Utshovসর্গ 109
109.1
ততঃ প্রবৃত্তং সুক্রূরং রামরাবণয়োস্তদা ।
সুমহদ্দ্বৈরথং যুদ্ধং সর্বলোকভয়াবহম্ ।। ৬.১০৯.১ ।।
109.2
ততো রাক্ষসসৈন্যং চ হরীণাং চ মহদ্বলম্ ।
প্রগৃহীতপ্রহরণং নিশ্চেষ্টং সমতিষ্ঠত ।। ৬.১০৯.২ ।।
109.3
সম্প্রয়ুদ্ধৌ ততো দৃষ্ট্বা বলবন্নররাক্ষসৌ ।
ব্যাক্ষিপ্তহৃদয়াঃ সর্বে পরং বিস্ময়মাগতাঃ ।। ৬.১০৯.৩ ।।
109.4
নানাপ্রহরণৈর্ব্যগ্রৈর্ভুজৈর্বিস্মিতবুদ্ধয়ঃ ।
সর্পন্তং প্রেক্ষ্য সঙ্গ্রামং নাভিজগ্মুঃ পরস্পরম্ ।। ৬.১০৯.৪ ।।
109.5
রক্ষসাং রাবণং চাপি বানরাণাং চ রাঘবম্ ।
পশ্যতাং বিস্মিতাক্ষাণাং সৈন্যং চিত্রমিবাবভৌ ।। ৬.১০৯.৫ ।।
109.6
তৌ তু তত্র নিমিত্তানি দৃষ্ট্বা রাবণরাঘবৌ ।
কৃতবুদ্ধী স্থিরামর্ষৌ যুয়ুধাতে ব্যভীতবৎ ।। ৬.১০৯.৬ ।।
109.7
জেতব্যমিতি কাকুত্স্থো মর্তব্যমিতি রাবণঃ ।
ধৃতৌ স্ববীর্যসর্বস্বং যুদ্ধে ঽদর্শয়তাং তদা ।। ৬.১০৯.৭ ।।
109.8
ততঃ ক্রোধাদ্দশগ্রীবঃ শরান্ সন্ধায় বীর্যবান্ ।
মুমোচ ধ্বজমুদ্দিশ্য রাঘবস্য রথে স্থিতম্ ।। ৬.১০৯.৮ ।।
109.9
তে শরাস্তমনাসাদ্য পুরন্দররথধ্বজম্ ।
রথশক্তিং পরামৃশ্য নিপেতুর্ধরণীতলে ।। ৬.১০৯.৯ ।।
109.10
ততো রামো ঽভিসঙ্ক্রুদ্ধশ্চাপমায়ম্য বীর্যবান্ ।
কৃতপ্রতিকৃতং কর্তুং মনসা সম্প্রচক্রমে ।। ৬.১০৯.১০ ।।
109.11
রাবণধ্বজমুদ্দিশ্য মুমোচ নিশিতং শরম্ ।
মহাসর্পমিবাসহ্যং জ্বলন্তং স্বেন তেজসা ।। ৬.১০৯.১১ ।।
109.12
জগাম স মহীং ছিত্ত্বা দশগ্রীবধ্বজং শরঃ ।
স নিকৃত্তো ঽপতদ্ভূমৌ রাবণস্য রথধ্বজঃ ।। ৬.১০৯.১২ ।।
109.13
ধ্বজস্যোন্মথনং দৃষ্ট্বা রাবণঃ সুমহাবলঃ ।
সম্প্রদীপ্তো ঽভবৎ ক্রোধাদমর্ষাৎ প্রদহন্নিব ।। ৬.১০৯.১৩ ।।
109.14
স রোষবশমাপন্নঃ শরবর্ষং মহদ্বমন্ ।
রামস্য তুরগান্ দীপ্তৈঃ শরৈর্বিব্যাধ রাবণঃ ।। ৬.১০৯.১৪ ।।
109.15
তে বিদ্ধা হরয়স্তত্র নাস্খলন্নাপি বভ্রমুঃ ।
বভূবুঃ স্বস্থহৃদয়াঃ পদ্মনালৈরিবাহতাঃ ।। ৬.১০৯.১৫ ।।
109.16
তেষামসম্ভ্রমং দৃষ্ট্বা বাজিনাং রাবণস্তদা ।
ভূয় এব সুসঙ্ক্রুদ্ধঃ শরবর্ষং মুমোচ হ ।। ৬.১০৯.১৬ ।।
109.17
গদাশ্চ পরিঘাশ্চৈব চক্রাণি মুসলানি চ ।
গিরিশৃঙ্গাণি বৃক্ষাংশ্চ তথা শূলপরশ্বধান্ ।। ৬.১০৯.১৭ ।।
109.18
মায়াবিহিতমেতত্তু শস্ত্রবর্ষমপাতয়ৎ ।
তুমুলং ত্রাসজননং ভীমং ভীমপ্রতিস্বনম্ ।। ৬.১০৯.১৮ ।।
109.19
তদ্বর্ষমভবদ্যুদ্ধে নৈকশস্ত্রময়ং মহৎ ।
বিমুচ্য রাঘবরথং সমান্তাদ্বানরে বলে ।। ৬.১০৯.১৯ ।।
109.20
সায়কৈরন্তরিক্ষং চ চকারাশু নিরন্তরম্ ।
সহস্রশস্ততো বাণানশ্রান্তহৃদয়োদ্যমঃ ।মুমোচ চ দশগ্রীবো নিস্সঙ্গেনা ঽন্তরাত্মনা ।। ৬.১০৯.২০ ।।
109.21
ব্যায়চ্ছমানং তং দৃষ্ট্বা তত্পরং রাবণং রণে ।
প্রহসন্নিব কাকুত্স্থঃ সন্দধে সায়কান্ শিতান্ ।। ৬.১০৯.২১ ।।
109.22
স মুমোচ ততো বাণান্ রণে শতসহস্রশঃ ।
তান্ দৃষ্ট্বা রাবণশ্চক্রে স্বশরৈঃ খং নিরন্তরম্ ।। ৬.১০৯.২২ ।।
109.23
ততস্তাভ্যাং প্রমুক্তেন শরবর্ষেণ ভাস্বতা ।
শরবদ্ধমিবাভাতি দ্বিতীয়ং ভাস্বদম্বরম্ ।। ৬.১০৯.২৩ ।।
109.24
নানিমিত্তো ঽভবদ্বাণো নাতিভেত্তা ন নিষ্ফলঃ ।
। ৬.১০৯.২৪ ।।
109.25
অন্যোন্যমভিসংহত্য নিপেতুর্ধরণীতলে ।
তথা বিসৃজতোর্বাণান্ রামরাবণয়োর্মৃধে ।। ৬.১০৯.২৫ ।।
109.26
প্রায়ুদ্ধ্যতামবিচ্ছিন্নমস্যন্তৌ সব্যদক্ষিণম্ ।
চক্রতুশ্চ শরৌঘৈস্তৌ নিরুচ্ছ্বাসমিবাম্বরম্ ।। ৬.১০৯.২৬ ।।
109.27
রাবণস্য হয়ান্ রামো হয়ান্ রামস্য রাবণঃ ।
জঘ্নতুস্তৌ তথা ঽন্যোন্যং কৃতানুকৃতকারিণৌ ।। ৬.১০৯.২৭ ।।
109.28
এবং তৌ তু সুসঙ্ক্রুদ্ধৌ চক্রতুর্যুদ্ধমদ্ভুতম্ ।
মুহূর্তমভবদ্যুদ্ধং তুমুলং রোমহর্ষণম্ ।। ৬.১০৯.২৮ ।।
109.29
প্রয়ুধ্যমানৌ সমরে মহাবলৌ শিতৈঃ শরৈ রাবণলক্ষ্মণাগ্রজৌ ।
ধ্বজাবপাতেন স রাক্ষসাধিপো ভৃশং প্রচুক্রোধ তদা রঘূত্তমে ।। ৬.১০৯.২৯ ।।
109.30
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে নবোত্তরশততমঃ সর্গঃ ।
। ১০৯ ।।