Utshovসর্গ 122
122.1
এতচ্ছ্রুত্বা শুভং বাক্যং রাঘবেণ সুভাষিতম্ ।
ইদং শুভতরং বাক্যং ব্যাজহার মহেশ্বরঃ ।। ৬.১২২.১ ।।
122.2
পুষ্করাক্ষ মহাবাহো মহাবক্ষঃ পরন্তপ ।
দিষ্ট্যা কৃতমিদং কর্ম ত্বয়া শস্ত্রভৃতাং বর ।। ৬.১২২.২ ।।
122.3
দিষ্ট্যা সর্বস্য লোকস্য প্রবৃদ্ধং দারুণং তমঃ ।
অপাবৃত্তং ত্বয়া সঙ্খ্যে রাম রাবণজং ভয়ম্ ।। ৬.১২২.৩ ।।
122.4
আশ্বাস্য ভরতং দীনং কৌসল্যাং চ যশস্বিনীম্ ।
কৈকেয়ীং চ সুমিত্রাং চ দৃষ্ট্বা লক্ষ্মণমাতরম্ ।। ৬.১২২.৪ ।।
122.5
প্রাপ্য রাজ্যময়োধ্যায়াং নন্দয়িত্বা সুহৃজ্জনম্ ।
ইক্ষ্বাকূণাং কুলে বংশং স্থাপয়িত্বা মহাবল ।। ৬.১২২.৫ ।।
122.6
ইষ্ট্বা তুরগমেধেন প্রাপ্য চানুত্তমং যশঃ ।
ব্রাহ্মণেভ্যো ধনং দত্ত্বা ত্রিদিবং গন্তুমর্হসি ।। ৬.১২২.৬ ।।
122.7
এষ রাজা বিমানস্থঃ পিতা দশরথস্তব ।
কাকুত্স্থ মানুষে লোকে গুরুস্তব মহায়শাঃ ।। ৬.১২২.৭ ।।
122.8
ইন্দ্রলোকং গতঃ শ্রীমাংস্ত্বয়া পুত্রেণ তারিতঃ ।
লক্ষ্মণেন সহ ভ্রাত্রা ত্বমেনমভিবাদয় ।। ৬.১২২.৮ ।।
122.9
মহাদেববচঃ শ্রুত্বা কাকুত্স্থঃ সহলক্ষ্মণঃ ।
বিমানশিখরস্থস্য প্রণামমকরোৎ পিতুঃ ।। ৬.১২২.৯ ।।
122.10
দীপ্যমানং স্বয়া লক্ষ্ম্যা বিরজোম্বরধারিণম্ ।
লক্ষ্মণেন সহ ভ্রাত্রা দদর্শ পিতরং বিভুঃ ।। ৬.১২২.১০ ।।
122.11
হর্ষেণ মহতা ঽ ঽবিষ্টো বিমানস্থো মহীপতিঃ ।
প্রাণৈঃ প্রিয়তরং দৃষ্ট্বা পুত্রং দশরথস্তদা ।। ৬.১২২.১১ ।।
122.12
আরোপ্যাঙ্কং মহাবাহুর্বরাসনগতঃ প্রভুঃ ।
বাহুভ্যাং সম্পরিষ্বজ্য ততো বাক্যং সমাদদে ।। ৬.১২২.১২ ।।
122.13
ন মে স্বর্গো বহুমতঃ সম্মানশ্চ সুরর্ষিভিঃ ।
ত্বয়া রাম বিহীনস্য সত্যং প্রতিশৃণোমি তে ।। ৬.১২২.১৩ ।।
122.14
অদ্য ত্বাং নিহতামিত্রং দৃষ্ট্বা সম্পূর্ণমানসম্ ।
নিস্তীর্ণবনবাসং চ প্রীতিরাসীৎ পরা মম ।। ৬.১২২.১৪ ।।
122.15
কৈকেয্যা যানি চোক্তানি বাক্যানি বদতাং বর ।
তব প্রবাজনার্থানি স্থিতানি হৃদয়ে মম ।। ৬.১২২.১৫ ।।
122.16
ত্বাং তু দৃষ্ট্বা কুশলিনং পরিষ্বজ্য সলক্ষ্মণম্ ।
অদ্য দুঃখাদ্বিমুক্তো ঽস্মি নীহারাদিব ভাস্করঃ ।। ৬.১২২.১৬ ।।
122.17
তারিতো ঽহং ত্বয়া পুত্র সুপুত্রেণ মহাত্মনা ।
অষ্টাবক্রেণ ধর্মাত্মা তারিতো ব্রাহ্মণো যথা ।। ৬.১২২.১৭ ।।
122.18
ইদানীং তু বিজানামি যথা সৌম্য সুরেশ্বরৈঃ ।
বধার্থং রাবণস্যেদং বিহিতং পুরুষোত্তম ।। ৬.১২২.১৮ ।।
122.19
সিদ্ধার্থা খলু কৌসল্যা যা ত্বাং রাম গৃহং গতম্ ।
বনান্নিবৃত্তং সংহৃষ্টা দ্রক্ষ্যত্যরিনিষূদন ।। ৬.১২২.১৯ ।।
122.20
সিদ্ধার্থাঃ খলু তে রাম নরা যে ত্বাং পুরীং গতম্ ।
জলার্দ্রমভিষিক্তং চ দ্রক্ষ্যন্তি বসুধাধিপম্ ।। ৬.১২২.২০ ।।
122.21
অনুরক্তেন বলিনা শুচিনা ধর্মচারিণা ।
ইচ্ছামি ত্বামহং দ্রষ্টুং ভরতেন সমাগতম্ ।। ৬.১২২.২১ ।।
122.22
চতুর্দশ সমাঃ সৌম্য বনে নির্যাপিতাস্ত্বয়া ।
বসতা সীতয়া সার্ধং লক্ষ্মণেন চ ধীমতা ।। ৬.১২২.২২ ।।
122.23
নিবৃত্তবনবাসো ঽসি প্রতিজ্ঞা সফলা কৃতা ।
রাবণং চ রণে হত্বা দেবাস্তে পরিতোষিতাঃ ।। ৬.১২২.২৩ ।।
122.24
কৃতং কর্ম যশঃ শ্লাধ্যং প্রাপ্তং তে শত্রুসূদন ।
ভ্রাতৃভিঃ সহ রাজ্যস্থো দীর্ঘমায়ুরবাপ্নুহি ।ইতি ব্রুবাণং রাজানং রামঃ প্রাঞ্জলিরব্রবীৎ ।। ৬.১২২.২৪ ।।
122.25
কুরু প্রসাদং ধর্মজ্ঞ কৈকেয্যা ভরতস্য চ ।
সপুত্রাং ত্বাং ত্যজামীতি যদুক্তা কৈকয়ী ত্বয়া ।। ৬.১২২.২৫ ।।
122.26
স শাপঃ কেকয়ীং ঘোরঃ সপুত্রাং ন স্পৃশেৎ প্রভো ।
। ৬.১২২.২৬ ।।
122.27
স তথেতি মহারাজো রামমুক্ত্বা কৃতাঞ্জলিম্ ।
লক্ষ্মণং চ পরিষ্বজ্য পুনর্বাক্যমুবাচ হ ।। ৬.১২২.২৭ ।।
122.28
রামং শুশ্রূষতা ভক্ত্যা বৈদেহ্যা সহ সীতয়া ।
কৃতা মম মহাপ্রীতিঃ প্রাপ্তং ধর্মফলং চ তে ।। ৬.১২২.২৮ ।।
122.29
ধর্মং প্রাপ্স্যসি ধর্মজ্ঞ যশশ্চ বিপুলং ভুবি ।
রামে প্রসন্নে স্বর্গং চ মহিমানং তথৈব চ ।। ৬.১২২.২৯ ।।
122.30
রামং শুশ্রূষ ভদ্রং তে সুমিত্রানন্দবর্ধন ।
রামঃ সর্বস্য লোকস্য শুভেষ্বভিরতঃ সদা ।। ৬.১২২.৩০ ।।
122.31
এতে সেন্দ্রাস্ত্রয়ো লোকাঃ সিদ্ধাশ্চ পরমর্ষয়ঃ ।
অভিগম্য মহাত্মানমর্চন্তি পুরুষোত্তমম্ ।। ৬.১২২.৩১ ।।
122.32
এতত্তদুক্তমব্যক্তমক্ষরং ব্রহ্মনির্মিতম্ ।
দেবানাং হৃদয়ং সৌম্য গুহ্যং রামঃ পরন্তপঃ ।। ৬.১২২.৩২ ।।
122.33
অবাপ্তং ধর্মচরণং যশশ্চ বিপুলং ত্বয়া ।
রামং শুশ্রূষতা ভক্ত্যা বৈদেহ্যা সহ সীতয়া ।। ৬.১২২.৩৩ ।।
122.34
স তথোক্ত্বা মহাবাহুর্লক্ষ্মণং প্রাঞ্জলিং স্থিতম্ ।
উবাচ রাজা ধর্মাত্মা বৈদেহীং বচনং শুভম্ ।। ৬.১২২.৩৪ ।।
122.35
কর্তব্যো ন তু বৈদেহি মন্যুস্ত্যাগমিমং প্রতি ।
রামেম ত্বদ্বিশুদ্ধ্যর্থং কৃতমেতদ্ধিতৈষিণা ।। ৬.১২২.৩৫ ।।
122.36
ন ত্বং সুভ্রু সমাধেয়া পতিশুশ্রূষণং প্রতি ।
অবশ্যং তু ময়া বাচ্যমেষ তে দৈবতং পরম্ ।। ৬.১২২.৩৬ ।।
122.37
ইতি প্রতিসমাদিশ্য পুত্রৌ সীতাং তথা স্নুষাম্ ।
ইন্দ্রলোকং বিমানেন যয়ৌ দশরথো জ্বলন্ ।। ৬.১২২.৩৭ ।।
122.38
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্বাবিংশত্যুত্তরশততমঃ সর্গঃ ।
। ১২২ ।।