Sukta 12

12.1

Shalanirmanam, 1-9 brahma, shala, vastoshpatih, trishtup, 2 virad jagati, 3 brihati, 6 shakvarigarbha jagati, 7 arshi anushtup, 8 bhurik, 9anushtup

इ॒हैव ध्रु॒वां नि मि॑नोमि॒ शालां॒ क्षेमे॑ तिष्ठाति घृ॒तमु॒क्षमा॑णा ।
तां त्वा॑ शाले॒ सर्व॑वीराः सु॒वीरा॒ अरि॑ष्टवीरा॒ उप॒ सं च॑रेम ॥१॥

Ihaiva dhruvam ni minomi shalam ksheme tishthati ghritamukshamana
Tam tva shale sarvavirah suvira arishtavira upa sam charema

12.2

इ॒हैव ध्रु॒वा प्रति॑ तिष्ठ शा॒लेऽश्वा॑वती॒ गोम॑ती सू॒नृता॑वती ।
ऊर्ज॑स्वती घृ॒तव॑ती॒ पय॑स्व॒त्युच्छ्र॑यस्व मह॒ते सौभ॑गाय ॥२॥

Ihaiva dhruva prati tishtha shaleshvavati gomati sunritavati
Urjasvati ghritavati payasvatyuchchhrayasva mahate saubhagaya

12.3

ध॒रु॒ण्य॒ऽसि शाले बृ॒हच्छ॑न्दाः॒ पूति॑धान्या ।
आ त्वा॑ व॒त्सो ग॑मे॒दा कु॑मा॒र आ धे॒नवः॑ सा॒यमा॒स्पन्द॑मानाः ॥३॥

Dharunyasi shale brihachchhandah putidhanya
A tva vatso gameda kumara a dhenavah sayamaspandamanah

12.4

इ॒मां शालां॑ सवि॒ता वा॒युरिन्द्रो॒ बृह॒स्पति॒र्नि मि॑नोतु प्रजा॒नन्।
उ॒क्षन्तू॒द्ना म॒रुतो॑ घृ॒तेन॒ भगो॑ नो॒ राजा॒ नि कृ॒षिं त॑नोतु ॥४॥

Imam shalam savita vayurindro brihaspatirni minotu prajanan
Ukshantudna maruto ghritena bhago no raja ni krishim tanotu

12.5

मान॑स्य पत्नि शरणा स्योना दे॒वी दे॒वेभि॒र्निमिता॒स्यग्रे॑ ।
तृणं॒ वसा॑ना सु॒मना॑ अस॒स्त्वमथा॒स्मभ्यं॑ स॒हवी॑रं र॒यिं दाः॑ ॥५॥

Manasya patni sharana syona devi devebhirnimitasyagre
Trinam vasana sumana asastvamathasmabhyam sahaviram rayim dah

12.6

ऋ॒तेन॑ स्थूणा॒मधि॑ रोह वंशो॒ग्रो वि॒राज॒न्नप॑ वृङ्क्ष्व॒ शत्रू॑न्।
मा ते॑ रिषन्नुपस॒त्तारो॑ गृ॒हाणां॑ शाले श॒तं जी॑वेम श॒रदः॒ सर्व॑वीराः ॥६॥

Ritena sthunamadhi roha vanshogro virajannapa vrinkshva shatrun
Ma te rishannupasattaro grihanam shale shatam jivema sharadah sarvavirah

12.7

एमां कु॑मा॒रस्तरु॑ण॒ आ व॒त्सो जग॑ता स॒ह।
एमां प॑रि॒स्रुतः॑ कु॒म्भ आ द॒ध्नः क॒लशै॑रगुः ॥७॥

Emam kumarastaruna a vatso jagata saha
Emam parisrutah kumbha a dadhnah kalashairaguh

12.8

पू॒र्णं ना॑रि॒ प्र भ॑र कु॒म्भमे॒तं घृ॒तस्य॒ धारा॑म॒मृते॑न॒ संभृ॑ताम्।
इ॒मां पा॒तॄन॒मृते॑ना॒ सम॑ङ्ग्धीष्टापू॒र्तम॒भि र॑क्षात्येनाम् ॥८॥

Purnam nari pra bhara kumbhametam ghritasya dharamamritena sambhritam
Imam patrinamritena samangdhishtapurtamabhi rakshatyenam

12.9

इ॒मा आपः॒ प्र भ॑राम्यय॒क्ष्मा य॑क्ष्म॒नाश॑नीः ।
गृ॒हानुप॒ प्र सी॑दाम्य॒मृते॑न स॒हाग्निना॑ ॥९॥

Ima apah pra bharamyayakshma yakshmanashanih
Grihanupa pra sidamyamritena sahagnina