Adhyaya 40

40.1

Atha chatvarinshodhyayah

ई॒शा वा॒स्य॑मि॒दᳪ सर्वं॒ यत्किं च॒ जग॑त्यां॒ जग॑त् ।
तेन॑ त्य॒क्तेन॑ भुञ्जीथा॒ मा गृ॑धः॒ कस्य॑ स्वि॒द्धन॑म् ॥१॥

Isha vasyamidam sarvam yatkim cha jagatyam jagat
Tena tyaktena bhunjitha ma gridhah kasya sviddhanam

40.2

कु॒र्वन्ने॒वेह कर्मा॑णि जिजीवि॒षेच्छ॒तᳪ समाः॑ ।
ए॒वं त्वयि॒ नान्यथे॒तो॑ऽस्ति॒ न कर्म॑ लिप्यते॒ नरे॑ ॥२॥

Kurvanneveha karmani jijivishechchhatam samah
Evam tvayi nanyathetosti na karma lipyate nare

40.3

अ॒सु॒र्या॒ नाम॑ ते लो॒का अ॒न्धेन॒ तम॒सावृ॑ताः ।
ताᳪस्ते प्रेत्या॒भिग॑च्छन्ति॒ ये के चा॑त्म॒हनो॒ जनाः॑ ॥३॥

Asurya nama te loka andhena tamasavritah
Tanste pretyabhigachchhanti ye ke chatmahano janah

40.4

अने॑ज॒देकं॒ मन॑सो॒ जवी॑यो॒ नैन॑द्दे॒वा आ॑प्नुव॒न्पूर्व॒मर्श॑त् ।
तद्धाव॑तो॒ऽन्यानत्ये॑ति॒ तिष्ठ॒त्तस्मि॑न्न॒पो मा॑त॒रिश्वा॑ दधाति ॥४॥

Anejadekam manaso javiyo nainaddeva apnuvanpurvamarshat
Taddhavatonyanatyeti tishthattasminnapo matarishva dadhati

40.5

तदे॑जति॒ तन्नै॑जति॒ तद्दू॒रे तद्व॑न्ति॒के ।
तद॒न्तर॑स्य॒ सर्व॑स्य॒ तदु॒ सर्व॑स्यास्य बाह्य॒तः ॥५॥

Tadejati tannaijati taddure tadvantike
Tadantarasya sarvasya tadu sarvasyasya bahyatah

40.6

यस्तु सर्वा॑णि भू॒तान्या॒त्मन्ने॒वानु॒पश्य॑ति ।
स॒र्व॒भू॒तेषु॑ चा॒त्मानं॒ ततो॒ न वि जु॑गुप्सते ॥६॥

Yastu sarvani bhutanyatmannevanupashyati
Sarvabhuteshu chatmanam tato na vi jugupsate

40.7

यस्मि॒न्त्सर्वा॑णि भू॒तान्या॒त्मैवाभू॑द्विजान॒तः ।
तत्र॒ को मोहः॒ कः शोक॑ एक॒त्वम॑नु॒पश्य॑तः ॥७॥

Yasmintsarvani bhutanyatmaivabhudvijanatah
Tatra ko mohah kah shoka ekatvamanupashyatah

40.8

स पर्य॑गाच्छु॒क्रम॑का॒यम॑व्र॒णम॑स्नावि॒रᳪ शु॒द्धमपा॑पविद्धम् ।
क॒विर्म॑नी॒षी प॑रि॒भूः स्व॑यं॒भूर्या॑थातथ्य॒तोऽर्था॒न्व्य॑द धाच्छाश्व॒ती भ्यः॒ समा॑भ्यः ॥८॥

Sa paryagachchhukramakayamavranamasnaviram shuddhamapapaviddham
Kavirmanishi paribhuh svayambhuryathatathyatorthanvyada dhachchhashvati bhyah samabhyah

40.9

अ॒न्धं तमः॒ प्र वि॑शन्ति॒ येऽवि॑द्यामु॒पास॑ते ।
ततो॒ भूय॑ इव॒ ते तमो॒ य उ॑ वि॒द्याया॑ᳪ र॒ताः ॥९॥

Andham tamah pra vishanti yevidyamupasate
Tato bhuya iva te tamo ya u vidyayam ratah

40.10

अ॒न्यदे॒वाहुर्वि॒द्यया॒न्यदा॑हु॒रवि॑द्याया ।
इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ॥१०॥

Anyadevahurvidyayanyadahuravidyaya
Iti shushruma dhiranam ye nastadvichachakshire

40.11

वि॒द्यां चावि॑द्यां च॒ यस्तद्वेदो॒भय॑ᳪ स॒ह ।
अवि॑द्यया मृ॒त्युं ती॒र्त्वा वि॒द्यया॒मृत॑मश्नुते ॥११॥

Vidyam chavidyam cha yastadvedobhayam saha
Avidyaya mrityum tirtva vidyayamritamashnute

40.12

अ॒न्धं तमः॒ प्रवि॑शन्ति॒ येऽसं॑भूतिमु॒पास॑ते ।
ततो॒ भूय॑ इव॒ ते तमो॒ य उ॒ संभू॑त्याᳪ र॒ताः ॥१२॥

Andham tamah pravishanti yesambhutimupasate
Tato bhuya iva te tamo ya u sambhutyam ratah

40.13

अ॒न्यदे॒वाहुः सं॑भ॒वाद॒न्यदा॑हु॒रसं॑भवात् ।
इति॑ शुश्रुम॒ धीरा॑णां॒ ये न॒स्तद्वि॑चचक्षि॒रे ॥१३॥

Anyadevahuh sambhavadanyadahurasambhavat
Iti shushruma dhiranam ye nastadvichachakshire

40.14

संभू॑तिं च विना॒शं च॒ यस्तद्वेदो॒भय॑ᳪ स॒ह ।
वि॒ना॒शेन॑ मृ॒त्युं ती॒र्त्वा संभू॑त्या॒मृत॑मश्नुते ॥१४॥

Sambhutim cha vinasham cha yastadvedobhayam saha
Vinashena mrityum tirtva sambhutyamritamashnute

40.15

हि॒र॒ण्मये॑न॒ पात्रे॑ण स॒त्यस्यापि॑हितं॒ मुख॑म् ।
तत्त्वं पू॑ष॒न्नपावृ॑णु स॒त्यध॑र्माय दृ॒ष्टये॑ ॥१५॥

Hiranmayena patrena satyasyapihitam mukham
Tattvam pushannapavrinu satyadharmaya drishtaye

40.16

तेजो॒ यत्ते॑ रू॒पे कल्या॑णतमं॒ तत्ते॑ पश्यामि ।
यो॒ऽसाव॒सौ पुरु॑षः॒ सो॒ऽहम॑स्मि ॥१६॥

Tejo yatte rupe kalyanatamam tatte pashyami
Yosavasau purushah sohamasmi

40.17

वा॒युरनि॑लम॒मृत॒मथे॒दं भस्मा॑न्त॒ᳪ शरी॑रम् ।
ओम्३ क्रतो॒ स्मर॑ कृ॒तᳪ स्म॑र॒ क्रतो॒ स्मर॑ कृ॒तᳪ स्म॑र ॥१७॥

Vayuranilamamritamathedam bhasmantam shariram
Om3 krato smara kritam smara krato smara kritam smara

40.18

अग्ने॒ नय॑ सु॒पथा॑ रा॒ये अ॒स्मान्विश्वा॑नि देव व॒युना॑नि वि॒द्वान् ।
यु॒यो॒ध्य॒स्मज्जु॑हुरा॒णमेनो॒ भूयि॑ष्ठां ते॒ नम॑ उ॒क्तिं विधेम ॥१८॥

Agne naya supatha raye asmanvishvani deva vayunani vidvan
Yuyodhyasmajjuhuranameno bhuyishtham te nama uktim vidhema

40.19

(१) १८ (२०८६)
॥इति शुक्लयजुःकाण्वसंहितायां चत्वारिंशोऽध्यायः ॥४॥

(1) 18 (2086)
, Iti shuklayajuhkanvasanhitayam chatvarinshodhyayah

40.20

०॥
॥ इति शुक्लयजुः काण्वसंहिता समाप्ता।

0
, Iti shuklayajuh kanvasanhita samapta