grihe sangyanam purushebhyah

ज्याय॑स्वन्तश्चि॒त्तिनो॒ मा वि यौ॑ष्ट संरा॒धय॑न्तः॒ सधु॑रा॒श्चर॑न्तः ।
अ॒न्यो अ॒न्यस्मै॑ व॒ल्गु वद॑न्त॒ एत॑ सध्री॒चीना॑न् वः॒ संम॑नसस्कृणोमि ॥५॥

Jyayasvantashchittino ma vi yaushta sanradhayantah sadhurashcharantah
Anyo anyasmai valgu vadanta eta sadhrichinan vah sammanasaskrinomi

स॒मा॒नी प्र॒पा स॒ह वो॑ऽन्नभा॒गः स॑मा॒ने योक्त्रे॑ स॒ह वो॑ युनज्मि ।
स॒म्यञ्चो॒ऽग्निं स॑पर्यता॒रा नाभि॑मिवा॒भितः॑ ॥६॥

Samani prapa saha vonnabhagah samane yoktre saha vo yunajmi
Samyanchognim saparyatara nabhimivabhitah

स॒ध्री॒चीना॑न् वः संम॑नसस्कृणो॒म्ये॑क॑श्नुष्टीन्त्सं॒वन॑नेन॒ सर्वा॑न्।
दे॒वा इ॑वा॒मृतं॒ रक्ष॑माणाः सा॒यंप्रा॑तः सौमन॒सो वो॑ अस्तु ॥७॥

Sadhrichinan vah sammanasaskrinomyekashnushtintsanvananena sarvan
Deva ivamritam rakshamanah sayampratah saumanaso vo astu