Sukta 15

15.1

Vanijyam, 1-8 atharva (panyakamah), vishve devah, indragni, trishtup, 1 bhurik, 4 tryavasana shat pada brihatigarbha viradatyashtih, 5 viradjagati, 7 anushtup, 8 nichrit

इन्द्र॑म॒हं व॒णिजं॑ चोदयामि॒ स न॒ ऐतु॑ पुरए॒ता नो॑ अस्तु ।
नु॒दन्नरा॑तिं परिप॒न्थिनं॑ मृ॒गं स ईशा॑नो धन॒दा अ॑स्तु॒ मह्य॑म् ॥१॥

Indramaham vanijam chodayami sa na aitu puraeta no astu
Nudannaratim paripanthinam mrigam sa ishano dhanada astu mahyam

15.2

ये पन्था॑नो ब॒हवो॑ देव॒याना॑ अन्त॒रा द्यावा॑पृथि॒वी सं॒चर॑न्ति ।
ते मा॑ जुषन्तां॒ पय॑सा घृ॒तेन॒ यथा॑ क्री॒त्वा धन॑मा॒हरा॑णि ॥२॥

Ye panthano bahavo devayana antara dyavaprithivi sancharanti
Te ma jushantam payasa ghritena yatha kritva dhanamaharani

15.3

इ॒ध्मेना॑ग्न इ॒च्छमा॑नो घृ॒ते॑न जुहो॑मि ह॒व्यं त॑रसे॒ बला॑य ।
याव॒दीशे॒ ब्रह्म॑णा॒ वन्द॑मान इ॒मां धियं॑ शत॒सेया॑य दे॒वीम् ॥३॥

Idhmenagna ichchhamano ghritena juhomi havyam tarase balaya
Yavadishe brahmana vandamana imam dhiyam shataseyaya devim

15.4

इ॒माम॑ग्ने श॒रणिं॑ मीमृषो नो॒ यमध्वा॑न॒मगा॑म दू॒रम्।
शु॒नं नो॑ अस्तु प्रप॒णो वि॑क्र॒यश्च॑ प्रतिप॒णः फ॒लिनं॑ मा कृणोतु ।
इ॒दं ह॒व्यं सं॑विदा॒नौ जु॑षेथां शु॒नं नो॑ अस्तु चरि॒तमुत्थि॑तं च ॥४॥

Imamagne sharanim mimrisho no yamadhvanamagama duram
Shunam no astu prapano vikrayashcha pratipanah phalinam ma krinotu
Idam havyam sanvidanau jushetham shunam no astu charitamutthitam cha

15.5

येन॒ धने॑न प्रप॒णं चरा॑मि॒ धने॑न देवा॒ धन॑मि॒च्छमा॑नः ।
तन्मे॒ भूयो॑ भवतु॒ मा कनी॒योऽग्ने॑ सात॒घ्नो दे॒वान् ह॒विषा॒ नि षे॑ध ॥५॥

Yena dhanena prapanam charami dhanena deva dhanamichchhamanah
Tanme bhuyo bhavatu ma kaniyogne sataghno devan havisha ni shedha

15.6

येन॒ धने॑न प्रप॒णं चरा॑मि॒ धने॑न दे॒वा धन॑मि॒च्छमा॑नः ।
तस्मि॑न् म॒ इन्द्रो॒ रुचि॒मा द॑धातु प्र॒जाप॑तिः सवि॒ता सोमो॑ अ॒ग्निः ॥६॥

Yena dhanena prapanam charami dhanena deva dhanamichchhamanah
Tasmin ma indro ruchima dadhatu prajapatih savita somo agnih

15.7

उप॑ त्वा॒ नम॑सा व॒यं होत॑र्वैश्वानर स्तु॒मः ।
स नः॑ प्र॒जास्वा॒त्मसु गोषु॑ प्रा॒णेषु॑ जागृहि ॥७॥

Upa tva namasa vayam hotarvaishvanara stumah
Sa nah prajasvatmasu goshu praneshu jagrihi

15.8

वि॒श्वाहा॑ ते॒ सद॒मिद् भ॑रे॒माश्वा॑येव॒ तिष्ठ॑ते जातवेदः ।
रा॒यस्पोषे॑ण॒ समि॒षा मद॑न्तो॒ मा ते॑ अग्ने॒ प्रति॑वेशा रिषाम ॥८॥

Vishvaha te sadamid bharemashvayeva tishthate jatavedah
Rayasposhena samisha madanto ma te agne prativesha rishama