Sukta 9

9.1

Vijayaya prarthana, 1-4 atharva, 1 vasavah, indrah, pusha, varunah, mitrah, agnih, adityah, vishvedevah, 2 devah, suryah, agnih, hiranyam, 3-4 agnih (jatavedah), trishtup

अ॒स्मिन् वसु॒ वस॑वो धारय॒न्त्विन्द्रः॑ पू॒षा वरु॑णो मि॒त्रो अ॒ग्निः ।
इ॒ममा॑दि॒त्या उ॒त॒ विश्वे॑ च दे॒वा उत्त॑रस्मि॒न् ज्योति॑षि धारयन्तु ॥१॥

Asmin vasu vasavo dharayantvindrah pusha varuno mitro agnih
Imamaditya uta vishve cha deva uttarasmin jyotishi dharayantu

9.2

अ॒स्य दे॑वाः प्र॒दिशि॒ ज्यो॑तिरस्तु॒ सूर्यो॑ अ॒ग्निरु॒त वा॒ हिर॑ण्यम्।
स॒पत्ना॑ अ॒स्मदध॑रे भवन्तूत्त॒मं नाक॒मधि॑ रोहये॒मम् ॥२॥

Asya devah pradishi jyotirastu suryo agniruta va hiranyam
Sapatna asmadadhare bhavantuttamam nakamadhi rohayemam

9.3

येनेन्द्रा॑य स॒मभ॑रः॒ पयां॑स्युत्त॒मेन॒ ब्रह्म॑णा जातवेदः ।
तेन॒ त्वम॑ग्न इ॒ह व॑र्धये॒मं स॑जा॒तानां॒ श्रैष्ठ्य॒ आ धे॑ह्येनम् ॥३॥

Yenendraya samabharah payansyuttamena brahmana jatavedah
Tena tvamagna iha vardhayemam sajatanam shraishthya a dhehyenam

9.4

ऐषां॑ य॒ज्ञमु॒त वर्चो॑ ददे॒ऽहं रा॒यस्पोष॑मु॒त चि॒त्तान्य॑ग्ने ।
स॒पत्ना॑ अ॒स्मदध॑रे भवन्तूत्त॒मं नाक॒मधि॑ रोहये॒मम् ॥४॥

Aisham yagyamuta varcho dadeham rayasposhamuta chittanyagne
Sapatna asmadadhare bhavantuttamam nakamadhi rohayemam