সর্গ 41

41.1

আজ্ঞপ্তো রাবণেন ইত্থম্ প্রতিকূলম্ চ রাজবৎ ।
অব্রবীৎ পরুষম্ বাক্যম্ নিঃশন্কো রাক্ষসাধিপম্ ॥৩-৪১-১॥

কেন অয়ম্ উপদিষ্টঃ তে বিনাশঃ পাপ কর্মণা ।
স পুত্রস্য স রাজ্যস্য স অমাত্যস্য নিশাচর ॥৩-৪১-২॥

কঃ ত্বয়া সুখিনা রাজন্ ন অভিনন্দতি পাপকৃৎ ।
কেন ইদম্ উপদিষ্টম্ তে মৃত্যু দ্বারম্ উপায়তঃ ॥৩-৪১-৩॥

শত্রবঃ তব সুব্যক্তম্ হীন বীর্যা নিশা চর ।
ইচ্ছন্তি ত্বাম্ বিনশ্যন্তম্ উপরুদ্ধম্ বলীয়সা ॥৩-৪১-৪॥

কেন ইদম্ উপদিষ্টম্ তে ক্ষুদ্রেণ অহিত বুদ্ধিনা ।
যঃ ত্বাম্ ইচ্ছতি নশ্যন্তম্ স্ব কৃতেন নিশাচর ॥৩-৪১-৫॥

বধ্যাঃ খলু ন বধ্যন্তে সচিবাঃ তব রাবণ ।
যে ত্বাম্ উত্পথম্ আরূঢম্ ন নিগৃহ্ণন্তি সর্বশঃ ॥৩-৪১-৬॥

অমাত্যৈঃ কাম বৃত্তো হি রাজা কাপথম্ আশ্রিতঃ ।
নিগ্রাহ্যঃ সর্বথা সদ্ভিঃ ন নিগ্রাহ্যো নিগৃহ্যসে ॥৩-৪১-৭॥

ধর্মম্ অর্থম্ চ কামম্ চ যশঃ চ জয়তাম্ বর ।
স্বামি প্রসাদাৎ সচিবাঃ প্রাপ্নুবন্তি নিশাচর ॥৩-৪১-৮॥

বিপর্যয়ে তু তৎ সর্বম্ ব্যর্থম্ ভবতি রাবণ ।
ব্যসনম্ স্বামি বৈগুণ্যাৎ প্রাপ্নুবন্তি ইতরে জনাঃ ॥৩-৪১-৯॥

রাজ মূলো হি ধর্মঃ চ জয়ঃ চ জয়তাম্ বর ।
তস্মাৎ সর্বাসু অবস্থাসু রক্ষিতব্যো নরাধিপাঃ ॥৩-৪১-১০॥

রাজ্যম্ পালয়িতুম্ শক্যম্ ন তীক্ষ্ণেন নিশাচর ।
ন চ অপি প্রতিকূলেন ন অবিনীতেন রাক্ষস ॥৩-৪১-১১॥

যে তীক্ষ্ণ মংত্রাঃ সচিবা ভজ্যন্তে সহ তেন বৈ ।
বিষমে তুরগাঃ শীঘ্রা মন্দ সারথয়ো যথা ॥৩-৪১-১২॥

বহবঃ সাধবো লোকে যুক্ত ধর্মম্ অনুষ্ঠিতাঃ ।
পরেষাম্ অপরাধেন বিনষ্টাঃ স পরিচ্ছদাঃ ॥৩-৪১-১৩॥

স্বামিনা প্রতিকূলেন প্রজাঃ তীক্ষ্ণেন রাবণ ।
রক্ষ্যমাণা ন বর্ধন্তে মেষা গোমায়ুনা যথা ॥৩-৪১-১৪॥

অবশ্যম্ বিনশিষ্যন্তি সর্বে রাবণ রাক্ষসাঃ ।
যেষাম্ ত্বম্ কর্কশো রাজা দুর্বুদ্ধিঃ অজিত ইন্দ্রিয়ঃ ॥৩-৪১-১৫॥

তদ্ ইদম্ কাক তালীয়ম্ ঘোরম্ আসাদিতম্ ময়া ।
অত্র ত্বম্ শোচনীয়ো অসি স সৈন্যো বিনশিষ্যসি ॥৩-৪১-১৬॥

মাম্ নিহত্য তু রামো অসৌ অচিরাৎ ত্বাম্ বধিষ্যতি ।
অনেন কৃত কৃত্যো অস্মি ম্রিয়ে চ অপি অরিণা হতঃ ॥৩-৪১-১৭॥

দর্শনাৎ এব রামস্য হতম্ মাম্ অবধারয় ।
আত্মানম্ চ হতম্ বিদ্ধি হৃত্বা সীতাম্ স বান্ধবম্ ॥৩-৪১-১৮॥

আনয়িষ্যসি চেৎ সীতাম্ আশ্রমাৎ সহিতো ময়া ।
ন এব ত্বম্ অসি ন এব অহম্ ন এব লংকা ন রাক্ষসাঃ ॥৩-৪১-১৯॥

নিবার্যমাণঃ তু ময়া হিত এষিণান মৃষ্যসে বাক্যম্ ইদম্ নিশাচর ।
পরেত কল্পা হি গত আয়ুষো নরাহিতম্ ন গৃহ্ণন্তি সুহৃদ্ভিঃ ঈরিতম্ ॥৩-৪১-২০॥