Sukta 31

31.1

Yakshmanashanam 1-11 brahma, papmaha, 1 agnih, 2 shakrah, 3 pashavah, 4 dyavaprithivi, 5 tvashta, 6 agnih, indrah, 7 devah, suryah, 8-10 ayuh, 11 parjanyah, anushtup, 4 bhurik 5 virat prastarapanktih

वि दे॒वा ज॒रसा॑वृत॒न् वि त्वम॑ग्ने॒ अरा॑त्या ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥१॥

Vi deva jarasavritan vi tvamagne aratya
Vya1ham sarvena papmana vi yakshmena samayusha

31.2

व्यार्त्या॒ पव॑मानो॒ वि श॒क्रः पा॑पकृ॒त्यया॑ ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥२॥

Vyartya pavamano vi shakrah papakrityaya
Vya1ham sarvena papmana vi yakshmena samayusha

31.3

वि ग्रा॒म्याः प॒शव॑ आर॒ण्यैर्व्याऽप॒स्तृष्ण॑यासरन्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥३॥

Vi gramyah pashava aranyairvyapastrishnayasaran
Vya1ham sarvena papmana vi yakshmena samayusha

31.4

वी॒३मे द्यावा॑पृथि॒वी इ॒तो वि पन्था॑नो॒ दिशं॑दिशम्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥४॥

Vi3me dyavaprithivi ito vi panthano dishandisham
Vya1ham sarvena papmana vi yakshmena samayusha

31.5

त्वष्टा॑ दुहि॒त्रे व॑ह॒तुं यु॑न॒क्तीती॒दं विश्वं॒ भुव॑नं॒ वि या॑ति ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥५॥

Tvashta duhitre vahatum yunaktitidam vishvam bhuvanam vi yati
Vya1ham sarvena papmana vi yakshmena samayusha

31.6

अ॒ग्निः प्रा॒णान्त्सं द॑धाति च॒न्द्रः प्रा॒णेन॒ संहि॑तः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥६॥

Agnih pranantsam dadhati chandrah pranena sanhitah
Vya1ham sarvena papmana vi yakshmena samayusha

31.7

प्रा॒णेन॑ वि॒श्वतो॑वीर्यं दे॒वाः सूर्यं॒ समै॑रयन्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥७॥

Pranena vishvatoviryam devah suryam samairayan
Vya1ham sarvena papmana vi yakshmena samayusha

31.8

आयु॑ष्मतामायु॒ष्कृतां॑ प्रा॒णेन॑ जीव॒ मा मृ॑थाः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥८॥

Ayushmatamayushkritam pranena jiva ma mrithah
Vya1ham sarvena papmana vi yakshmena samayusha

31.9

प्रा॒णेन॑ प्राण॒तां प्राणे॒हैव भ॑व॒ मा मृ॑थाः ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥९॥

Pranena pranatam pranehaiva bhava ma mrithah
Vya1ham sarvena papmana vi yakshmena samayusha

31.10

उदायु॑षा॒ समायु॒षोदोष॑धीनां॒ रसे॑न ।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥१०॥

Udayusha samayushodoshadhinam rasena
Vya1ham sarvena papmana vi yakshmena samayusha

31.11

आप॒र्जन्य॑स्य वृ॒ष्ट्योद॑स्थामा॒मृता॑ व॒यम्।
व्य॑१हं सर्वे॑ण पा॒प्मना॒ वि यक्ष्मे॑ण॒ समायु॑षा ॥११॥

Aparjanyasya vrishtyodasthamamrita vayam
Vya1ham sarvena papmana vi yakshmena samayusha