অধ্যায় 40

40.1

অথ চত্বারিংশোঽধ্যায়ঃ।

ঈশা বাস্যমিদং সর্বং যত্কিং চ জগত্যাং জগৎ ।
তেন ত্যক্তেন ভুঞ্জীথা মা গৃধঃ কস্য স্বিদ্ধনম্ ॥১॥

কুর্বন্নেবেহ কর্মাণি জিজীবিষেচ্ছতং সমাঃ ।
এবং ত্বয়ি নান্যথেতোঽস্তি ন কর্ম লিপ্যতে নরে ॥২॥

অসুর্যা নাম তে লোকা অন্ধেন তমসাবৃতাঃ ।
তাংস্তে প্রেত্যাভিগচ্ছন্তি যে কে চাত্মহনো জনাঃ ॥৩॥

অনেজদেকং মনসো জবীয়ো নৈনদ্দেবা আপ্নুবন্পূর্বমর্শৎ ।
তদ্ধাবতোঽন্যানত্যেতি তিষ্ঠত্তস্মিন্নপো মাতরিশ্বা দধাতি ॥৪॥

তদেজতি তন্নৈজতি তদ্দূরে তদ্বন্তিকে ।
তদন্তরস্য সর্বস্য তদু সর্বস্যাস্য বাহ্যতঃ ॥৫॥

যস্তু সর্বাণি ভূতান্যাত্মন্নেবানুপশ্যতি ।
সর্বভূতেষু চাত্মানং ততো ন বি জুগুপ্সতে ॥৬॥

যস্মিন্ত্সর্বাণি ভূতান্যাত্মৈবাভূদ্বিজানতঃ ।
তত্র কো মোহঃ কঃ শোক একত্বমনুপশ্যতঃ ॥৭॥

স পর্যগাচ্ছুক্রমকায়মব্রণমস্নাবিরং শুদ্ধমপাপবিদ্ধম্ ।
কবির্মনীষী পরিভূঃ স্বয়ংভূর্যাথাতথ্যতোঽর্থান্ব্যদ ধাচ্ছাশ্বতী ভ্যঃ সমাভ্যঃ ॥৮॥

অন্ধং তমঃ প্র বিশন্তি যেঽবিদ্যামুপাসতে ।
ততো ভূয় ইব তে তমো য উ বিদ্যায়াং রতাঃ ॥৯॥

অন্যদেবাহুর্বিদ্যয়ান্যদাহুরবিদ্যায়া ।
ইতি শুশ্রুম ধীরাণাং যে নস্তদ্বিচচক্ষিরে ॥১০॥

বিদ্যাং চাবিদ্যাং চ যস্তদ্বেদোভয়ং সহ ।
অবিদ্যয়া মৃত্যুং তীর্ত্বা বিদ্যয়ামৃতমশ্নুতে ॥১১॥

অন্ধং তমঃ প্রবিশন্তি যেঽসংভূতিমুপাসতে ।
ততো ভূয় ইব তে তমো য উ সংভূত্যাং রতাঃ ॥১২॥

অন্যদেবাহুঃ সংভবাদন্যদাহুরসংভবাৎ ।
ইতি শুশ্রুম ধীরাণাং যে নস্তদ্বিচচক্ষিরে ॥১৩॥

সংভূতিং চ বিনাশং চ যস্তদ্বেদোভয়ং সহ ।
বিনাশেন মৃত্যুং তীর্ত্বা সংভূত্যামৃতমশ্নুতে ॥১৪॥

হিরণ্ময়েন পাত্রেণ সত্যস্যাপিহিতং মুখম্ ।
তত্ত্বং পূষন্নপাবৃণু সত্যধর্মায় দৃষ্টয়ে ॥১৫॥

তেজো যত্তে রূপে কল্যাণতমং তত্তে পশ্যামি ।
যোঽসাবসৌ পুরুষঃ সোঽহমস্মি ॥১৬॥

বায়ুরনিলমমৃতমথেদং ভস্মান্তং শরীরম্ ।
ওম্৩ ক্রতো স্মর কৃতং স্মর ক্রতো স্মর কৃতং স্মর ॥১৭॥

অগ্নে নয় সুপথা রায়ে অস্মান্বিশ্বানি দেব বয়ুনানি বিদ্বান্ ।
যুয়োধ্যস্মজ্জুহুরাণমেনো ভূয়িষ্ঠাং তে নম উক্তিং বিধেম ॥১৮॥

(১) ১৮ (২০৮৬)
॥ইতি শুক্লয়জুঃকাণ্বসংহিতায়াং চত্বারিংশোঽধ্যায়ঃ ॥৪॥

০॥
॥ ইতি শুক্লয়জুঃ কাণ্বসংহিতা সমাপ্তা।