Utshovসর্গ 111
111.1
এতাবদেতদাখ্যানং সোত্তরং ব্রহ্মপূজিতম্ ।
রামায়ণমিতি খ্যাতং মুখ্যং বাল্মীকীনা কৃতম্ ।। ৭.১১১.১ ॥
111.2
ততঃ প্রতিষ্ঠিতো বিষ্ণুঃ স্বর্গলোকে যথা পুরম্ ।
যেন ব্যাপ্তমিদং সর্বং ত্রৈলোক্যং সচরাচরম্ ।। ৭.১১১.২ ॥
111.3
ততো দেবাঃ সগন্ধর্বাঃ সিদ্ধাশ্চ পরমর্ষয়ঃ ।
নিত্যং শৃণ্বন্তি সন্তুষ্টাঃ দিব্যং রামায়ণং দিবি ।। ৭.১১১.৩ ॥
111.4
ইদমাখ্যানমায়ুষ্যং সৌভাগ্যং পাপনাশনম্ ।
রামায়ণং বেদসমং শ্রাদ্ধেষু শ্রাবয়েদ্বুধঃ ।। ৭.১১১.৪ ॥
111.5
অপুত্রো লভতে পুত্রমধনো লভতে ধনম্ ।
সর্বপাপৈঃ প্রমুচ্যেত পদমপ্যস্য যঃ পঠেৎ ।। ৭.১১১.৫ ॥
111.6
পাপান্যপি চ যঃ কুর্যাদহন্যহনি মানবঃ ।
পঠত্যেকমপি শ্লোকং পাপাত্স পরিমুচ্যতে ।। ৭.১১১.৬ ॥
111.7
বাচকায় চ দাতব্যং বস্ত্রং ধেনুং হিরণ্যকম্ ।
বাচকে পরিতুষ্টে তু তুষ্টাঃ স্যুঃ সর্বদেবতাঃ ।। ৭.১১১.৭ ॥
111.8
এতদাখ্যানমায়ুষ্যং পঠন্রামায়ণং নরঃ ।
সপুত্রপৌত্রো লোকে ঽস্মিন্প্রেত্য চেহ মহীয়তে ।। ৭.১১১.৮ ॥
111.9
অয়োধ্যা ঽপি পুরী রম্যা শূন্যা বর্ষগণান্বহূন্ ।
ঋষভং প্রাপ্য রাজানং নিবাসমুপয়াস্যতি ।। ৭.১১১.৯ ॥
111.10
এতদাখ্যানমায়ুষ্যং সভবিষ্যং সহোত্তরম্ ।
কৃতবান্প্রচেতসঃ পুত্রস্তদ্ব্রহ্মাপ্যন্বমন্যত ।। ৭.১১১.১০ ॥
111.11
অশ্বমেধসহস্রস্য বাজপেয়ায়ুতস্য চ ।
লভতে শ্রাবণাদেব সর্গস্যৈকস্য মানবঃ ।। ৭.১১১.১১ ॥
111.12
প্রয়াগাদীনি তীর্থানি গঙ্গাদ্যাঃ সরিতস্তথা ।
নৈমিশাদীন্যরণ্যানি কুরুক্ষেত্রাদিকান্যপি ।গতানি তেন লোকে ঽস্মিন্যেন রামায়ণং শ্রুতম্ ।। ৭.১১১.১২ ॥
111.13
হেমভারং কুরুক্ষেত্রে গ্রস্তে ভানৌ প্রয়চ্ছতি ।
যশ্চ রামায়ণং লোকে শৃণোতি সদৃশাবুভৌ ।। ৭.১১১.১৩ ॥
111.14
সম্যক্ছ্রদ্ধাসমায়ুক্তঃ শৃণুতে রাঘবীং কথাম্ ।
সর্বপাপাত্প্রমুচ্যেত বিষ্ণুলোকং স গচ্ছতি ।। ৭.১১১.১৪ ॥
111.15
আদিকাব্যমিদং ত্বার্ষং পুরা বাল্মীকিনা কৃতম্ ।
যঃ শৃণোতি সদা ভক্ত্যা স গচ্ছেদ্বৈষ্ণবীং তনুম্ ।। ৭.১১১.১৫ ॥
111.16
পুত্রদারাশ্চ বর্ধন্তে সম্পদঃ সন্ততিস্তথা ।
সত্যমেতদ্বিদিত্বা তু শ্রোতব্যং নিয়তাত্মভিঃ ।। ৭.১১১.১৬ ॥
111.17
গায়ত্র্যাশ্চ স্বরূপং তদ্রামায়ণমনুত্তমম্ ।
। ৭.১১১.১৭ ॥
111.18
অপুত্রো লভতে পুত্রমধনো লভতে ধনম্ ।
সর্বপাপৈঃ প্রমুচ্যেত পদমপ্যস্য যঃ পঠেৎ ।। ৭.১১১.১৮ ॥
111.19
যঃ পঠেচ্ছৃণুয়ান্নিত্যং চরিতং রাঘবস্য হ ।
ভক্ত্যা নিষ্কল্মষো ভূত্বা দীর্ঘমায়ুরবাপ্নুয়াৎ ।। ৭.১১১.১৯ ॥
111.20
চিন্তয়েদ্রাঘবং নিত্যং শ্রেয়ঃ প্রাপ্তুং য ইচ্ছতি ।
শ্রাবয়েদিদমাখ্যানং ব্রাহ্মণেভ্যো দিনে দিনে ।। ৭.১১১.২০ ॥
111.21
যস্ত্বিদং রঘুনাথস্য চরিতং সকলং পঠেৎ ।
সো ঽসুক্ষয়ে বিষ্ণুলোকং গচ্ছত্যেব ন সংশয়ঃ ।। ৭.১১১.২১ ॥
111.22
পিতা পিতামহস্তস্য তথৈব প্রপিতামহঃ ।
তত্পিতা তত্পিতা চৈব বিষ্ণুং যান্তি ন সংশয়ঃ ।। ৭.১১১.২২ ॥
111.23
চতুর্বর্গপ্রদং নিত্যং চরিতং রাঘবস্য তু ।
তস্মাদ্যত্নবতা নিত্যং শ্রোতব্যং পরমং সদা ।। ৭.১১১.২৩ ॥
111.24
শৃণ্বন্রামায়ণং ভক্ত্যা যঃ পাদং পদমেব বা ।
স যাতি ব্রহ্মণঃ স্থানং ব্রহ্মণা পূজ্যতে সদা ।। ৭.১১১.২৪ ॥
111.25
এবমেতত্পুরাবৃত্তমাখ্যানং ভদ্রমস্তু বঃ ।
প্রব্যাহরত বিস্রব্ধং বলং বিষ্ণোঃ প্রবর্ধতাম্ ।। ৭.১১১.২৫ ।।