Utshovঅধ্যায় 29
29.1
সমিদ্ধো অঞ্জন্ কৃদরং মতীনাং ঘৃতমগ্নে মধুমত্পিন্বমানঃ ।
বাজী বহন্ বাজিনং জাতবেদো দেবানাং বক্ষি প্রিয়মা সধস্থম্ ॥১॥
29.2
ঘৃতেনাঞ্জন্ত্সং পথো দেবয়ানান্ প্রজানন্ বাজ্যপ্যেতু দেবান্ ।
অনু ত্বা সপ্তে প্রদিশঃ সচন্তাং স্বধামস্মৈ যজমানায় ধেহি ॥২॥
29.3
ঈড্যশ্চাসি বন্দ্যশ্চ বাজিন্নাশুশ্চাসি মেধ্যশ্চ সপ্তে ।
অগ্নিষ্ট্বা দেবৈর্বসুভিঃ সজোষাঃ প্রীতং বহ্নিং বহতু জাতবেদাঃ ॥৩॥
29.4
স্তীর্ণং বর্হিঃ সুষ্টরীমা জুষাণোরু পৃথু প্রথমানং পৃথিব্যাম্ ।
দেবেভির্যুক্তমদিতিঃ সজোষাঃ স্যোনং কৃণ্বানা সুবিতে দধাতু ॥৪॥
29.5
এতা উ বঃ সুভগা বিশ্বরূপা বি পক্ষোভিঃ শ্রয়মাণা উদাতৈঃ ।
ঋষ্বাঃ সতীঃ কবষঃ শুম্ভমানা দ্বারো দেবীঃ সুপ্রায়ণা ভবন্তু ॥৫॥
29.6
অন্তরা মিত্রাবরুণা চরন্তী মুখং যজ্ঞানামভি সংবিদানে ।
উষাসা বাং সুহিরণ্যে সুশিল্পে ঋতস্য যোনাবিহ সাদয়ামি ॥৬॥
29.7
প্রথমা বাং সরথিনা সুবর্ণা দেবৌ পশ্যন্তৌ ভুবনানি বিশ্বা ।
অপিপ্রয়ং চোদনা বাং মিমানা হোতারা জ্যোতিঃ প্রদিশা দিশন্তা ॥৭॥
29.8
আদিত্যৈর্নো ভারতী বষ্টু যজ্ঞং সরস্বতী সহ রুদ্রৈর্ন আবীৎ ।
ইডোপহূতা বসুভিঃ সজোষা যজ্ঞং নো দেবীরমৃতেষু ধত্ত ॥৮॥
29.9
ত্বষ্টা বীরং দেবকামং জজান ত্বষ্টুরর্বা জায়ত আশুরশ্বঃ ।
ত্বষ্টেদং বিশ্বং ভুবনং জজান বহোঃ কর্তারমিহ যক্ষি হোতঃ ॥৯॥
29.10
অশ্বো ঘৃতেন ত্মন্যা সমক্ত উপ দেবাঁ২ ঋতুশঃ পাথ এতু ।
বনস্পতির্দেবলোকং প্রজানন্নগ্নিনা হব্যা স্বদিতানি বক্ষৎ ॥১০॥
29.11
প্রজাপতেস্তপসা বাবৃধানঃ সদ্যো জাতো দধিষে যজ্ঞমগ্নে ।
স্বাহাকৃতেন হবিষা পুরোগা যাহি সাধ্যা হবিরদন্তু দেবাঃ ॥১১॥
29.12
যদক্রন্দঃ প্রথমং জায়মান উদ্যন্ত্সমুদ্রাদুত বা পুরীষাৎ ।
শ্যেনস্য পক্ষা হরিণস্য বাহূ উপস্তুত্যং মহি জাতং তে অর্বন্ ॥১২॥
29.13
যমেন দত্তং ত্রিত এনমায়ুনগিন্দ্র এণং প্রথমো অধ্যতিষ্ঠৎ ।
গন্ধর্বো অস্য রশনামগৃভ্ণাৎ সূরাদশ্বং বসবো নিরতষ্ট ॥১৩॥
29.14
অসি যমো অস্যাদিত্যো অর্বন্নসি ত্রিতো গুহ্যেন ব্রতেন ।
অসি সোমেন সময়া বিপৃক্ত আহুস্তে ত্রীণি দিবি বন্ধনানি ॥১৪॥
29.15
ত্রীণি ত আহুর্দিবি বন্ধনানি ত্রীণ্যপ্সু ত্রীণ্যন্তঃ সমুদ্রে ।
উতেব মে বরুণশ্ছন্ত্স্যর্বন্ যত্রা ত আহুঃ পরমং জনিত্রম্ ॥১৫॥
29.16
ইমা তে বাজিন্নবমার্জনানীমা শফানাং সনিতুর্নিধানা ।
অত্রা তে ভদ্রা রশনা অপশ্যমৃতস্য যা অভিরক্ষন্তি গোপাঃ ॥১৬॥
29.17
আত্মানং তে মনসারাদজানামবো দিবা পতয়ন্তং পতঙ্গম্ ।
শিরো অপশ্যং পথিভিঃ সুগেভিররেণুভির্জেহমানং পতত্রি ॥১৭॥
29.18
অত্রা তে রূপমুত্তমমপশ্যং জিগীষমাণমিষ আ পদে গোঃ ।
যদা তে মর্তো অনু ভোগমানডাদিদ্ গ্রসিষ্ঠ ওষধীরজীগঃ ॥১৮॥
29.19
অনু ত্বা রথো অনু মর্যো অর্বন্ননু গাবোঽনু ভগঃ কনীনাম্ ।
অনু ব্রাতাসস্তব সখ্যমীয়ুরনু দেবা মমিরে বীর্যং তে ॥১৯॥
29.20
হিরণ্যশৃঙ্গোঽয়ো অস্য পাদা মনোজবা অবর ইন্দ্র আসীৎ ।
দেবা ইদস্য হবিরদ্যমায়ন্ যো অর্বন্তং প্রথমো অধ্যতিষ্ঠৎ ॥২০॥
29.21
ঈর্মান্তাসঃ সিলিকমধ্যমাসঃ সং শূরণাসো দিব্যাসো অত্যাঃ ।
হসা ইব শ্রেণিশো যতন্তে যদাক্ষিষুর্দিব্যমজ্মমশ্বাঃ ॥২১॥
29.22
তব শরীরং পতয়িষ্ণ্বর্বন্তব চিত্তং বাত ইব ধ্রজীমান্ ।
তব শৃঙ্গাণি বিষ্ঠিতা পুরুত্রারণ্যেষু জর্ভুরাণা চরন্তি ॥২২॥
29.23
উপ প্রাগাচ্ছসনং বাজ্যর্বা দেবদ্রীচা মনসা দীধ্যানঃ ।
অজঃ পুরো নীয়তে নাভিরস্যানু পশ্চাত্কবয়ো যন্তি রেভাঃ ॥২৩॥
29.24
উপ প্রাগাত্পরমং যত্সধস্থমর্বাঁ২ অচ্ছা পিতরং মাতরং চ ।
অদ্যা দেবাঞ্জুষ্টতমো হি গম্যা অথা শাস্তে দাশুষে বার্যাণি ॥২৪॥
29.25
সমিদ্ধো অদ্য মনুষো দুরোণে দেবো দেবান্ যজসি জাতবেদঃ ।
আ চ বহ মিত্রমহশ্চিকিত্বান্ত্বং দূতঃ কবিরসি প্রচেতাঃ ॥২৫॥
29.26
তনূনপাত্পথ ঋতস্য যানান্মধ্বা সমঞ্জন্ত্স্বদয়া সুজিহ্ব ।
মন্মানি ধীভিরুত যজ্ঞমৃন্ধন্ দেবত্রা চ কৃণুহ্যধ্বরং নঃ ॥২৬॥
29.27
নরাশংসস্য মহিমানমেষামুপ স্তোষাম যজতস্য যজ্ঞৈঃ ।
যে সুক্রতবঃ শুচয়ো ধিয়ন্ধাঃ স্বদন্তি দেবা উভয়ানি হব্যা ॥২৭॥
29.28
আজুহ্বান ঈড্যো বন্দ্যশ্চা যাহ্যগ্নে বসুভিঃ সজোষাঃ ।
ত্বং দেবানামসি যহ্ব হোতা স এনান্যক্ষীষিতো যজীয়ান্ ॥২৮॥
29.29
প্রাচীনং বর্হিঃ প্রদিশা পৃথিব্যা বস্তোরস্যা বৃজ্যতে অগ্রে অহ্নাম্ ।
ব্যু প্রথতে বিতরং বরীয়ো দেবেভ্যো অদিতয়ে স্যোনম্ ॥২৯॥
29.30
ব্যচস্বতীরুর্বিয়া বি শ্রয়ন্তাং পতিভ্যো ন জনয়ঃ শুম্ভমানাঃ ।
দেবীর্দ্বারো বৃহতীর্বিশ্বমিন্বা দেবেভ্যো ভবত সুপ্রায়ণাঃ ॥৩০॥
29.31
আ সুষ্বয়ন্তী যজতে উপাকে উষাসানক্তা সদতাং নি যোনৌ ।
দিব্যে যোষণে বৃহতী সুরুক্মে অধি শ্রিয়ং শুক্রপিশং দধানে ॥৩১॥
29.32
দৈব্যা হোতারা প্রথমা সুবাচা মিমানা যজ্ঞং মনুষো যজধ্যৈ ।
প্রচোদয়ন্তা বিদথেষু কারূ প্রাচীনং জ্যোতিঃ প্রদিশা দিশন্তা ॥৩২॥
29.33
আ নো যজ্ঞং ভারতী তূয়মেত্বিডা মনুষ্বদিহ চেতয়ন্তী ।
তিস্রো দেবীর্বর্হিরেদং স্যোনং সরস্বতী স্বপসঃ সদন্তু ॥৩৩॥
29.34
য ইমে দ্যাবাপৃথিবী জনিত্রী রূপৈরপিংশদ্ভুবনানি বিশ্বা ।
তমদ্য হোতরিষিতো যজীয়ান্ দেবং ত্বষ্টারমিহ যক্ষি বিদ্বান্ ॥৩৪॥
29.35
উপাবসৃজ ত্মন্যা সমঞ্জন্ দেবানাং পাথ ঋতুথা হবীংষি ।
বনস্পতিঃ শমিতা দেবো অগ্নিঃ স্বদন্তু হব্যং মধুনা ঘৃতেন ॥৩৫॥
29.36
সদ্যো জাতো ব্যমিমীত যজ্ঞমগ্নির্দেবানামভবৎ পুরোগাঃ ।
অস্য হোতুঃ প্রদিশ্যৃতস্য বাচি স্বাহাকৃতং হবিরদন্তু দেবাঃ ॥৩৬॥
29.37
কেতুং কৃণ্বন্নকেতবে পেশো মর্যা অপেশসে ।
সমুষদ্ভিরজায়থাঃ ॥৩৭॥
29.38
জীমূতস্যেব ভবতি প্রতীকং যদ্বর্মী যাতি সমদামুপস্থে ।
অনাবিদ্ধয়া তন্বা জয় ত্বং স ত্বা বর্মণো মহিমা পিপর্তু ॥৩৮॥
29.39
ধন্বনা গা ধন্বনাঽঽজিং জয়েম ধন্বনা তীব্রাঃ সমদো জয়েম ।
ধনুঃ শত্রোরপকামং কৃণোতি ধন্বনা সর্বাঃ প্রদিশো জয়েম ॥৩৯॥
29.40
বক্ষ্যন্তীবেদা গনীগন্তি কর্ণং প্রিয়ং সখায়ং পরিষস্বজানা ।
যোষেব শিঙ্ক্তে বিততাধি ধন্বঞ্জ্যা ইয়ং সমনে পারয়ন্তী ॥৪০॥
29.41
তে আচরন্তী সমনেব যোষা মাতেব পুত্রং বিভৃতামুপস্থে ।
অপ শত্রূন্ বিধ্যতাং সংবিদানে আর্ত্নী ইমে বিষ্ফুরন্তী অমিত্রান্ ॥৪১॥
29.42
বহ্বীনাং পিতা বহুরস্য পুত্রশ্চিশ্চা কৃণোতি সমনাবগত্য ।
ইষুধিঃ সঙ্কা পৃতনাশ্চ সর্বাঃ পৃষ্ঠে নিনদ্ধো জয়তি প্রসূতঃ ॥৪২॥
29.43
রথে তিষ্ঠন্ নয়তি বাজিনঃ পুরো যত্র-যত্র কাময়তে সুষারথিঃ ।
অভীশূনাং মহিমানং পনায়ত মনঃ পশ্চাদনু যচ্ছন্তি রশ্ময়ঃ ॥৪৩॥
29.44
তীব্রান্ ঘোষান্ কৃণ্বতে বৃষপাণয়োঽশ্বা রথেভিঃ সহ বাজয়ন্তঃ ।
অবক্রামন্তঃ প্রপদৈরমিত্রান্ ক্ষিণন্তি শত্রূঁ১ রনপব্যয়ন্তঃ ॥৪৪॥
29.45
রথবাহণং হবিরস্য নাম যত্রায়ুধং নিহিতমস্য বর্ম ।
তত্রা রথমুপ শগ্মং সদেম বিশ্বাহা বয়ং সুমনস্যমানাঃ ॥৪৫॥
29.46
স্বাদুষংসদঃ পিতরো বয়োধাঃ কৃচ্ছ্রেশ্রিতঃ শক্তীবন্তো গভীরাঃ ।
চিত্রসেনা ইষুবলা অমৃধ্রাঃ সতোবীরা উরবো ব্রাতসাহাঃ ॥৪৬॥
29.47
ব্রাহ্মণাসঃ পিতরঃ সোম্যাসঃ শিবে নো দ্যাবাপৃথিবী অনেহসা ।
পূষা নঃ পাতু দুরিতাদৃতাবৃধো রক্ষা মাকির্নো অঘশংস ঈশত ॥৪৭॥
29.48
সুপর্ণং বস্তে মৃগো অস্যা দন্তো গোভিঃ সন্নদ্ধা পততি প্রসূতা ।
যত্রা নরঃ সং চ বি চ দ্রবন্তি তত্রাস্মভ্যমিষবঃ শর্ম যংসন্ ॥৪৮॥
29.49
ঋজীতে পরি বৃঙ্ধি নোঽশ্মা ভবতু নস্তনূঃ ।
সোমো অধি ব্রবীতু নোঽদিতিঃ শর্ম যচ্ছতু ॥৪৯॥
29.50
আ জঙ্ঘন্তি সান্বেষাং জঘনাঁ২ উপ জিঘ্নতে ।
অশ্বাজনি প্রচেতসোঽশ্বান্ত্সমত্সু চোদয় ॥৫০॥
29.51
অহিরিব ভোগৈঃ পর্যেতি বাহুং জ্যায়া হেতিং পরিবাধমানঃ ।
হস্তঘ্নো বিশ্বা বয়ুনানি বিদ্বান্ পুমান্ পুমাংসং পরি পাতু বিশ্বতঃ ॥৫১॥
29.52
বনস্পতে বীড্বঙ্গো হি ভূয়া অস্মত্সখা প্রতরণঃ সুবীরঃ ।
গোভিঃ সন্নদ্ধো অসি বীডয়স্বাস্থাতা তে জয়তু জেত্বানি ॥৫২॥
29.53
দিবঃ পৃথিব্যাঃ পর্যোজ উদ্ভৃতং বনস্পতিভ্যঃ পর্যাভৃতং সহঃ ।
অপামোজ্মানং পরি গোভিরাবৃতমিন্দ্রস্য বজ্রং হবিষা রথং যজ ॥৫৩॥
29.54
ইন্দ্রস্য বজ্রো মরুতামনীকং মিত্রস্য গর্ভো বরুণস্য নাভিঃ ।
সেমাং নো হব্যদাতিং জুষাণো দেব রথ প্রতি হব্যা গৃভায় ॥৫৪॥
29.55
উপ শ্বাসয় পৃথিবীমুত দ্যাং পুরুত্রা তে মনুতাং বিষ্ঠিতং জগৎ ।
স দুন্দুভে সজূরিন্দ্রেণ দেবৈর্দূরাদ্দবীয়ো অপ সেধ শত্রূন্ ॥৫৫॥
29.56
আ ক্রন্দয় বলমোজো ন আধা নিষ্টনিহি দুরিতা বাধমানঃ ।
অপ প্রোথ দুন্দুভে দুচ্ছুনা ইত ইন্দ্রস্য মুষ্টিরসি বীডয়স্ব ॥৫৬॥
29.57
আমূরজ প্রত্যাবর্তয়েমাঃ কেতুমদ্দুন্দুভির্বাবদীতি ।
সমশ্বপর্ণাশ্চরন্তি নো নরোঽস্মাকমিন্দ্র রথিনো জয়ন্তু ॥৫৭॥
29.58
আগ্নেয়ঃ কৃষ্ণগ্রীবঃ সারস্বতী মেষী বভ্রুঃ সৌম্যঃ পৌষ্ণঃ শ্যামঃ শিতিপৃষ্ঠো বার্হস্পত্যঃ শিল্পো বৈশ্বদেব ঐন্দ্রোঽরুণো মারুতঃ কল্মাষ ঐন্দ্রাগ্নঃ সংহিতোঽধোরামঃ সাবিত্রো বারুণঃ কৃষ্ণ একশিতিপাত্পেত্বঃ ॥৫৮॥
29.59
অগ্নয়েঽনীকবতে রোহিতাঞ্জিরনড্বানধোরামৌ সাবিত্রৌ পৌষ্ণৌ রজতনাভী বৈশ্বদেবৌ পিশঙ্গৌ তূপরৌ মারুতঃ কল্মাষ আগ্নেয়ঃ কৃষ্ণোঽজঃ সারস্বতী মেষী বারুণঃ পেত্বঃ ॥৫৯॥
29.60
অগ্নয়ে গায়ত্রায় ত্রিবৃতে রাথন্তরায়াষ্টাকপাল ইন্দ্রায় ত্রৈষ্টুভায় পঞ্চদশায় বার্হতায়ৈকাদশকপালো বিশ্বেভ্যো দেবেভ্যো জাগতেভ্যঃ সপ্তদশেভ্যো বৈরূপেভ্যো দ্বাদশকপালো মিত্রাবরুণাভ্যামানুষ্টুভাভ্যামেকবিংশাভ্যাং বৈরাজাভ্যাং পয়স্যা বৃহস্পতয়ে পাঙ্ক্তায় ত্রিণবায় শাক্বরায় চরুঃ সবিত্র ঔষ্ণিহায় ত্রয়স্ত্রিংশায় রৈবতায় দ্বাদশকপালঃ প্রাজাপত্যশ্চরুরদিত্যৈ বিষ্ণুপত্ন্যৈ চরুরগ্নয়ে বৈশ্বানরায় দ্বাদশকপালোঽনুমত্যা অষ্টাকপালঃ ॥৬০॥