অধ্যায় 18

18.1

অথাষ্টাদশোঽধ্যায়ঃ ।

অশ্মন্নূর্জং পর্বতে শিশ্রিয়াণামদ্ভ্য ওষধীভ্যো বনস্পতিভ্যো অধি সংভৃতং পয়ঃ ।
তাং ন ইষমূর্জং ধত্ত মরুতঃ সংররাণা অশ্মংস্তে ক্ষুন্ময়ি ত ঊর্যং ব দ্বিষ্মস্তং তে শুগৃচ্ছতু ॥১॥

18.2

ইমা মে অগ্ন ইষ্টকা ধেনবঃ সন্ত্বেকা চ দশ চ দশ চ শতং চ শতং চ ।
সহস্রং চ সহস্রং চায়ুতং চায়ুতং চ নিয়ুতং চ নিয়ুতং চ ॥২॥

18.3

অর্বুদং চ ন্যর্বুদং সমুদ্রশ্চ মধ্যং চান্তশ্চ পরার্ধশ্চ ।
এতা মে অগ্ন ইষ্টকা ধেনবঃ সন্ত্বমুত্রামুষ্মিঁল্লোকে ॥৩॥

18.4

ঋতব স্থ ঋতাবৃধ ঋতুষ্ঠা স্থ ঋতাবৃধঃ ।
ঘৃতশ্চ্যুতো মধুশ্চ্যুতো বিরাজো নাম কামদুঘা অক্ষীয়মাণাঃ ॥৪॥

18.5

সমুদ্রস্য ত্বাবকয়াগ্নে পরিব্যয়ামসি । পাবকো অস্মভ্যং শিবো ভব ॥৫॥

18.6

হিমস্য ত্বা জরায়ুণাগ্নে পরিব্যয়ামসি । পাবকো অস্মভ্যং শিবো ভব ॥৬॥

18.7

৬ (১০০৪)
উপ জ্মন্নুপ বেতসেঽবতর নদীষ্বা ।
অগ্নে পিত্তমপামসি মণ্ডূকি তাভিরাগহি সেমং নো যজ্ঞং পাবকবর্ণং শিবং কৃধি ॥৭॥

18.8

অপামিদং ন্যয়নং সমুদ্রস্য নিবেশনম্ ।
অন্যাংস্তে অস্মত্তপন্তু হেতয়ঃ পাবকো অস্মভ্যং শিবো ভব ॥৮॥

18.9

অগ্নে পাবক রোচিষা মন্দ্রয়া দেব জিহ্বয়া । আ দেবান্বক্ষি যক্ষি চ ॥৯॥

18.10

স নঃ পাবক দীদিবোঽগ্নে দেবাঁ৩ ইহা বহ । উপ যজ্ঞং হবিশ্চ নঃ ॥১০॥

18.11

পাবকয়া যশ্চিতয়ন্ত্যা কৃপা ক্ষামন্ রুরুচ উষসো ন ভানুনা ।
তূর্বন্ন যামন্নেতশস্য নূ রণ আ যো ঘৃণে ন ততৃষাণো অজরঃ ॥১১॥

18.12

নমস্তে হরসে শোচিষে নমস্তে অস্ত্বর্চিষে ।
অন্যাংস্তে অস্মত্তপন্তু হেতয়ঃ পাবকো অস্মভ্যং শিবো ভব ।
নৃষদে বেলপ্সুষদে বেড্ বর্হিষদে বেড্ । বনসদে বেট্ স্বর্বিদে বেট্ ॥১২॥

18.13

যে দেবা দেবানাং যজ্ঞিয়া যজ্ঞিয়ানাং সংবত্সরীণমুপ ভাগমাসতে ।
অহুতাদো হবিষো যজ্ঞে অস্মিন্ত্স্বয়ং পিবন্তু মধুনো ঘৃতস্য ॥১৩॥

18.14

যে দেবা দেবেষ্বধি দেবত্বমায়ন্যে ব্রহ্মণঃ পুরএতারো অস্য ।
যেভ্যো ন ঋতে পবতে ধাম কিঞ্চন ন তে দিবো ন পৃথিব্যা অধি স্নুষু ॥১৪॥

18.15

প্রাণদা অপানদা ব্যানদা বর্চোদা বরিবোদাঃ ।
অন্যাংস্তে অস্মত্তপন্তু হেতয়ঃ পাবকো অস্মভ্যং শিবো ভব ॥১৫॥

18.16

(১)
অগ্নিস্তিগ্মেন শোচিষা যাসদ্বিশ্বং ন্যত্রিণম্ । অগ্নির্নো বনতে রয়িম্ ॥১॥

18.17

য ইমা বিশ্বা ভুবনানি জুহ্বদৃষির্হোতা ন্যসীদত্পিতা নঃ ।
স আশিষা দ্রবিণমিচ্ছমানঃ প্রথমচ্ছদবরাঁ৩ আবিবেশ (২) ১৭
কিংস্বিদাসীদধিষ্ঠানমারম্ভণং কতমত্স্বিত্কথাসীৎ ।
যতো ভূমিং জনয়ন্বিশ্বকর্মা বি দ্যামৌর্ণোন্মহিনা বিশ্বচক্ষাঃ ॥৩॥

18.18

বিশ্বতশ্চক্ষুরুত বিশ্বতোমুখো বিশ্বতোবাহুরুত বিশ্বতস্পাৎ ।
সং বাহুভ্যাং ধমতি সং পতত্রৈর্দ্যাবাভূমী জনয়ন্দেব একঃ ॥৪॥

18.19

কিং স্বিদ্বনং ক উ স বৃক্ষ আস যতো দ্যাবাপৃথিবী নিষ্টতক্ষুঃ ।
মনীষিণো মনসা পৃচ্ছতেদু তদ্যদধ্যতিষ্ঠদ্ভুবনানি ধারয়ন্ ॥৫॥

18.20

২০ (১০১৮)
যা তে ধামানি পরমাণি যাবমা যা মধ্যমা বিশ্বকর্মন্নুতেমা ।
শিক্ষা সখিভ্যো হবিষি স্বধাবঃ স্বয়ং যজস্ব তন্বঃ বৃধানঃ ॥৬॥

18.21

বাচস্পতিং বিশ্বকর্মাণমূতয়ে মনোজুবং বাজে অদ্যা হুবেম ।
স নো বিশ্বানি হবনানি জোষদ্বিশ্বশম্ভূরবসে সাধুকর্মা ॥৭॥

18.22

বিশ্বকর্মন্ হবিষা বাবৃধানঃ স্বয়ং যজস্ব পৃথিবীমুত দ্যাম্ ।
মুহ্যন্ত্বন্যে অভিতঃ সপত্না ইহাস্মাকং মঘবা সূরিরস্তু ॥৮॥

18.23

বিশ্বকর্মন্ হবিষা বর্ধনেন ত্রাতারমিন্দ্রমকৃণোরবধ্যম্ ।
তস্মৈ বিশঃ সমনমন্ত পূর্বীরয়মুগ্রো বিহব্যো যথাসৎ ॥৯॥

18.24

(২) ২৪
চক্ষুষঃ পিতা মনসা হি ধীরো ঘৃতমেনে অজনন্নম্নমানে ।
যদেদন্তা অদদৃহন্ত পূর্ব আদিদ্দ্যাবাপৃথিবী অপ্রথেতাম্ ॥১॥

18.25

বিশ্বকর্মা বিমনা আদ্বিহায়া ধাতা বিধাতা পরমোত সংদৃক্ ।
তেষামিষ্টানি সমিষা মদন্তি যত্রা সপ্ত ঋষীন্পর একমাহুঃ ॥২॥

18.26

যো নঃ পিতা জনিতা যো বিধাতা ধামানি বেদ ভুবনানি বিশ্বা ।
যো দেবানাং নামধা এক এব তং সংপ্রশ্নং ভুবনা যন্ত্যন্যা ॥৩॥

18.27

ত আয়জন্ত দ্রবিণং সমস্মা ঋষয়ঃ পূর্বে জরিতারো ন ভূনা ।
অসূর্তে সূর্তে রজসি নিষত্তে যে ভূতানি সমকৃণ্বন্নিমানি ॥৪॥

18.28

পরো দিবা পর এনা পৃথিব্যা পরো দেবেভিরসুরৈর্যদস্তি ।
কংস্বিদ্ গর্ভং প্রথমং দধ্র আপো যত্র দেবাঃ সমপশ্যন্ত পূর্বে ॥৫॥

18.29

তমিদ্গর্ভং প্রথমং দধ্র আপো যত্র দেবাঃ সমগচ্ছন্ত বিশ্বে ।
অজস্য নাভা অধ্যেকমর্পিতং যস্মিন্ বিশ্বানি ভুবনানি তস্থুঃ ॥৬॥

18.30

ন তং বিদাথ য ইমা জজানান্যদ্যুষ্মাকমন্তরং বভূব ।
নীহারেণ প্রাবৃতা জল্প্যা চাসুতৃপ উক্থশাসশ্চরন্তি ॥৭॥

18.31

বিশ্বকর্মা হ্যজনিষ্ট দেব আদিদ্গন্ধর্বো অভবদ্ দ্বিতীয়ঃ ।
তৃতীয়ঃ পিতা জনিতৌষধীনামপাং গর্ভং ব্যদধাত্পুরুত্রা ॥৮॥

18.32

(৩) ৩২
আশুঃ শিশানো বৃষভো ন ভীমো ঘনাঘনঃ ক্ষোভণশ্চর্ষণীনাম্ ।
সংক্রন্দনোঽনিমিষ একবীরঃ শতং সেনা অজয়ত্সাকমিন্দ্রঃ ॥১॥

18.33

৩৩(১০৩১)
সংক্রন্দনেনানিমিষেণ জিষ্ণুনা যুত্কারেণ দুশ্চ্যবনেন ধৃষ্ণুনা ।
তদিন্দ্রেণ জয়ত তত্সহধ্বং যুধো নর ইষুহস্তেন বৃষ্ণা ॥২॥

18.34

স ইষুহস্তৈঃ স নিষঙ্গিভির্বশী সংস্রষ্টা স যুধ ইন্দ্রো গণেন ।
সংসৃষ্টজিত্সোমপা বাহুশর্ধ্যুগ্রধন্বা প্রতিহিতাভিরস্তা ॥৩॥

18.35

বৃহস্পতে পরিদীয়া রথেন রক্ষোহামিত্রাঁ৩ অপবাধমানঃ ।
প্রভঞ্জন্ত্সেনাঃ প্রমৃণো যুধা জয়ন্নস্মাকমেধ্যবিতা রথানাম্ ॥৪॥

18.36

বলবিজ্ঞায় স্থবিরঃ প্রবীরঃ সহস্বান্ বাজী সহমান উগ্রঃ ।
অভিবীরো অভিসত্বা সহোজা জৈত্রমিন্দ্র রথমাতিষ্ঠ গোবিৎ ॥৫॥

18.37

গোত্রভিদং গোবিদং বজ্রবাহুং জয়ন্তমজ্ম প্রমৃণন্তমোজসা ।
ইমং সজাতা অনু বীরয়ধ্বমিন্দ্রং সখায়ো অনু সঁরভধ্বম্ ॥৬॥

18.38

অভি গোত্রাণি সহসা গাহমানোঽদয়ো বীরঃ শতমন্যুরিন্দ্রঃ ।
দুশ্চ্যবনঃ পৃতনাষালয়ুধ্যোঽস্মাকং সেনা অবতু প্র যুত্সু ॥৭॥

18.39

ইন্দ্র আসাং নেতা বৃহস্পতির্দক্ষিণা যজ্ঞঃ পুর এতু সোমঃ ।
দেবসেনানামভিভঞ্জতীনাং জয়ন্তীনাং মরুতো যন্ত্বগ্রম্ ॥৮॥

18.40

ইন্দ্রস্য বৃষ্ণো বরুণস্য রাজ্ঞ আদিত্যানাং মরুতাং শর্ধ উগ্রম্ ।
মহামনসাং ভুবনচ্যবানাং ঘোষো দেবানাং জয়তামুদস্থাৎ ॥৯॥

18.41

উদ্ধর্ষয় মঘবন্নায়ুধান্যুত্সত্বনাং মামকানাং মনাংসি ।
উদ্বৃত্রহন্ বাজিনাং বাজিনান্যুদ্রথানাং জয়তাং যন্তু ঘোষাঃ ॥১০॥

18.42

অস্মাকমিন্দ্রঃ সমৃতেষু ধ্বজেষ্বস্মাকং যা ইষবস্তা জয়ন্তু ।
অস্মাকং বীরা উত্তরে ভবন্ত্বস্মাঁ৩ উ দেবা অবতা হবেষু ॥১১॥

18.43

অমীষাং চিত্তং প্রতিলোভয়ন্তী গৃহাণাঙ্গান্যপ্বে পরেহি ।
অভি প্রেহি নির্দহ হৃত্সু শোকৈরন্ধেনামিত্রাস্তমসা সচন্তাম্ ॥১২॥

18.44

অবসৃষ্টা পরা পত শরব্যে ব্রহ্মসংশিতে । গচ্ছামিত্রান্প্রপদ্যস্ব মামীষাং কঞ্চনোচ্ছিষঃ ॥১৩॥

18.45

প্রেতা জয়তা নর ইন্দ্রো বঃ শর্ম যচ্ছতু । উগ্রা বঃ সন্তু বাহবোঽনাধৃষ্যা যথাসথ ॥১৪॥

18.46

অসৌ যা সেনা মরুতঃ পরেষামভ্যৈতি ন ওজসা স্পর্ধমানা ।
তাং গূহত তমসাপব্রতেন যথামী অন্যো অন্যং ন জানন্ ॥১৫॥

18.47

যত্র বাণাঃ সম্পতন্তি কুমারা বিশিখা ইব ।
তত্র ইন্দ্রো বৃহস্পতিরদিতিঃ শর্ম যচ্ছতু বিশ্বাহা শর্ম যচ্ছতু ॥১৬॥

18.48

৪৮ (১০৪৬)
মর্মাণি তে বর্মণা ছাদয়ামি সোমস্ত্বা রাজামৃতেনানুবস্তাম্ ।
উরোর্বরীয়ো বরুণস্তে কৃণোতু জয়ন্তং ত্বানু দেবা মদন্তু ॥১৭॥

18.49

(৪) ৪৯
উদেনমুত্তরাং নয়াগ্নে ঘৃতেনাহুত । রায়স্পোষেণ সংসৃজ প্রজয়া চ বহুং কৃধি ॥১॥

18.50

ইন্দ্রেমং প্রতরাং নয় সজাতানামসদ্বশী । সমেনং বর্চসা সৃজ দেবানাং ভাগদা অসৎ ॥২॥

18.51

যস্য কুর্মো গৃহে হবিস্তমগ্নে বর্ধয়া ত্বম্ । তস্মৈ দেবা অধিব্রবন্নয়ং চ ব্রহ্মণস্পতিঃ ॥৩॥

18.52

উদু ত্বা বিশ্বে দেবা অগ্নে ভরন্তু চিত্তিভিঃ । স নো ভব শিবস্ত্বং সুপ্রতীকো বিভাবসুঃ ॥৪॥

18.53

পঞ্চ দিশো দৈবীর্যজ্ঞমবন্তু দেবীরপামতিং দুর্মতিং বাধমানাঃ ।
রায়স্পোষে যজ্ঞপতিমাভজন্তী রায়স্পোষে অধি যজ্ঞো অস্থাৎ ॥৫॥

18.54

সমিদ্ধে অগ্না অধি মামহান উক্থপত্র ঈড্যো গৃভীতঃ ।
তপ্তং ঘর্মং পরিগৃহ্যায়জন্তোর্জা যদ্যজ্ঞময়জন্ত দেবাঃ ॥৬॥

18.55

দৈব্যায় ধর্ত্রে জোষ্ট্রে দেবশ্রীঃ শ্রীমনাঃ শতপয়াঃ ।
পরিগৃহ্য দেবা যজ্ঞমায়ন্ দেবা দেবেভ্যো অধ্বর্যন্তো অস্থুঃ ॥৭॥

18.56

বীতং হবিঃ শমিতং শমিতা যজধ্যৈ তুরীয়ো যজ্ঞো যত্র হব্যমেতি ।
ততো বাকা আশিষো নো জুষন্তাম্ ॥৮॥

18.57

সূর্যরশ্মির্হরিকেশঃ পুরস্তাত্সবিতা জ্যোতিরুদয়াঁ৩ অজস্রম্ ।
তস্য পূষা প্রসবে যাতি বিদ্বান্ত্সংপশ্যন্বিশ্বা ভুবনানি গোপাঃ ॥৯॥

18.58

বিমান এষ দিবো মধ্য আস্ত আপপ্রিবান্রোদসী অন্তরিক্ষম্ ।
স বিশ্বাচীরভিচষ্টে ঘৃতাচীরন্তরা পূর্বমপরং চ কেতুম্ ॥১০॥

18.59

উক্ষা সমুদ্রো অরুণঃ সুপর্ণঃ পূর্বস্য যোনিং পিতুরাবিবেশ ।
মধ্যে দিবো নিহিতঃ পৃশ্নিরশ্মা বিচক্রমে রজসস্পাত্যন্তৌ ॥১১॥

18.60

ইন্দ্রং বিশ্বা অবীবৃধন্ত্সমুদ্রব্যচসং গিরঃ । রথীতমং রথীনাং বাজানাং সত্পতিং পতিম্ ॥১২॥

18.61

দেবহূর্যজ্ঞ আ চ বক্ষত্সুম্নহূর্যজ্ঞ আ চ বক্ষৎ । যক্ষদগ্নির্দেবো দেবাঁ৩ আ চ বক্ষৎ ॥১৩॥

18.62

বজস্য মা প্রসব উদ্গ্রাভেণোদগ্রভীৎ । অধা সপত্নানিন্দ্রো মে নিগ্রাভেণাধরাঁ৩ অকঃ ॥১৪॥

18.63

উদ্গ্রাভং চ নিগ্রাভং চ ব্রহ্ম দেবা অবীবৃধন্ ।
অধা সপত্নানিন্দ্রাগ্নী মে বিষূচীনান্ব্যস্যতাম্ ॥১৫॥

18.64

(৫) ৬৪
ক্রমধ্বমগ্নিনা নাকমুখ্যং হস্তেষু বিভ্রতঃ । দিবস্পৃষ্ঠং স্বর্গত্বা মিশ্রা দেবেভিরাধ্বম্ ॥১॥

18.65

৬৫ (১০৬৩)
প্রাচীমনু প্রদিশং প্রেহি বিদ্বানগ্নেরগ্নে পুরো অগ্নির্ভবেহ ।
বিশ্বা আশা দীদ্যানো বিভাহ্যূর্জং নো ধেহি দ্বিপদে চতুষ্পদে ॥২॥

18.66

পৃথিব্যা অহমুদন্তরিক্ষমারুহমন্তরিক্ষাদ্দিবমারুহম্ ।
দিবো নাকস্য পৃষ্ঠাৎ স্বর্জ্যোতিরগামহম্ ॥৩॥

18.67

স্বর্যন্তো নাপেক্ষন্ত আ দ্যাং রোহন্তি রোদসী ।
যজ্ঞং যে বিশ্বতোধারং সুবিদ্বাংসো বিতেনিরে ॥৪॥

18.68

অগ্নে প্রেহি প্রথমো দেবয়তাং চক্ষুর্দেবানামুত মর্ত্যানাম্ ।
ইয়ক্ষমাণা ভৃগুভিঃ সজোষাঃ স্বর্যন্তু যজমানাঃ স্বস্তি ॥৫॥

18.69

নক্তোষাসা সমনসা বিরূপে ধাপয়েতে শিশুমেকং সমীচী ।
দ্যাবাক্ষামা রুক্মো অন্তর্বিভাতি দেবা অগ্নিং ধারয়ন্ দ্রবিণোদাঃ ॥৬॥

18.70

অগ্নে সহস্রাক্ষ শতমূর্ধঞ্ছতং তে প্রাণাঃ সহস্রং ব্যানাঃ ।
ত্বং সাহস্রস্য রায় ঈশিষে তস্মৈ তে বিধেম বাজায় স্বাহা ॥৭॥

18.71

সুপর্ণোঽসি গরুত্মান্ পৃষ্ঠে পৃথিব্যাঃ সীদ ।
ভাসান্তরিক্ষমাপৃণ জ্যোতিষা দিবমুত্তভান তেজসা দিশ উদ্দৃংহ ॥৮॥

18.72

আজুহ্বানঃ সুপ্রতীকঃ পুরস্তাদগ্নে স্বং যোনিমাসীদ সাধুয়া ।
অস্মিন্ত্সধস্থে অধ্যুত্তরস্মিন্বিশ্বে দেবা যজমানশ্চ সীদত ॥৯॥

18.73

তাং সবিতুর্বরেণ্যস্য চিত্রামাহং বৃণে সুমতিং বিশ্বজন্যাম্ ।
যামস্য কণ্বো অদুহত্প্রপীনাং সহস্রধারাং পয়সা মহীং গাম্ ॥১০॥

18.74

বিধেম তে পরমে জন্মন্নগ্নে বিধেম স্তোমৈরবরে সধস্থে ।
যস্মাদ্যোনেরুদারিথা যজে তং প্র ত্বে হবীংষি জুহুরে সমিদ্ধে ॥১১॥

18.75

প্রেদ্ধো অগ্নে দীদিহি পুরো নোঽজস্রয়া সূর্ম্যা যবিষ্ঠ । ত্বাং শশ্বন্ত উপয়ন্তি বাজাঃ ॥১২॥

18.76

অগ্নে তমদ্যাশ্বং ন স্তোমৈঃ ক্রতুং ন ভদ্রং হৃদিস্পৃশম্ । ঋধ্যামা ত ওহৈঃ ॥১৩॥

18.77

চিত্তিং জুহোমি মনসা ঘৃতেন যথা দেবা ইহাগমন্বীতিহোত্রা ঋতাবৃধঃ ।
পত্যে বিশ্বস্য ভূমনো জুহোমি বিশ্বকর্মণে বিশ্বাহাদাভ্যং হবি ॥১৪॥

18.78

সপ্ত তে অগ্নে সমিধঃ সপ্ত জিহ্বাঃ সপ্ত ঋষয়ঃ সপ্ত ধাম প্রিয়াণি ।
সপ্ত হোত্রাঃ সপ্তধা ত্বা যজন্তি সপ্ত যোনীরাপৃণস্ব ঘৃতেন স্বাহা ॥১৫॥

18.79

(৬) ৭৯
শুক্রজ্যোতিশ্চ চিত্রজ্যোতিশ্চ সত্যজ্যোতিশ্চ জ্যোতিষ্মাংশ্চ । শুক্রশ্চ ঋতপাশ্চাত্যংহাঃ ॥১॥

18.80

৮০ (১০৭৮)
ঈদৃঙ্ চান্যদৃঙ্ চ সদৃঙ্ চ প্রতিসদৃঙ্ চ । মিতশ্চ সংমিতশ্চ সভরাঃ ॥২॥

18.81

ঋতজিচ্চ সত্যজিচ্চ সেনজিচ্চ সুষেণশ্চ । অন্তিমিত্রশ্চ দূরে অমিত্রশ্চ গণঃ ॥৩॥

18.82

ঋতশ্চ সত্যশ্চ ধ্রুবশ্চ ধরুণশ্চ । ধর্তা চ বিধর্তা চ বিধারয়ঃ ॥৪॥

18.83

ঈদৃক্ষাস এতাদৃক্ষাস ঊ ষু ণঃ সদৃক্ষাসঃ প্রতিসদৃক্ষাস এতন ।
মিতাসশ্চ সংমিতাসো নো অদ্য সভরসো মরুতো যজ্ঞে অস্মিন্ ॥৫॥

18.84

স্বতবাংশ্চ প্রঘাসী চ সান্তপনশ্চ গৃহমেধী চ । ক্রীলী চ শাকী চোজ্জেষী ॥৬॥

18.85

ইন্দ্রং দৈবীর্বিশো মরুতোঽনুবর্ত্মানোঽভবন্যথেন্দ্রং দৈবীর্বিশো মরুতোঽনুবর্ত্মানোঽভবন্ ।
এবমিমং যজমানং দৈবীশ্চ বিশো মানুষীশ্চানুবর্ত্মানো ভবন্তু ॥৭॥

18.86

(৭) ৮৬ (১০৮৪)
ইতি শুক্লয়জুঃ কাণ্বসংহিতায়াং অষ্টাদশোঽধ্যায়ঃ ॥১৮॥