Sukta 13

13.1

Apah, 1-7 bhriguh, varunah, sindhuh, apah, 2-3 indrah, anushtup, 1 nichrit, 5 virad jagati, 6 nichridaganushtup

यद॒दः सं॑प्रय॒तीरहा॒वन॑दता हते॑।
तस्मा॒दा न॒द्यो॒३ नाम॑ स्थ॒ ता वो॒ नामा॑नि सिन्धवः ॥१॥

Yadadah samprayatirahavanadata hate
Tasmada nadyo3 nama stha ta vo namani sindhavah

यत् प्रेषि॑ता॒ वरु॑णे॒नाच्छीभं॑ स॒मव॑ल्गत ।
तदा॑प्नो॒दिन्द्रो॑ वो य॒तीस्तस्मा॑दापो॒ अनु॑ ष्ठन ॥२॥

Yat preshita varunenachchhibham samavalgata
Tadapnodindro vo yatistasmadapo anu shthana

अ॒प॒का॒मं स्यन्द॑माना॒ अवी॑वरत वो॒ हि क॑म्।
इन्द्रो॑ वः॒ शक्ति॑भिर्देवी॒स्तस्मा॒द् वार्नाम॑ वो हि॒तम् ॥३॥

Apakamam syandamana avivarata vo hi kam
Indro vah shaktibhirdevistasmad varnama vo hitam

एको॑ वो दे॒वोऽप्य॑तिष्ठ॒त् स्यन्द॑माना यथाव॒शम्।
उदा॑निषुर्म॒हीरिति॒ तस्मा॑दुद॒कमु॑च्यते ॥४॥

Eko vo devopyatishthat syandamana yathavasham
Udanishurmahiriti tasmadudakamuchyate

आपो॑ भ॒द्रा घृ॒तमिदाप॑ आसन्न॒ग्नीषोमौ॑ बिभ्र॒त्याप॒ इत् ताः।
ती॒व्रो रसो॑ मधुपृचा॑मरंग॒म आ मा॑ प्रा॒णेन॑ स॒ह वर्च॑सा गमेत् ॥५॥

Apo bhadra ghritamidapa asannagnishomau bibhratyapa it tah
Tivro raso madhuprichamarangama a ma pranena saha varchasa gamet

आदित् प॑श्याम्यु॒त वा॑ शृणो॒म्या मा॒ घोषो॑ गच्छति॒ वाङ् मा॑साम्।
मन्ये॑ भेजा॒नो अ॒मृत॑स्य तर्हि॒ हिर॑ण्यवर्णा॒ अतृ॑पं य॒दा वः॑ ॥६॥

Adit pashyamyuta va shrinomya ma ghosho gachchhati vang masam
Manye bhejano amritasya tarhi hiranyavarna atripam yada vah

इ॒दं व॑ आपो॒ हृद॑यम॒यं व॒त्स ऋ॑तावरीः ।
इ॒हेत्थमेत॑ शक्वरी॒र्यत्रे॒दं वे॒शया॑मि वः ॥७॥

Idam va apo hridayamayam vatsa ritavarih
Ihetthameta shakvariryatredam veshayami vah