Sukta 12

12.1

Yakshmanashanam, 1-4 bhrigvangirah, yakshmanashanam, jagati(trishtup), 4 anushtup

ज॒रा॒यु॒जः प्र॑थ॒म उ॒स्रियो॒ वृषा॒ वात॑भ्रजा स्त॒नय॑न्नेति वृ॒ष्ट्या।
स नो॑ मृडाति त॒न्व ऋजु॒गो रु॒जन् य एक॒मोज॑स्त्रे॒धा वि॑चक्र॒मे ॥१॥

Jarayujah prathama usriyo vrisha vatabhraja stanayanneti vrishtya
Sa no mridati tanva rijugo rujan ya ekamojastredha vichakrame

12.2

अङ्गे॑ अङ्गे शो॒चिषा॑ शिश्रिया॒णं न॑म॒स्यन्त॑स्त्वा ह॒विषा॑ विधेम ।
अ॒ङ्कान्त्स॑म॒ङ्कान् ह॒विषा॑ विधेम॒ यो अग्र॑भी॒त् पर्वा॑स्या॒ ग्रभी॑ता ॥२॥

Ange ange shochisha shishriyanam namasyantastva havisha vidhema
Ankantsamankan havisha vidhema yo agrabhit parvasya grabhita

12.3

मु॒ञ्च शी॑र्ष॒क्त्या उ॒त का॒स ए॑नं॒ परु॑ष्परुरावि॒वेशा॒ यो अ॑स्य ।
यो अ॑भ्र॒जा वा॑त॒जा यश्च॒ शुष्मो॒ वन॒स्पती॑न्त्सचतां॒ पर्व॑तांश्च ॥३॥

Muncha shirshaktya uta kasa enam parushparuravivesha yo asya
Yo abhraja vataja yashcha shushmo vanaspatintsachatam parvatanshcha

12.4

शं मे॒ पर॑स्मै॒ गात्रा॑य॒ शम॒स्त्वव॑राय मे ।
शं मे॑ च॒तुर्भ्यो॒ अङ्गे॑भ्यः॒ शम॑स्तु त॒न्वे॒३मम॑ ॥४॥

Sham me parasmai gatraya shamastvavaraya me
Sham me chaturbhyo angebhyah shamastu tanve3mama