Sukta 14

14.1

Goshthah, 1-6 brahma, goshthah, ahah, 2 aryama, pusha, brihaspatih, indrah, 1-6 gavah, 5 goshthashcha, anushtup, 6arshi trishtup

सं वो॑ गो॒ष्ठेन॑ सु॒षदा॒ सं र॒य्या सं सुभू॑त्या ।
अह॑र्जातस्य॒ यन्नाम॒ तेना॒ वः॒ सं सृ॑जामसि ॥१॥

Sam vo goshthena sushada sam rayya sam subhutya
Aharjatasya yannama tena vah sam srijamasi

14.2

सं वः॑ सृजत्वर्य॒मा सं पू॒षा सं बृह॒स्पतिः॑ ।
समिन्द्रो॒ यो ध॑नंज॒यो मयि॑ पुष्यत॒ यद् वसु॑ ॥२॥

Sam vah srijatvaryama sam pusha sam brihaspatih
Samindro yo dhananjayo mayi pushyata yad vasu

14.3

सं॒ज॒ग्मा॒ना अबि॑भ्युषीर॒स्मिन् गो॒ष्ठे क॑री॒षिणीः॑ ।
बिभ्र॑तीः सो॒म्यं मध्व॑नमी॒वा उ॒पेत॑न ॥३॥

Sanjagmana abibhyushirasmin goshthe karishinih
Bibhratih somyam madhvanamiva upetana

14.4

इ॒हैव गा॑व॒ एत॑ने॒हो शके॑व पुष्यत ।
इ॒हैवोत प्र जा॑यध्वं॒ मयि॑ सं॒ज्ञान॑मस्तु वः ॥४॥

Ihaiva gava etaneho shakeva pushyata
Ihaivota pra jayadhvam mayi sangyanamastu vah

14.5

शि॒वो वो॑ गो॒ष्ठो भ॑वतु शारि॒शाके॑व पुष्यत ।
इ॒हैवोत प्र जा॑यध्वं॒ मया॑ वः॒ सं सृ॑जामसि ॥५॥

Shivo vo goshtho bhavatu sharishakeva pushyata
Ihaivota pra jayadhvam maya vah sam srijamasi

14.6

मया॑ गावो॒ गोप॑तिना सचध्वम॒यं वो॑ गो॒ष्ठ इ॒ह पो॑षयि॒ष्णुः ।
रा॒यस्पोषे॑ण बहु॒ला भव॑न्तीर्जी॒वा जीव॑न्ती॒रुप॑ वः सदेम ॥६॥

Maya gavo gopatina sachadhvamayam vo goshtha iha poshayishnuh
Rayasposhena bahula bhavantirjiva jivantirupa vah sadema