অধ্যায় 10

10.1

অথ দশমোঽধ্যায়ঃ ।

দেব সবিতঃ প্রসুব যজ্ঞং প্রসুবেমং ভগায় ।
দিব্যো গন্ধর্বঃ কেতপাঃ কেতং নঃ পুনাতু বাচস্পতির্নো অদ্য বাজং স্বদতু ॥১॥

10.2

ধ্রুবসদং ত্বা নৃষদং মনঃসদম্ ।
উপয়ামগৃহীতোঽসীন্দ্রায় ত্বা জুষ্টং গৃহ্ণাম্যেষ তে যোনিরিন্দ্রায় ত্বা জুষ্টতমম্ ॥২॥

10.3

২(৪৬০)
অপ্সুষদং ত্বা ঘৃতসদং ব্যোমসদম্ ।
উপয়ামগৃহীতোঽসীন্দ্রায় ত্বা জুষ্টং গৃহ্ণাম্যেষ তে যোনিরিন্দ্রায় ত্বা জুষ্টতমম্ ।
পৃথিবীসদং ত্বাঽন্তরিক্ষসদং দিবিসদং দেবসদং নাকসদম্ ।
উপয়ামগৃহীতোঽসীন্দ্রায় ত্বা জুষ্টং গৃহ্ণাম্যেষ তে যোনিরিন্দ্রায় ত্বা জুষ্টতমম্ ॥৩॥

10.4

অপাং রসমুদ্বয়সং সূর্যে সন্তং সমাহিতম্ । অপাং রসস্য যো রসস্তং বো গৃহ্ণাম্যুত্তমম্ ।
উপয়ামগৃহীতোঽসীন্দ্রায় ত্বা জুষ্টং গৃহ্ণাম্যেষ তে যোনিরিন্দ্রায় ত্বা জুষ্টতমম্ ॥৪॥

10.5

গ্রহা ঊর্জাহুতয়ো ব্যন্তো বিপ্রায় মতিম্ । তেষাং বিশিপ্রিয়াণাং বোঽহমিষমূর্জং সমগ্রভম্ ।
উপয়ামগৃহীতোঽসীন্দ্রায় ত্বা জুষ্টং গৃহ্ণাম্যেষ তে যোনিরিন্দ্রায় ত্বা জুষ্টতমম্ ॥৫॥

10.6

সংপৃচ স্থ সং মা ভদ্রেণ পৃঙ্ক্ত । বিপৃচ স্থ বি মা পাপেন পৃঙ্ক্ত ॥৬॥

10.7

(১)৬
ইন্দ্রস্য বজ্রোঽসি বাজসাস্ত্বয়া যং বাজং সেৎ ।
বাজস্য নু প্রসবে মাতরং মহীমদিতিং নাম বচসা করামহে ।
যস্যামিদং বিশ্বং ভুবনমাবিবেশ তস্যাং নো দেবঃ সবিতা ধর্ম সাবিষক্ ॥১॥

10.8

দেবীরাপো অপাংনপাদ্যো ব ঊর্মিঃ প্রতূর্তিঃ। ককুন্মান্ বাজসাস্তেনায়ং বাজংসেৎ ॥২॥

10.9

অপ্স্বন্তরমৃতমপ্সু ভেষজমপামুত প্রশস্তিভিঃ । অশ্বা ভবত বাজিনঃ ॥৩॥

10.10

বাতো বা বো মনো বা গন্ধর্বাঃ সপ্তবিংশতিঃ । তে অগ্রেঽশ্বময়ুঞ্জংস্তে অস্মিন্জবমাদধুঃ ॥৪॥

10.11

বাতরংহা ভব বাজিন্যুজ্যমান ইন্দ্রস্যেব দক্ষিণঃ শ্রিয়ৈধি ।
যুঞ্জন্তু ত্বা মরুতো বিশ্ববেদস আ তে ত্বষ্টা পত্সু জবং দধাতু ॥৫॥

10.12

জবো যস্তে বাজিন্নিহিতো গুহা যঃ শ্যেনে পরীত্তো অচরচ্চ বাতে ।
তেন নো বাজিন্ বলবান্ বলেন বাজজিচ্চৈধি সমনে চ পারয়িষ্ণুঃ ॥৬॥

10.13

বাজিনো বাজজিতো বাজং সরিষ্যন্তঃ । বৃহস্পতের্ভাগমবজিঘ্রত ॥৭॥

10.14

(২) ১৩
দেবস্য বয়ং সবিতুঃ সবে সত্যসবসঃ । বৃহস্পতেরুত্তমং নাকং রুহেমেন্দ্রস্যোত্তমং নাকং রুহেম ।
দেবস্য বয়ং সবিতুঃ সবে সত্যসবসঃ । বৃহস্পতেরুত্তমং নাকমরুহামেন্দ্রস্যোত্তমং নাকমরুহাম ॥১॥

10.15

বৃহস্পতে বাজং জয় বৃহস্পতয়ে বাচং বদত । বৃহস্পতিং বাজং জাপয়ত ॥২॥

10.16

ইন্দ্র বাজং জয়েন্দ্রায় বাচং বদত । ইন্দ্রং বাজং জাপয়ত ॥৩॥

10.17

এষা বঃ সা সত্যা সংবাগভূদ্যয়া বৃহস্পতিং বাজমজীজপত ।
আজীজপত বৃহস্পতিং বাচং বনস্পতয়ো বিমুচ্যধ্বম্ ॥৪॥

10.18

দেবস্য বয়ং সবিতুঃ সবে সত্যসবসঃ । বৃহস্পতের্বাজজিতো বাজং জেষম্ ॥৫॥

10.19

১৮ (৪৭৬)
বাজিনো বাজং জয়তাধ্বন স্কভ্নন্তঃ । যোজনা মিমানাঃ কাষ্ঠাং গচ্ছত ॥৬॥

10.20

এষ স্য বাজী ক্ষিপণিং তুরণ্যতি গ্রীবায়াং বদ্ধো অপিকক্ষ আসনি ।
ক্রতুং দধিক্রা অনু সন্তবীত্বত্পথামঙ্কাংস্যন্বাপনীফণৎ ॥৭॥

10.21

২০॥
উত স্মাস্য দ্রবতস্তুরণয়তঃ পর্ণং ন বেরনুবাতি প্রগর্ধিনঃ ।
শ্যেনস্যেব ধ্রজতো অঙ্কসং পরি দধিক্রাব্ণঃ সহোর্জা তরিত্রতঃ ॥৮॥

10.22

২১॥
শং নো ভবন্তু বাজিনো হবেষু দেবতাতা মিতদ্রবঃ স্বর্কাঃ ।
জম্ভয়ন্তোঽহিং বৃকং রক্ষাংসি সনেম্যস্মদ্যুয়বন্নমীবাঃ ॥৯॥

10.23

তে নো অর্বন্তো হবনশ্রুতো হবং বিশ্বে শৃণ্বন্তু বাজিনো মিতদ্রবঃ ।
সহস্রসা মেধসাতা ইব ত্মনা মহো যে ধনং সমিথেষু জভ্রিরে ॥১০॥

10.24

বাজেবাজেঽবত বাজিনো নো ধনেষু বিপ্রা অমৃতা ঋতজ্ঞাঃ ।
অস্য মধ্বঃ পিবত মাদয়ধ্বং তৃপ্তা যাত পথিভির্দেবয়ানৈঃ ॥১১॥

10.25

আ মা বাজস্য প্রসবো জগম্যাদেমে দ্যাবাপৃথিবী বিশ্বরূপে ।
আ মা গংতং পিতরা মাতরা যুবমা মা সোমো অমৃতত্বায় গম্যাৎ ॥১২॥

10.26

বাজিনো বাজজিতো বাজং সসৃবাংসঃ। বৃহস্পতের্ভাগমবজিঘ্রত নিমৃজানাঃ ॥১৩॥

10.27

(৩) ২৬
আপয়ে স্বাহা স্বাপয়ে স্বাহাঽপিজায় স্বাহা ক্রতবে স্বাহা । বসবে স্বাহাহর্পতয়ে স্বাহা ।
অহ্নে মুগ্ধায় স্বাহা মুগ্ধায় বৈনংশিনায় স্বাহা বিনংশিন আন্ত্যায়নায় স্বাহান্ত্যায়
ভৌবনায় স্বাহা ভুবনস্য পতয়ে স্বাহাধিপতয়ে স্বাহা ॥১॥

10.28

আয়ুর্যজ্ঞেন কল্পতাং প্রাণো যজ্ঞেন কল্পতাং চক্ষুর্যজ্ঞেন কল্পতাং শ্রোত্রং যজ্ঞেন কল্পতাম্ ।
পৃষ্ঠং যজ্ঞেন কল্পতাং যজ্ঞো যজ্ঞেন কল্পতাম্ ॥২॥

10.29

জায় এহি স্বো রোহাব । প্রজাপতেঃ প্রজা অভূম স্বর্দেবা অগন্মামৃতা অভূম ॥৩॥

10.30

অস্মে বো অস্ত্বিন্দ্রিয়মস্মে নৃম্ণমুত ক্রতুঃ । অস্মে বর্চাংসি সন্তু বঃ ॥৪॥

10.31

নমো মাত্রে পৃথিব্যা ইয়ং তে রাড্যন্তাসি যমনঃ ।
ধ্রুবোঽসি ধরুণঃ কৃষ্যৈ ক্ষেমায় রয্যৈ পোষায় ॥৫॥

10.32

(৪) ৩১
বাজস্যেমং প্রসবঃ সুষুবেঽগ্রে সোমং রাজানমোষধীষ্বপ্সু ।
তা অস্মভ্যং মধুমতীর্ভবন্তু বয়ং রাষ্ট্রে জাগৃয়াম পুরোহিতাঃ ॥১॥

10.33

বাজস্যেদং প্রসব আবভূবেমা চ বিশ্বা ভুবনানি সর্বতঃ ।
সনেমি রাজা পরিয়াতি বিদ্বান্ রয়িং পুষ্টিং বর্ধয়মানো অস্মে ॥২॥

10.34

৩৩ (৪৯১)
বাজস্যেমাং প্রসবঃ শিশ্রিয়ে দিবমিমা চ বিশ্বা ভুবনানি সম্রাট্ ।
আদিত্সন্তং দাপয়তি প্রজান্ত্স নো রয়িং সর্ববীরং নিয়চ্ছতু ॥৩॥

10.35

অগ্নে অচ্ছাবদেহ নঃ প্রতি নঃ সুমনা ভব । প্র নো যচ্ছ সহস্রজিত্ত্বংহি ধনদা অসি ॥৪॥

10.36

সোমং রাজানমবসেঽগ্নিমন্বারভামহে । আদিত্যান্ বিষ্ণুং সূর্যং ব্রহ্মাণং চ বৃহস্পতিম্ ॥৫॥

10.37

প্র নো যচ্ছত্বর্যমা প্র পূষা প্র সরস্বতী । প্র বাগ্দেবী দদাতু নঃ ॥৬॥

10.38

অর্যমণং বৃহস্পতিমিন্দ্রং দানায় চোদয় । বাচং বিষ্ণুং সরস্বতীং সবিতারং চ বাজিনম্ ॥৭॥

10.39

দেবস্য ত্বা সবিতুঃ প্রসবেঽশ্বিনোর্বাহুভ্যাং পূষ্ণো হস্তাভ্যাম্ ।
সরস্বত্যৈ বাচো যন্তুর্যে দধামি । বৃহস্পতেষ্ট্বা সাম্রাজ্যেনাভিষিঞ্চামীন্দ্রস্য ত্বা সাম্রাজ্যেনাভিষিঞ্চামি ॥৮॥

10.40

(৫) ৩৯
অগ্নিরেকাক্ষরেণ প্রাণমুদজয়ৎ তমুজ্জেষমশ্বিনৌ দ্ব্যক্ষরেণ দ্বিপদো মনুষ্যানুদজয়তাং তানুজ্জেষম্ ।
বিষ্ণুস্ত্র্যক্ষরেণ ত্রীনিমাঁল্লোকানুদজয়ত্তানুজ্জেষং সোমশ্চতুরক্ষরেণ চতুষ্পদঃ পশূনুদজয়ত্তানুজ্জেষম্ ॥১॥

10.41

পূষা পঞ্চাক্ষরেণ পঞ্চ ঋতূনুদজয়ত্তানুজ্জেষং সবিতা ষলক্ষরেণ ষলৃতূনুদজয়ত্তানুজ্জেষম্ ॥
মরুতঃ সপ্তাক্ষরেণ সপ্ত গ্রাম্যান্ পশূনুদজয়ংস্তানুজ্জেষং বৃহস্পতিরষ্টাক্ষরেণ গায়ত্রীমুদজয়ত্তামুজ্জেষম্ ॥২॥

10.42

মিত্রো নবাক্ষরেণ ত্রিবৃতং স্তোমমুদজয়ৎ তমুজ্জেষং বরুণো দশাক্ষরেণ বিরাজমুদজয়ত্তামুজ্জেষম্ ।
ইন্দ্র একাদশাক্ষরেণ ত্রিষ্টুভমুদজয়ত্তামুজ্জেষং বিশ্বে দেবা দ্বাদশাক্ষরেণ জগতীমুদজয়ংস্তামুজ্জেষম্ ॥৩॥

10.43

বসবস্ত্রয়োদশাক্ষরেণ ত্রয়োদশং স্তোমমুদজয়ংস্তমুজ্জেষং রুদ্রাশ্চতুর্দশাক্ষরেণ চতুর্দশং স্তোমমুদজয়ংস্তমুজ্জেষম্ ।
আদিত্যাঃ পঞ্চদশাক্ষরেণ পঞ্চদশং স্তোমমুদজয়ংস্তমুজ্জেষমদিতিঃ ষোলশাক্ষরেণ ষোলশং স্তোমমুদজয়ত্তমুজ্জেষম্ ।
প্রজাপতিঃ সপ্তদশাক্ষরেণ সপ্তদশং স্তোমমুদজয়ত্তমুজ্জেষম্ ॥৪॥

10.44

(৬) ৪৩ (৫০১)
॥ইতি শুক্লয়জুঃ কাণ্বসংহিতায়াং দশমোঽধ্যায়ঃ॥ (১০)
॥ইতি প্রথমো দশকঃ ॥১॥