Sukta 36

36.1

Shatavaro manih, 1-6 brahma, shatavarah, anushtup

श॒तवा॑रो अनीनश॒द् यक्ष्मा॒न् रक्षां॑सि॒ तेज॑सा ।
आ॒रोह॒न् वर्च॑सा स॒ह म॒णिर्दु॑र्णाम॒चात॑नः ॥१॥

Shatavaro aninashad yakshman rakshansi tejasa
Arohan varchasa saha manirdurnamachatanah

36.2

शॄङ्गा॑भ्यां॒ रक्षो॑ नुदते॒ मूले॑न यातुधा॒न्यः ।
मध्ये॑न॒ यक्ष्मं॑ बाधते॒ नैनं॑ पा॒प्माति॑ तत्रति ॥२॥

Shringabhyam raksho nudate mulena yatudhanyah
Madhyena yakshmam badhate nainam papmati tatrati

36.3

ये यक्ष्मा॑सो अर्भ॒का म॒हान्तो॒ ये च॑ श॒ब्दिनः॑ ।
सर्वा॑न् दुर्णाम॒हा म॒णिः श॒तवा॑रो अनीनशत् ॥३॥

Ye yakshmaso arbhaka mahanto ye cha shabdinah
Sarvan durnamaha manih shatavaro aninashat

36.4

श॒तं वी॒रान॑जनयच्छ॒तं यक्ष्मा॒नपा॑वपत्।
दु॒र्णाम्नः॒ सर्वा॑न् ह॒त्वाव॒ रक्षां॑सि धूनुते ॥४॥

Shatam viranajanayachchhatam yakshmanapavapat
Durnamnah sarvan hatvava rakshansi dhunute

36.5

हिर॑ण्यशृङ्ग ऋष॒भः शा॑तवा॒रो अ॒यं म॒णिः ।
दु॒र्णाम्नः॒ सर्वां॑स्तृ॒ड्ढ्वाव॒ रक्षां॑स्यक्रमीत् ॥५॥

Hiranyashringa rishabhah shatavaro ayam manih
Durnamnah sarvanstriddhvava rakshansyakramit

36.6

श॒तम॒हं दु॒र्णाम्नी॑नां गन्धर्वाप्स॒रसां॑ श॒तम्।
श॒तं श॑श्व॒न्वती॑नां श॒तवा॑रेण वारये ॥६॥

Shatamaham durnamninam gandharvapsarasam shatam
Shatam shashvanvatinam shatavarena varaye