UtshovSarga 111
111.1
एतावदेतदाख्यानं सोत्तरं ब्रह्मपूजितम् ।
रामायणमिति ख्यातं मुख्यं वाल्मीकीना कृतम् ।। ७.१११.१ ॥
Etavadetadakhyanam sottaram brahmapujitam
Ramayanamiti khyatam mukhyam valmikina kritam
111.2
ततः प्रतिष्ठितो विष्णुः स्वर्गलोके यथा पुरम् ।
येन व्याप्तमिदं सर्वं त्रैलोक्यं सचराचरम् ।। ७.१११.२ ॥
Tatah pratishthito vishnuh svargaloke yatha puram
Yena vyaptamidam sarvam trailokyam sacharacharam
111.3
ततो देवाः सगन्धर्वाः सिद्धाश्च परमर्षयः ।
नित्यं शृण्वन्ति सन्तुष्टाः दिव्यं रामायणं दिवि ।। ७.१११.३ ॥
Tato devah sagandharvah siddhashcha paramarshayah
Nityam shrinvanti santushtah divyam ramayanam divi
111.4
इदमाख्यानमायुष्यं सौभाग्यं पापनाशनम् ।
रामायणं वेदसमं श्राद्धेषु श्रावयेद्बुधः ।। ७.१११.४ ॥
Idamakhyanamayushyam saubhagyam papanashanam
Ramayanam vedasamam shraddheshu shravayedbudhah
111.5
अपुत्रो लभते पुत्रमधनो लभते धनम् ।
सर्वपापैः प्रमुच्येत पदमप्यस्य यः पठेत् ।। ७.१११.५ ॥
Aputro labhate putramadhano labhate dhanam
Sarvapapaih pramuchyeta padamapyasya yah pathet
111.6
पापान्यपि च यः कुर्यादहन्यहनि मानवः ।
पठत्येकमपि श्लोकं पापात्स परिमुच्यते ।। ७.१११.६ ॥
Papanyapi cha yah kuryadahanyahani manavah
Pathatyekamapi shlokam papatsa parimuchyate
111.7
वाचकाय च दातव्यं वस्त्रं धेनुं हिरण्यकम् ।
वाचके परितुष्टे तु तुष्टाः स्युः सर्वदेवताः ।। ७.१११.७ ॥
Vachakaya cha datavyam vastram dhenum hiranyakam
Vachake paritushte tu tushtah syuh sarvadevatah
111.8
एतदाख्यानमायुष्यं पठन्रामायणं नरः ।
सपुत्रपौत्रो लोके ऽस्मिन्प्रेत्य चेह महीयते ।। ७.१११.८ ॥
Etadakhyanamayushyam pathanramayanam narah
Saputrapautro loke sminpretya cheha mahiyate
111.9
अयोध्या ऽपि पुरी रम्या शून्या वर्षगणान्बहून् ।
ऋषभं प्राप्य राजानं निवासमुपयास्यति ।। ७.१११.९ ॥
Ayodhya pi puri ramya shunya varshagananbahun
Rishabham prapya rajanam nivasamupayasyati
111.10
एतदाख्यानमायुष्यं सभविष्यं सहोत्तरम् ।
कृतवान्प्रचेतसः पुत्रस्तद्ब्रह्माप्यन्वमन्यत ।। ७.१११.१० ॥
Etadakhyanamayushyam sabhavishyam sahottaram
Kritavanprachetasah putrastadbrahmapyanvamanyata
111.11
अश्वमेधसहस्रस्य वाजपेयायुतस्य च ।
लभते श्रावणादेव सर्गस्यैकस्य मानवः ।। ७.१११.११ ॥
Ashvamedhasahasrasya vajapeyayutasya cha
Labhate shravanadeva sargasyaikasya manavah
111.12
प्रयागादीनि तीर्थानि गङ्गाद्याः सरितस्तथा ।
नैमिशादीन्यरण्यानि कुरुक्षेत्रादिकान्यपि ।गतानि तेन लोके ऽस्मिन्येन रामायणं श्रुतम् ।। ७.१११.१२ ॥
Prayagadini tirthani gangadyah saritastatha
Naimishadinyaranyani kurukshetradikanyapi, gatani tena loke sminyena ramayanam shrutam
111.13
हेमभारं कुरुक्षेत्रे ग्रस्ते भानौ प्रयच्छति ।
यश्च रामायणं लोके शृणोति सदृशावुभौ ।। ७.१११.१३ ॥
Hemabharam kurukshetre graste bhanau prayachchhati
Yashcha ramayanam loke shrinoti sadrishavubhau
111.14
सम्यक्छ्रद्धासमायुक्तः शृणुते राघवीं कथाम् ।
सर्वपापात्प्रमुच्येत विष्णुलोकं स गच्छति ।। ७.१११.१४ ॥
Samyakchhraddhasamayuktah shrinute raghavim katham
Sarvapapatpramuchyeta vishnulokam sa gachchhati
111.15
आदिकाव्यमिदं त्वार्षं पुरा वाल्मीकिना कृतम् ।
यः शृणोति सदा भक्त्या स गच्छेद्वैष्णवीं तनुम् ।। ७.१११.१५ ॥
Adikavyamidam tvarsham pura valmikina kritam
Yah shrinoti sada bhaktya sa gachchhedvaishnavim tanum
111.16
पुत्रदाराश्च वर्धन्ते सम्पदः सन्ततिस्तथा ।
सत्यमेतद्विदित्वा तु श्रोतव्यं नियतात्मभिः ।। ७.१११.१६ ॥
Putradarashcha vardhante sampadah santatistatha
Satyametadviditva tu shrotavyam niyatatmabhih
111.17
गायत्र्याश्च स्वरूपं तद्रामायणमनुत्तमम् ।
। ७.१११.१७ ॥
Gayatryashcha svarupam tadramayanamanuttamam
111.18
अपुत्रो लभते पुत्रमधनो लभते धनम् ।
सर्वपापैः प्रमुच्येत पदमप्यस्य यः पठेत् ।। ७.१११.१८ ॥
Aputro labhate putramadhano labhate dhanam
Sarvapapaih pramuchyeta padamapyasya yah pathet
111.19
यः पठेच्छृणुयान्नित्यं चरितं राघवस्य ह ।
भक्त्या निष्कल्मषो भूत्वा दीर्घमायुरवाप्नुयात् ।। ७.१११.१९ ॥
Yah pathechchhrinuyannityam charitam raghavasya ha
Bhaktya nishkalmasho bhutva dirghamayuravapnuyat
111.20
चिन्तयेद्राघवं नित्यं श्रेयः प्राप्तुं य इच्छति ।
श्रावयेदिदमाख्यानं ब्राह्मणेभ्यो दिने दिने ।। ७.१११.२० ॥
Chintayedraghavam nityam shreyah praptum ya ichchhati
Shravayedidamakhyanam brahmanebhyo dine dine
111.21
यस्त्विदं रघुनाथस्य चरितं सकलं पठेत् ।
सो ऽसुक्षये विष्णुलोकं गच्छत्येव न संशयः ।। ७.१११.२१ ॥
Yastvidam raghunathasya charitam sakalam pathet
So sukshaye vishnulokam gachchhatyeva na sanshayah
111.22
पिता पितामहस्तस्य तथैव प्रपितामहः ।
तत्पिता तत्पिता चैव विष्णुं यान्ति न संशयः ।। ७.१११.२२ ॥
Pita pitamahastasya tathaiva prapitamahah
Tatpita tatpita chaiva vishnum yanti na sanshayah
111.23
चतुर्वर्गप्रदं नित्यं चरितं राघवस्य तु ।
तस्माद्यत्नवता नित्यं श्रोतव्यं परमं सदा ।। ७.१११.२३ ॥
Chaturvargapradam nityam charitam raghavasya tu
Tasmadyatnavata nityam shrotavyam paramam sada
111.24
शृण्वन्रामायणं भक्त्या यः पादं पदमेव वा ।
स याति ब्रह्मणः स्थानं ब्रह्मणा पूज्यते सदा ।। ७.१११.२४ ॥
Shrinvanramayanam bhaktya yah padam padameva va
Sa yati brahmanah sthanam brahmana pujyate sada
111.25
एवमेतत्पुरावृत्तमाख्यानं भद्रमस्तु वः ।
प्रव्याहरत विस्रब्धं बलं विष्णोः प्रवर्धताम् ।। ७.१११.२५ ।।
Evametatpuravrittamakhyanam bhadramastu vah
Pravyaharata visrabdham balam vishnoh pravardhatam