Sukta 16

16.1

Svastaye prarthana, 1-7 atharva, 1 agnih, indrah, mitravarunau, ashvinau, bhagah, pusha, brahmanaspatih, somah, rudrah, 2-3 5 bhagah, adityah, 4 indrah, 6 dadhikrava, ashvah, 7 ushah, trishtup, 1 arshi jagati, 4 bhurik panktih

प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं ह॑वामहे ॥१॥

Prataragnim pratarindram havamahe pratarmitravaruna pratarashvina
Pratarbhagam pushanam brahmanaspatim pratah somamuta rudram havamahe

16.2

प्रा॒त॒र्जितं॒ भग॑मु॒ग्रं ह॑वामहे व॒यं पु॒त्रमदि॑ते॒र्यो वि॑ध॒र्ता।
आ॒ध्रश्चि॒द् यं मन्य॑मानस्तु॒रश्चि॒द् राजा॑ चि॒द् यं भगं॑ भ॒क्षीत्याह॑ ॥२॥

Pratarjitam bhagamugram havamahe vayam putramaditeryo vidharta
Adhrashchid yam manyamanasturashchid raja chid yam bhagam bhakshityaha

16.3

भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वन्तः॑ स्याम ॥३॥

Bhaga pranetarbhaga satyaradho bhagemam dhiyamudava dadannah
Bhaga pra no janaya gobhirashvairbhaga pra nribhirnrivantah syama

16.4

उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म्।
उ॒तोदि॑तौ मघव॒न्त्सूर्य॑स्य व॒यं दे॒वानां॑ सुम॒तौ स्या॑म ॥४॥

Utedanim bhagavantah syamota prapitva uta madhye ahnam
Utoditau maghavantsuryasya vayam devanam sumatau syama

16.5

भग॑ ए॒व भग॑वाँ अस्तु दे॒वस्तेना॑ व॒यं भग॑वन्तः स्याम ।
तं त्वा॑ भग॒ सर्व॒ इज्जो॑हवीमि॒ स नो॑ भग पुरए॒ता भ॑वे॒ह ॥५॥

Bhaga eva bhagavam astu devastena vayam bhagavantah syama
Tam tva bhaga sarva ijjohavimi sa no bhaga puraeta bhaveha

16.6

सम॑ध्व॒रायो॒षसो॑ नमन्त दधि॒क्रावे॑व॒ शुच॑ये प॒दाय॑ ।
अ॒र्वा॒ची॒नं व॑सु॒विदं॒ भगं॑ मे॒ रथ॑मि॒वाश्वा॑ वा॒जिन॒ आ व॑हन्तु ॥६॥

Samadhvarayoshaso namanta dadhikraveva shuchaye padaya
Arvachinam vasuvidam bhagam me rathamivashva vajina a vahantu

16.7

अश्वा॑वती॒र्गोम॑तीर्न उ॒षा॑सो॑ वी॒रव॑तीः॒ सद॑मुछन्तु भ॒द्राः ।
घृ॒तं दुहा॑ना वि॒श्वतः॒ प्रपी॑ता यू॒यं पा॑त स्व॒स्तिभिः॒ सदा॑ नः ॥७॥

Ashvavatirgomatirna ushaso viravatih sadamuchhantu bhadrah
Ghritam duhana vishvatah prapita yuyam pata svastibhih sada nah