অধ্যায় 13

13.1

ময়ি গৃহ্ণাম্যগ্রে অগ্নিং রায়স্পোষায় সুপ্রজাস্ত্বায় সুবীর্যায় । মামু দেবতাঃ সচন্তাম্ ॥১॥

13.2

অপাং পৃষ্ঠমসি যোনিরগ্নেঃ সমুদ্রমভিতঃ পিন্বমানম্ ।
বর্ধমানো মহাঁ২ আ চ পুষ্করে দিবো মাত্রয়া বরিম্ণা প্রথস্ব ॥২॥

13.3

ব্রহ্ম জজ্ঞানং প্রথমং পুরস্তাদ্বি সীমতঃ সুরুচো বেন আবঃ ।
স বুধ্ন্যা উপমা অস্য বিষ্ঠাঃ সতশ্চ যোনিমসতশ্চ বি বঃ ॥৩॥

13.4

হিরণ্যগর্ভঃ সমবর্ততাগ্রে ভূতস্য জাতঃ পতিরেক আসীৎ ।
স দাধার পৃথিবীং দ্যামুতেমাং কস্মৈ দেবায় হবিষা বিধেম ॥৪॥

13.5

দ্রপ্সশ্চস্কন্দ পৃথিবীমনু দ্যামিমং চ যোনিমনু যশ্চ পূর্বঃ ।
সমানং যোনিমনু সঞ্চরন্তং দ্রপ্সং জুহোম্যনু সপ্ত হোত্রাঃ ॥৫॥

13.6

নমোঽস্তু সর্পেভ্যো যে কে চ পৃথিবীমনু । যে অন্তরিক্ষে যে দিবি তেভ্যঃ সর্পেভ্যো নমঃ ॥৬॥

13.7

যা ইষবো যাতুধানানাং যে বা বনস্পতীঁ১ রনু । যে বাবটেষু শেরতে তেভ্যঃ সর্পেভ্যো নমঃ ॥৭॥

13.8

যে বামী রোচনে দিবো যে বা সূর্যস্য রশ্মিষু । যেষামপ্সু সদস্কৃতং তেভ্যঃ সর্পেভ্যো নমঃ ॥৮॥

13.9

কৃণুষ্ব পাজঃ প্রসিতিং ন পৃথ্বীং যাহি রাজেবামবাঁ২ ইভেন ।
তৃষ্বীমনু প্রসিতিং দ্রূণানোঽস্তাসি বিধ্য রক্ষসস্তপিষ্ঠৈঃ ॥৯॥

13.10

তব ভ্রমাস আশুয়া পতন্ত্যনুস্পৃশ ধৃষতা শোশুচানঃ ।
তপূংষ্যগ্নে জুহ্বা পতঙ্গানসন্দিতো বি সৃজ বিষ্বগুল্কাঃ ॥১০॥

13.11

প্রতি স্পশো বি সৃজ তূর্ণিতমো ভবা পায়ুর্বিশো অস্যা অদব্ধঃ ।
যো নো দূরে অঘশংসো যো অন্ত্যগ্নে মা কিষ্টে ব্যথিরা দধর্ষীৎ ॥১১॥

13.12

উদগ্নে তিষ্ঠ প্রত্যা তনুষ্ব ন্যমিত্রাঁ২ ওষতাত্তিগ্মহেতে ।
যো নো অরাতিং সমিধান চক্রে নীচা তং ধক্ষ্যতসং ন শুষ্কম্ ॥১২॥

13.13

ঊর্ধ্বো ভব প্রতি বিধ্যাধ্যস্মদাবিষ্কৃণুষ্ব দৈব্যান্যগ্নে ।
অব স্থিরা তনুহি যাতুজূনাং জামিমজামিং প্র মৃণীহি শত্রূন্ ।
অগ্নেষ্ট্বা তেজসা সাদয়ামি ॥১৩॥

13.14

অগ্নির্মূর্ধা দিবঃ ককুত্পতিঃ পৃথিব্যা অয়ম্ । অপাং রেতাংসি জিন্বতি ।
ইন্দ্রস্য ত্বৌজসা সাদয়ামি ॥১৪॥

13.15

ভুবো যজ্ঞস্য রজসশ্চ নেতা যত্রা নিয়ুদ্ভিঃ সচসে শিবাভিঃ ।
দিবি মূর্ধানং দধিষে স্বর্ষাং জিহ্বামগ্নে চকৃষে হব্যবাহম্ ॥১৫॥

13.16

ধ্রুবাঽসি ধরুণাঽঽস্তৃতা বিশ্বকর্মণা ।
মা ত্বা সমুদ্র উদ্বধীন্মা সুপর্ণোঽব্যথমানা পৃথিবীং দৃংহ ॥১৬॥

13.17

প্রজাপতিষ্ট্বা সাদয়ত্বপাং পৃষ্ঠে সমুদ্রস্যেমন্ । ব্যচস্বতীং প্রথস্বতীং প্রথস্ব পৃথিব্যসি ॥১৭॥

13.18

ভূরসি ভূমিরস্যদিতিরসি বিশ্বধায়া বিশ্বস্য ভুবনস্য ধর্ত্রী ।
পৃথিবীং যচ্ছ পৃথিবীং দৃংহ পৃথিবীং মা হিংসীঃ ॥১৮॥

13.19

বিশ্বস্মৈ প্রাণায়াপানায় ব্যানায়োদানায় প্রতিষ্ঠায়ৈ চরিত্রায় ।
অগ্নিষ্ট্বাঽভি পাতু মহ্যা স্বস্ত্যা ছর্দিষা শন্তমেন তয়া দেবতয়াঽঙ্গিরস্বদ্ ধ্রুবা সীদ ॥১৯॥

13.20

কাণ্ডাত্কাণ্ডাত্প্ররোহন্তী পরুষঃ পরুষস্পরি । এবা নো দূর্বে প্র তনু সহস্রেণ শতেন চ ॥২০॥

13.21

যা শতেন প্রতনোষি সহস্রেণ বিরোহসি । তস্যাস্তে দেবীষ্টকে বিধেম হবিষা বয়ম্ ॥২১॥

13.22

যাস্তে অগ্নে সূর্যে রুচো দিবমাতন্বন্তি রশ্মিভিঃ । তাভির্নো অদ্য সর্বাভী রুচে জনায় নস্কৃধি ॥২২॥

13.23

যা বো দেবাঃ সূর্যে রুচো গোষ্বশ্বেষু যা রুচঃ । ইন্দ্রাগ্নী তাভিঃ সর্বাভী রুচং নো ধত্ত বৃহস্পতে ॥২৩॥

বিরাড্জ্যোতিরধারয়ত্স্বরাড্জ্যোতিরধারয়ৎ । প্রজাপতিষ্ট্বা সাদয়তু পৃষ্ঠে পৃথিব্যা জ্যোতিষ্মতীম্ । বিশ্বস্মৈ প্রাণায়াপানায় ব্যানায় বিশ্বং জ্যোতির্যচ্ছ । অগ্নিষ্টেঽধিপতিস্তয়া দেবতয়াঽঙ্গিরস্বদ্ ধ্রুবা সীদ ॥২৪॥

13.25

মধুশ্চ মাধবশ্চ বাসন্তিকাবৃতূ অগ্নেরন্তঃ শ্লেষোঽসি কল্পেতাং দ্যাবাপৃথিবী কল্পন্তামাপ ওষধয়ঃ কল্পন্তামগ্নয়ঃ পৃথঙ্নম জ্যৈষ্ঠ্যায় সব্রতাঃ । যে অগ্নয়ঃ সমনসোঽন্তরা দ্যাবাপৃথিবী ইমে |
বাসন্তিকাবৃতূ অভিকল্পমানা ইন্দ্রমিব দেবা অভিসংবিশন্তু তয়া দেবতয়াঽঙ্গিরস্বদ্ ধ্রুবে সীদতম্ ॥২৫॥

13.26

অষাঢাঽসি সহমানা সহস্বারাতীঃ সহস্ব পৃতনায়তঃ ।
সহস্রবীর্যাঽসি সা মা জিন্ব ॥২৬॥

13.27

মধু বাতা ঋতায়তে মধু ক্ষরন্তি সিন্ধবঃ ।
মাধ্বীর্নঃ সন্ত্বোষধীঃ ॥২৭॥

13.28

মধু নক্তমুতোষসো মধুমত্পার্থিবং রজঃ । মধু দ্যৌরস্তু নঃ পিতা ॥২৮॥

13.29

মধুমান্নো বনস্পতির্মধুমাঁ২ অস্তু সূর্যঃ । মাধ্বীর্গাবো ভবন্তু নঃ ॥২৯॥

13.30

অপাং গম্ভন্ত্সীদ মা ত্বা সূর্যোঽভি তাপ্সীন্মাঽগ্নির্বৈশ্বানরঃ ।
অচ্ছিন্নপত্রাঃ প্রজা অনুবীক্ষস্বানু ত্বা দিব্যা বৃষ্টিঃ সচতাম্ ॥৩০॥

13.31

ত্রীন্ত্সমুদ্রান্ত্সমসৃপৎ স্বর্গানপাং পতির্বৃষভ ইষ্টকানাম্ ।
পুরীষং বসানঃ সুকৃতস্য লোকে তত্র গচ্ছ যত্র পূর্বে পরেতাঃ ॥৩১॥

13.32

মহী দ্যৌঃ পৃথিবী চ ন ইমং যজ্ঞং মিমিক্ষতাম্ । পিপৃতাং নো ভরীমভিঃ ॥৩২॥

13.33

বিষ্ণোঃ কর্মাণি পশ্যত যতো ব্রতানি পস্পশে । ইন্দ্রস্য যুজ্যঃ সখা ॥৩৩॥

13.34

ধ্রুবাঽসি ধরুণেতো জজ্ঞে প্রথমমেভ্যো যোনিভ্যো অধি জাতবেদাঃ ।
স গায়ত্র্যা ত্রিষ্টুভাঽনুষ্টুভা চ দেবেভ্যো হব্যং বহতু প্রজানন্ ॥৩৪॥

13.35

ইষে রায়ে রমস্ব সহসে দ্যুম্ন ঊর্জে অপত্যায় । সম্রাডসি স্বরাডসি সারস্বতৌ ত্বোত্সৌ প্রাবতাম্ ॥৩৫॥

13.36

অগ্নে যুক্ষ্বা হি যে তবাশ্বাসো দেব সাধবঃ । অরং বহন্তি মন্যবে ॥৩৬॥

13.37

যুক্ষ্বা হি দেবহূতমাঁ২ অশ্বাঁ২ অগ্নে রথীরিব । নি হোতা পূর্ব্যঃ সদঃ ॥৩৭॥

13.38

সম্যক্ স্রবন্তি সরিতো ন ধেনা অন্তর্হৃদা মনসা পূয়মানাঃ ।
ঘৃতস্য ধারা অভি চাকশীমি হিরণ্যয়ো বেতসো মধ্যে অগ্নেঃ ॥৩৮॥

13.39

ঋচে ত্বা রুচে ত্বা ভাসে ত্বা জ্যোতিষে ত্বা ।
অভূদিদং বিশ্বস্য ভুবনস্য বাজিনমগ্নের্বৈশ্বানরস্য চ ॥৩৯॥

13.40

অগ্নির্জ্যোতিষা জ্যোতিষ্মান্ রুক্মো বর্চসা বর্চস্বান্ । সহস্রদা অসি সহস্রায় ত্বা ॥৪০॥

13.41

আদিত্যং গর্ভং পয়সা সমঙ্ধি সহস্রস্য প্রতিমাং বিশ্বরূপম্ ।
পরি বৃঙ্ধি হরসা মাঽভি মংস্থাঃ শতায়ুষং কৃণুহি চীয়মানঃ ॥৪১॥

13.42

বাতস্য জূতিং বরুণস্য নাভিমশ্বং জজ্ঞানং সরিরস্য মধ্যে ।
শিশুং নদীনাং হরিমদ্রিবুধ্নমগ্নে মা হিংসীঃ পরমে ব্যোমন্ ॥৪২॥

13.43

অজস্রমিন্দুমরুষং ভুরণ্যুমগ্নিমীডে পূর্বচিত্তিং নমোভিঃ ।
স পর্বভিরৃতুশঃ কল্পমানো গাং মা হিংসীরদিতিং বিরাজম্ ॥৪৩॥

13.44

বরূত্রীং ত্বষ্টুর্বরুণস্য নাভিমবিং জজ্ঞানাং রজসঃ পরস্মাৎ ।
মহীং সাহস্রীমসুরস্য মায়ামগ্নে মা হিংসীঃ পরমে ব্যোমন্ ॥৪৪॥

13.45

যো অগ্নিরগ্নেরধ্যজায়ত শোকাত্পৃথিব্যা উত বা দিবস্পরি ।
যেন প্রজা বিশ্বকর্মা জজান তমগ্নে হেডঃ পরি তে বৃণক্তু ॥৪৫॥

13.46

চিত্রং দেবানামুদগাদনীকং চক্ষুর্মিত্রস্য বরুণস্যাগ্নেঃ ।
আঽপ্রা দ্যাবাপৃথিবী অন্তরিক্ষং সূর্য আত্মা জগতস্তস্থুষশ্চ ॥৪৬॥

13.47

ইমং মা হিংসীর্দ্বিপাদং পশুং সহস্রাক্ষো মেধায় চীয়মানঃ ।
ময়ুং পশুং মেধমগ্নে জুষস্ব তেন চিন্বানস্তন্বো নি ষীদ ।
ময়ুং তে শুগৃচ্ছতু যং দ্বিষ্মস্তং তে শুগৃচ্ছতু ॥৪৭॥

13.48

ইমং মা হিংসীরেকশফং পশুং কনিক্রদং বাজিনং বাজিনেষু ।
গৌরমারণ্যমনু তে দিশামি তেন চিন্বানস্তন্বো নি ষীদ ।
গৌরং তে শুগৃচ্ছতু যং দ্বিষ্মস্তং তে শুগৃচ্ছতু ॥৪৮॥

13.49

ইমং সাহস্রং শতধারমুত্সং ব্যচ্যমানং সরিরস্য মধ্যে ।
ঘৃতং দুহানামদিতিং জনায়াগ্নে মা হিংসীঃ পরমে ব্যোমন্ ।
গবয়মারণ্যমনু তে দিশামি তেন চিন্বানস্তন্বো নি ষীদ ।
গবয়ং তে শুগৃচ্ছতু যং দ্বিষ্মস্তং তে শুগৃচ্ছতু ॥৪৯॥

13.50

ইমমূর্ণায়ুং বরুণস্য নাভিং ত্বচং পশূনাং দ্বিপদাং চতুষ্পদাম্ ।
ত্বষ্টুঃ প্রজানাং প্রথমং জনিত্রমগ্নে মা হিংসীঃ পরমে ব্যোমন্ ।
উষ্ট্রমারণ্যমনু তে দিশামি তেন চিন্বানস্তবো নি ষীদ ।
উষ্ট্রং তে শুগৃচ্ছতু যং দ্বিষ্মস্তং তে শুগৃচ্ছতু ॥৫০॥

13.51

অজো হ্যগ্নেরজনিষ্ট শোকাত্সো অপশ্যজ্জনিতারমগ্রে ।
তেন দেবা দেবতামগ্রমায়ঁস্তেন রোহমায়ন্নুপ মেধ্যাসঃ ।
শরভমারণ্যমনু তে দিশামি তেন চিন্বানস্তন্বো নি ষীদ ।
শরভং তে শুগৃচ্ছতু যং দ্বিষ্মস্তং তে শুগৃচ্ছতু ॥৫১॥

13.52

ত্বং যবিষ্ঠ দাশুষো নৄঁঃ পাহি শৃণুধী গিরঃ । রক্ষা তোকমুত ত্মনা ॥৫২॥

13.53

অপাং ত্বেমন্ত্সাদয়াম্যপাং ত্বোদ্মন্ত্সাদয়াম্যপাং ত্বা ভস্মন্ত্সাদয়াম্যপাং ত্বা জ্যোতিষি সাদয়াম্যপাং ত্বাঽয়নে সাদয়াম্যর্ণবে ত্বা সদনে সাদয়ামি সমুদ্রে ত্বা সদনে সাদয়ামি সরিরে ত্বা সদনে সাদয়াম্যপাং ত্বা ক্ষয়ে সাদয়াম্যপাং ত্বা সধিষি সাদয়াম্যপাং ত্বা সদনে সাদয়াম্যপাং ত্বা সধস্থে সাদয়াম্যপাং ত্বা যোনৌ সাদয়াম্যপাং ত্বা পুরীষে সাদয়াম্যপাং ত্বা পাথসি সাদয়ামি
গায়ত্রেণ ত্বা ছন্দসা সাদয়ামি ত্রৈষ্টুভেন ত্বা ছন্দসা সাদয়ামি জাগতেন ত্বা ছন্দসা সাদয়াম্যানুষ্টুভেন ত্বা ছন্দসা সাদয়ামি
পাঙ্ক্তেন ত্বা ছন্দসা সাদয়ামি ॥৫৩॥