Sukta 47

47.1

Ratrih, 1-9 gopathah, ratrih, anushtup, 1 pathyabrihati, 2 panchapadanushtubgarbha paratijagati, 6 purastadbrihati, 7 tryavasana shatpada jagati

आ रा॑त्रि॒ पार्थि॑वं॒ रजः॑ पि॒तुर॑प्रायि॒ धाम॑भिः ।
दि॒वः सदां॑सि बृह॒ती वि ति॑ष्ठस॒ आ त्वे॒षं व॑र्तते॒ तमः॑ ॥१॥

A ratri parthivam rajah pituraprayi dhamabhih
Divah sadansi brihati vi tishthasa a tvesham vartate tamah

47.2

न यस्याः॑ पा॒रं ददृ॑शे॒ न योयु॑व॒द् विश्व॑म॒स्यां नि वि॑शते॒ यदेज॑ति ।
अरि॑ष्टासस्त उर्वि तमस्वति॒ रात्रि॑ पा॒रम॑शीमहि॒ भद्रे॑ पा॒रम॑शीमहि ॥२॥

Na yasyah param dadrishe na yoyuvad vishvamasyam ni vishate yadejati
Arishtasasta urvi tamasvati ratri paramashimahi bhadre paramashimahi

47.3

ये ते॑ रात्रि नृ॒चक्ष॑सो द्र॒ष्टारो॑ नव॒तीर्नव॑ ।
अ॒शी॒तिः सन्त्य॒ष्टा उ॒तो ते॑ स॒प्त स॑प्त॒तिः ॥३॥

Ye te ratri nrichakshaso drashtaro navatirnava
Ashitih santyashta uto te sapta saptatih

47.4

ष॒ष्टिश्च॒ षट् च॒ रेवति पञ्चा॒शत् पञ्च॑ सुम्नयि ।
च॒त्वार॑श्चत्वारिं॒शच्च॒ त्रय॑स्त्रिं॒शच्च॑ वाजिनि ॥४॥

Shashtishcha shat cha revati panchashat pancha sumnayi
Chatvarashchatvarinshachcha trayastrinshachcha vajini

47.5

द्वौ च॑ ते विंश॒तिश्च॑ ते॒ रात्र्येका॑दशाव॒माः ।
तेभि॑र्नो अ॒द्य पा॒युभि॒र्नु पा॑हि दुहितर्दिवः ॥५॥

Dvau cha te vinshatishcha te ratryekadashavamah
Tebhirno adya payubhirnu pahi duhitardivah

47.6

रक्षा॒ माकि॑र्नो अ॒धशं॑स ईशत॒ मा नो॑ दुः॒शंस॑ ईशत ।
मा नो॑ अ॒द्य गवां॑ स्ते॒नो मावी॑नां॒ वृक॑ ईशत ॥६॥

Raksha makirno adhashansa ishata ma no duhshansa ishata
Ma no adya gavam steno mavinam vrika ishata

47.7

माश्वा॑नां भद्रे॒ तस्क॑रो॒ मा नृ॒णां या॑तुधा॒न्यः ।
प॒र॒मेभिः॑ प॒थिभिः॑ स्ते॒नो धा॑वतु॒ तस्क॑रः ।
परे॑ण द॒त्वती॒ रज्जुः॒ परे॑णाघा॒युर॑र्षतु ॥७॥

Mashvanam bhadre taskaro ma nrinam yatudhanyah
Paramebhih pathibhih steno dhavatu taskarah
Parena datvati rajjuh parenaghayurarshatu

47.8

अध॑ रात्रि तृ॒ष्टधू॑ममशी॒र्षाण॒महिं॑ कृणु ।
हनू॒ वृक॑स्य ज॒म्भया॒स्तेन॒ तं द्रु॑प॒दे ज॑हि ॥८॥

Adha ratri trishtadhumamashirshanamahim krinu
Hanu vrikasya jambhayastena tam drupade jahi

47.9

त्वयि॑ रात्रि वसामसि स्वपि॒ष्याम॑सि जागृ॒हि।
गोभ्यो॑ नः॒ शर्म॑ य॒च्छाश्वे॑भ्यः॒ पुरु॑षेभ्यः ॥९॥

Tvayi ratri vasamasi svapishyamasi jagrihi
Gobhyo nah sharma yachchhashvebhyah purushebhyah