সর্গ 70

70.1

তৌ তু তত্র স্থিতৌ দৃষ্ট্বা ভ্রাতরৌ রাম লক্ষ্মণৌ ।
বাহু পাশ পরিক্ষিপ্তৌ কবন্ধো বাক্যম্ অব্রবীৎ ॥৩-৭০-১॥

তিষ্ঠতঃ কিম্ নু মাম্ দৃষ্ট্বা ক্ষুধা আর্তম্ ক্ষত্রিয় ঋষভৌ ।
আহার অর্থম্ তু সন্দিষ্টৌ দৈবেন গত চেতসৌ ॥৩-৭০-২॥

তৎ শ্রুত্বা লক্ষ্মণো বাক্যম্ প্রাপ্ত কালম্ হিতম্ তদা ।
উবাচ আর্তিম্ সমাপন্নো বিক্রমে কৃত নিশ্চয়ঃ ॥৩-৭০-৩॥

ত্বাম্ চ মাম্ চ পুরা তূর্ণম্ আদত্তে রাক্ষস অধমঃ ।
তস্মাৎ অসিভ্যাম্ অস্য আশু বাহূ চিন্দাবহে গুরূ ॥৩-৭০-৪॥

ভিষণো অয়ম্ মহাকায়ো রাক্ষসো ভুজ বিক্রমঃ ।
লোকম্ হি অতি জিতম্ কৃত্বা হি অবাম্ হন্তুম্ ইহ ইচ্ছতি ॥৩-৭০-৫॥

নিশ্চেষ্টানাম্ বধো রাজন্ কুত্স্তিতো জগতী পতেঃ ।
ক্রতু মধ্য উপনীতানাম্ পশূনাম্ ইব রাঘব ॥৩-৭০-৬॥

এতৎ সংজল্পিতম্ শ্রুত্বা তয়োঃ ক্রুদ্ধঃ তু রাক্ষসঃ ।
বিদার্য আস্যম্ ততো রৌদ্রম্ তৌ ভক্ষয়িতুম্ আরভৎ ॥৩-৭০-৭॥

ততঃ তৌ দেশ কালজ্ঞৌ খড্গাভ্যাম্ এব রাঘবৌ ।
অচ্ছিন্দতাম্ সুসংহৃষ্টৌ বাহূ তস্য অংস দেশতঃ ॥৩-৭০-৮॥

দক্ষিণো দক্ষিণম্ বাহুম্ অসক্তম্ অসিনা ততঃ ।
চিচ্ছেদ রামো বেগেন সব্যম্ বীরঃ তু লক্ষ্মণঃ ॥৩-৭০-৯॥

স পপাত মহাবাহুঃ চিন্ন বাহুঃ মহা স্বনঃ ।
খম্ চ গাম্ চ দিশঃ চৈব নাদয়ন্ জলদো যথা ॥৩-৭০-১০॥

স নিকৃত্তৌ ভুজৌ দৃষ্ট্বা শোণিত ওঘ পরিপ্লুতঃ ।
দীনঃ পপ্রচ্ছ তৌ বীরৌ কৌ যুবাম্ ইতি দানবঃ ॥৩-৭০-১১॥

ইতি তস্য ব্রুবাণস্য লক্ষ্মণঃ শুভ লক্ষণঃ ।
শশংস তস্য কাকুত্স্থম্ কবংধস্য মহাবলঃ ॥৩-৭০-১২॥

অয়ম্ ইক্ষ্বাকু দায়াদো রামো নাম জনৈঃ শ্রুতঃ ।
তস্য এব অবরজম্ বিদ্ধি ভ্রাতরম্ মাম্ চ লক্ষ্মণম্ ॥৩-৭০-১৩॥

মাত্রা প্রতিহতো রাজ্যে রামঃ প্রবাজিতো বনম্ ।
ময়া সহ চরতি এষ ভার্যয়া চ মহৎ বনম্ ॥৩-৭০-১৪॥

অস্য দেব প্রভাবস্য বসতো বিজনে বনে ।
রক্ষসা অপহৃতা ভার্যা যাম্ ইচ্ছন্তৌ ইহ আগতৌ ॥৩-৭০-১৫॥

ত্বম্ তু কো বা কিম্ অর্থম্ বা কবন্ধ সদৃশো বনে ।
আস্যেন উরসি দীপ্তেন ভগ্ন জন্ঘো বিচেষ্টসে ॥৩-৭০-১৬॥

এবম্ উক্তঃ কবংধঃ তু লক্ষ্মণেন উত্তরম্ বচঃ ।
উবাচ পরম প্রীতঃ তৎ ইন্দ্র বচনম্ স্মরন্ ॥৩-৭০-১৭॥

স্বাগতম্ বাম্ নরব্যাঘ্রৌ দিষ্ট্যা পশ্যামি বাম্ অহম্ ।
দিষ্ট্যা চ ইমৌ নিকৃত্তৌ মে যুবাভ্যাম্ বাহু বন্ধনৌ ॥৩-৭০-১৮॥

বিরূপম্ যৎ চ মে রূপম্ প্রাপ্তম্ হি অবিনয়াৎ যথা ।
তৎ মে শৃণু নরব্যাঘ্র তত্ত্বতঃ শংসতঃ তব ॥৩-৭০-১৯॥