Sukta 11

11.1

Nari–sukhaprasutih, 1-6 atharva, pusha, aryama, vedhah, dishah, devah, panktih, 2 anushtup, 3 chatushpadoshniggarbha kakummatyanushtup, 4-6 pathyapanktih

वष॑ट् ते पूषन्न॒स्मिन्त्सू॑तावर्य॒मा होता॑ कृणोतु वे॒धाः ।
सिस्र॑तां॒ नार्यृ॒तप्र॑जाता॒ वि पर्वा॑णि जिहतां॒ सूत॒वा उ॑ ॥१॥

Vashat te pushannasmintsutavaryama hota krinotu vedhah
Sisratam naryritaprajata vi parvani jihatam sutava u

11.2

चत॑स्रो दि॒वः प्र॒दिश॒श्चत॑स्रो॒ भूम्या॒ उ॒त।
दे॒वा गर्भं॒ समै॑रय॒न् तं व्यू॑र्णुवन्तु॒ सूत॑वे ॥२॥

Chatasro divah pradishashchatasro bhumya uta
Deva garbham samairayan tam vyurnuvantu sutave

11.3

सू॒षा व्यू॑र्णोतु॒ वि योनिं॑ हापयामसि ।
श्र॒थया॑ सूषणे॒ त्वमव॒ त्वं बि॑ष्कले सृज ॥३॥

Susha vyurnotu vi yonim hapayamasi
Shrathaya sushane tvamava tvam bishkale srija

11.4

नेव॑ मां॒से न पीव॑सि॒ नेव॑ म॒ज्जस्वाह॑तम्।
अवै॑तु॒ पृश्नि॒ शेव॑लं॒ शुने॑ ज॒राय्वत्त॒वेऽव॑ ज॒रायु॑ पद्यताम् ॥४॥

Neva manse na pivasi neva majjasvahatam
Avaitu prishni shevalam shune jarayvattaveva jarayu padyatam

11.5

वि ते॑ भिनद्मि॒ मेह॑नं॒ वि योनिं॒ वि ग॒वीनि॑के ।
वि मा॒तरं॑ च पु॒त्रं च॒ वि कु॑मा॒रं ज॒रायु॒णाव॑ ज॒रायु॑ पद्यताम् ॥५॥

Vi te bhinadmi mehanam vi yonim vi gavinike
Vi mataram cha putram cha vi kumaram jarayunava jarayu padyatam

11.6

यथा॒ वातो॒ यथा॒ मनो॒ यथा॒ पत॑न्ति प॒क्षि॑णः॑ ।
ए॒वा त्वं द॑शमास्य सा॒कं ज॒रायु॑णा प॒ताव॑ ज॒रायु॑ पद्यताम् ॥६॥

Yatha vato yatha mano yatha patanti pakshinah
Eva tvam dashamasya sakam jarayuna patava jarayu padyatam