Sukta 17

17.1

Krishih, 1-9 vishvamitrah, sita, anushtup, 1arshi gayatri, 2, 5, 9 trishtup, 3 pathyapanktih, 7 virat pura ushnik, 8 nichrit

सीरा॑ युञ्जन्ति क॒वयो॑ यु॒गा वि त॑न्वते॒ पृथ॑क्। धीरा॑ दे॒वेषु॑ सुम्न॒यौ ॥१॥

Sira yunjanti kavayo yuga vi tanvate prithak, dhira deveshu sumnayau

यु॒नक्त॒ सीरा॒ वि यु॒गा त॑नोत कृ॒ते योनौ॑ वपते॒ह बीज॑म्।
वि॒राजः॒ श्नुष्टिः॒ सभ॑रा असन्नो॒ नेदी॑य॒ इत् सृ॒ण्यः प॒क्वमा य॑वन् ॥२॥

Yunakta sira vi yuga tanota krite yonau vapateha bijam
Virajah shnushtih sabhara asanno nediya it srinyah pakvama yavan

लाङ्ग॑लं पवी॒रव॑त् सु॒शीमं॑ सोम॒सत्स॑रु ।
उदिद् व॑पतु॒ गामविं॑ प्र॒स्थाव॑द् रथ॒वाह॑नं॒ पीब॑रीं च प्रफ॒र्व्यऽम् ॥३॥

Langalam paviravat sushimam somasatsaru
Udid vapatu gamavim prasthavad rathavahanam pibarim cha prapharvyam

इन्द्रः॒ सीतां॒ नि गृ॑ह्णातु॒ तां पू॒षाभि र॑क्षतु ।
सा नः॒ पय॑स्वती दुहा॒मुत्त॑रामुत्तरां॒ समा॑म् ॥४॥

Indrah sitam ni grihnatu tam pushabhi rakshatu
Sa nah payasvati duhamuttaramuttaram samam

शु॒नं सु॑फा॒ला वि तु॑दन्तु॒ भूमिं॑ शु॒नं की॒नाशा॒ अनु॑ यन्तु वा॒हान्।
शुना॑सीरा ह॒विषा॒ तोश॑माना सुपिप्प॒ला ओष॑धीः कर्तम॒स्मै ॥५॥

Shunam suphala vi tudantu bhumim shunam kinasha anu yantu vahan
Shunasira havisha toshamana supippala oshadhih kartamasmai

शु॒नं वा॒हाः शु॒नं नरः॑ शु॒नं कृ॑षतु॒ लाङ्ग॑लम्।
शु॒नं व॑र॒त्रा ब॑ध्य॒न्तां शु॒नमष्ट्रा॒मुदि॑ङ्गय ॥६॥

Shunam vahah shunam narah shunam krishatu langalam
Shunam varatra badhyantam shunamashtramudingaya

शुना॑सीरे॒ह स्म॑ मे जुषेथाम्।
यद् दि॒वि च॒क्रथुः॒ पय॒स्तेने॒मामुप॑ सिञ्चतम् ॥७॥

Shunasireha sma me jushetham
Yad divi chakrathuh payastenemamupa sinchatam

सीते॒ वन्दा॑महे त्वा॒र्वाची॑ सुभगे भव ।
यथा॑ नः सु॒मना॒ असो॒ यथा॑ नः सुफ॒ला भुवः॑ ॥८॥

Site vandamahe tvarvachi subhage bhava
Yatha nah sumana aso yatha nah suphala bhuvah

घृ॒तेन॒ सीता॒ मधु॑ना॒ सम॑क्ता॒ विश्वै॑र्दे॒वैरनु॑मता म॒रुद्भिः॑ ।
सा नः॑ सीते॒ पय॑सा॒भ्याव॑वृ॒त्स्वोर्ज॑स्वती घृ॒तव॒त् पिन्व॑माना ॥९॥

Ghritena sita madhuna samakta vishvairdevairanumata marudbhih
Sa nah site payasabhyavavritsvorjasvati ghritavat pinvamana