Utshovসর্গ 3
3.1
তেষামঞ্জলিপদ্মানি প্রগৃহীতানি সর্বশঃ ।
প্রতিগৃহ্যাব্রবীদ্রাজা তেভ্যঃ প্রিয়হিতং বচঃ ॥২-৩-১॥
3.2
অহোঽস্মি পরমপ্রীতঃ প্রভাবশ্চাতুলো মম ।
যন্মে জ্যেষ্ঠং প্রিয়ং পুত্রং যৌবরাজ্যস্থ মিচ্ছথ ॥২-৩-২॥
3.3
ইতি প্রত্যর্চ্য তান্ রাজা ব্রাহ্মণানিদ মব্রবীৎ ।
বসিষ্ঠং বামদেবং চ তেষামেবোপশৃণ্বতাম্ ॥২-৩-৩॥
3.4
চৈত্রঃ শ্রীমানয়ং মাসঃ পুণ্যঃ পুষ্পিতকাননঃ ।
যৌবরাজ্যায় রামস্য সর্বমেবোপকল্প্যতাম্ ॥২-৩-৪॥
3.5
রাজ্ঞস্তূপরতে বাক্যে জনঘোষো মহানভূৎ ।
শনৈস্তস্মিন্ প্রশান্তে চ জনঘোষে জনাধিপঃ ॥২-৩-৫॥
3.6
বসিষ্ঠং মুনিশার্দূলং রাজা বচনমব্রবীৎ ।
অভিষেকায় রামস্য যত্কর্ম সপরিচ্ছদম্ ॥২-৩-৬॥
3.7
তদদ্য ভগবন্ সর্বমাজ্ঞাপয়িতু মর্হসি ।
তচ্ছ্রুত্বা ভূমিপালস্য বসিষ্ঠো দ্বিজসত্তমঃ ॥২-৩-৭॥
3.8
আদিদেশাগ্রতো রাজ্ঞঃ স্থিতান্ যুক্তান্ কৃতাঞ্জলীন্ ।
সুবর্ণাদীনি রত্নানি বলীন্ সর্বৌষধীরপি ॥২-৩-৮॥
3.9
শুক্লমাল্যাংশ্চ লাজাংশ্চ পৃথক্চ মধুসর্পিষী ।
অহতানি চ বাসাংসি রথং সর্বায়ুধান্যপি ॥২-৩-৯॥
3.10
চতুরঙ্গবলং চৈব গজং চ শুভলক্ষণম্ ।
চামরব্যজনে শ্বেতে ধ্বজং ছত্রং চ পাণ্ডুরম্ ॥২-৩-১০॥
3.11
শতং চ শাতকুম্ভানাং কুম্ভানামগ্নিবর্চসাম্ ।
হিরণ্যশৃঙ্গমৃষভং সমগ্রং ব্যাঘ্রচর্ম চ ॥২-৩-১১॥
3.12
উপস্থাপয়ত প্রাতরগ্ন্যগারং মহীপতেঃ ।
যচ্চান্যত্কিঞ্চিদেষ্টব্যং তত্সর্বমুপকল্প্যতাম্ ॥২-৩-১২॥
3.13
অস্তঃপুরস্য দ্বারাণি সর্বস্য নগরস্য চ ।
চন্দনস্রগ্ভিরর্চ্যন্তাং ধূপৈশ্চ ঘ্রাণহারিভিঃ ॥২-৩-১৩॥
3.14
প্রশস্তমন্নং গুণবদ্ধধিক্ষীরোপসেচনম্ ।
দ্বিজানাং শতসাহস্রে যত্প্রকামমলং ভবেৎ ॥২-৩-১৪॥
3.15
সত্কৃত্য দ্বিজমুখ্যানাং শ্বঃ প্রভাতে প্রদীয়তাম্ ।
ঘৃতং দধি চ লাজাশ্চ দক্ষিণাশ্চাপি পুষ্কলাঃ ॥২-৩-১৫॥
3.16
সূর্যেঽভ্যুদিতমাত্রে শ্বো ভবিতা স্বস্তিবাচনম্ ।
ব্রাহ্মণাশ্চ নিমন্ত্র্যন্তাং কল্প্যন্তামাসনানি চ ॥২-৩-১৬॥
3.17
আবধ্যন্তাং পতাকাশ্চ রাজমার্গশ্চ সিচ্যতাম্ ।
সর্বে চ তাLআবচরা গণিকাশ্চ স্বলংকৃতাঃ ॥২-৩-১৭॥
3.18
কক্ষ্যাং দ্বিতীয়ামাসাদ্য তিষ্ঠন্তু নৃপবেশ্মনঃ ।
দেবায়তনচৈত্যেষু সান্নভক্ষাঃ সদক্ষিণাঃ ॥২-৩-১৮॥
3.19
উপস্থাপয়িতব্যাঃ স্যুর্মাল্যয়োগ্যাঃ পৃথক্ পৃথক্ ।
দীর্ঘাসিবদ্ধা যোধাশ্চ সন্নদ্ধা মৃষ্টবাসসঃ ॥২-৩-১৯॥
3.20
মহারাজাঙ্গণং সর্বে প্রবিশন্তু মহোদয়ম্ ।
এবং ব্যাদিশ্য বিপ্রৌ তৌ ক্রিয়াস্তত্র সুনিষ্ঠিতৌ ॥২-৩-২০॥
3.21
চক্রতুশ্চৈব যচ্ছেষং পার্থিবায় নিবেদ্য চ ।
কৃতমিত্যেব চাব্রূতামভিগম্য জগত্পতিম্ ॥২-৩-২১॥
3.22
যথোক্তবচনং প্রীতৌ হর্ষয়ুক্তৌ দ্বিজর্ষভৌ ।
ততঃ সুমন্ত্রং দ্যুতিমান্ রাজা বচনমব্রবীৎ ॥২-৩-২২॥
3.23
রামঃ কৃতাত্মা ভবতা শীঘ্রমানীয়তামিতি ।
স তথেতি প্রতিজ্ঞায় সুমন্ত্রো রাজশাসনাৎ ॥২-৩-২৩॥
3.24
রামং তত্রানয়াংচক্রে রথেন রথিনাং বরম্ ।
অথ তত্র সমাসীনাস্তদা দশরথং নৃপম্ ॥২-৩-২৪॥
3.25
প্রাচ্যোদীচ্যাঃ প্রতীচ্যাশ্চ দাক্ষিণাত্যাশ্চ ভূমিপাঃ ।
ম্লেচ্ছাশ্চার্যাশ্চ যে চান্যে বনে শৈলান্তবাসিনঃ ॥২-৩-২৫॥
3.26
উপাসাঞ্চক্রিরে সর্বে তং দেবা ইব বাসবম্ ।
তেষাং মধ্যে স রাজর্ষির্মরুতামিব বাসবঃ ॥২-৩-২৬॥
3.27
প্রাসাদস্থো রথগতং দদর্শায়ান্ত মাত্মজম্ ।
গন্ধর্বরাজপ্রতিমং লোকে বিখ্যাতপৌরুষম্ ॥২-৩-২৭॥
3.28
দীর্ঘ বাহুং মহসত্ত্বং মত্তমাতঙ্গগামিনম্ ।
চন্দ্রকান্তাননং রামমতীব প্রিয়দর্শনম্ ॥২-৩-২৮॥
3.29
রূপৌদার্যগুণৈঃ পুংসাং দৃষ্টিচিত্তাপহারিণম্ ।
ঘর্মাভিতপ্তাঃ পর্জন্যং হ্লাদয়ন্তমিব প্রজাঃ ॥২-৩-২৯॥
3.30
ন ততর্প সমায়ান্তং পশ্যমানো নরাধিপঃ ।
অবতার্য সুমন্ত্রস্তং রাঘবং স্যন্দনোত্তমাৎ ॥২-৩-৩০॥
3.31
পিতুঃ সমীপং গচ্ছন্তং প্রাঞ্জলিঃ পৃষ্ঠতোঽন্বগাৎ ।
স তং কৈলাসশৃঙ্গাভং প্রাসাদং নরপুঙ্গবঃ ॥২-৩-৩১॥
3.32
আরুরোহ নৃপং দ্রষ্টুং সহ সূতেন রাঘবঃ ।
স প্রাঞ্^জলিরভিপ্রেত্য প্রণতঃ পিতুরন্তিকে ॥২-৩-৩২॥
3.33
নাম স্বং শ্রাবয়ন্ রামো ববন্ধে চরণৌ পিতুঃ ।
তং দৃষ্ট্বা প্রণতং পার্শ্বে কৃতাঞ্জলিপুটং নৃপঃ ॥২-৩-৩৩॥
3.34
গৃহ্যাঞ্জলৌ সমাকৃষ্য সস্বজে প্রিয়মাত্মজম্ ।
তস্মৈ চাভ্যুদিতং দিব্যং মণিকাঞ্চনভূষিতং ॥২-৩-৩৪॥
3.35
দিদেশ রাজা রুচিরং রামায় পরমাসনম্ ।
তদাসনবরং প্রাপ্য ব্যদীপয়ত রাঘবঃ ॥২-৩-৩৫॥
3.36
স্বয়েব প্রভয়া মেরুমুদয়ে বিমলো রবিঃ ।
তেন বিভ্রাজতা তত্র সা সভাভিব্যরোচত ॥২-৩-৩৬॥
3.37
বিমলগ্রহনক্ষত্রা শারদী দ্যৌরিবেন্দুনা ।
তং পশ্যমানো নৃপতি স্তুতোওষ প্রিয়মাত্মজম্ ॥২-৩-৩৭॥
3.38
অলঙ্কৃতমিবাত্মানমাদর্শতলসংস্থিতম্ ।
স তং সস্মিতমাভাষ্য পুত্রং পুত্রবতাং বরঃ ॥২-৩-৩৮॥
3.39
উবাচেদং বচো রাজা দেবেন্দ্রমিব কাশ্যপঃ ।
জ্যেষ্ঠায়ামসি মে পত্ন্যাং সদৃশ্যাং সদৃশঃ সুতঃ ॥২-৩-৩৯॥
3.40
উত্পন্নস্ত্বং গুণশ্রেষ্ঠো মম রামাত্মজঃ প্রিয়ঃ ।
যতস্ত্বয়া প্রজাশ্চেমাঃ স্বগুণৈরনুরঞ্জিতাঃ ॥২-৩-৪০॥
3.41
তস্মাত্ত্বং পুষ্যয়োগেন যৌবরাজ্যমবাপ্নুহি ।
কামতস্ত্বং প্রকৃত্যৈব বিনীতো গুণবানসি ॥২-৩-৪১॥
3.42
গুণবত্যপি তু স্নেহাত্পুত্র বক্ষ্যামি তে হিতম্ ।
ভূয়ো বিনয়মাস্থায় ভব নিত্যং জিতেন্দ্রিয়ঃ ॥২-৩-৪২॥
3.43
কামক্রোধসমুত্থানি ত্যজেথা ব্যসনানি চ ।
পরোক্ষয়া বর্তমানো বৃত্ত্যা প্রত্যক্ষয়া তথা ॥২-৩-৪৩॥
3.44
অমাত্যপ্রভৃতীঃ সর্বাঃ প্রকৃতীশ্চানুরঞ্জয় ।
কোষ্ঠাগারায়ুধাগারৈঃ কৃত্বা সন্নি চয়ান্ বহূন্ ॥২-৩-৪৪॥
3.45
তুষ্টানুরক্তপ্রকৃতির্যঃ পালয়তি মেদিনীম্ ।
তস্য নন্দন্তি মিত্রাণি লব্ধ্বাঽমৃতমিবাঽমরাঃ ॥২-৩-৪৫॥
3.46
তস্মাত্ত্বমপি চাত্মানং নিয়ম্যৈবং সমাচর ।
তচ্ছ্রুত্বা সুহৃদস্তস্য রামস্য প্রিয়কারিণঃ ॥২-৩-৪৬॥
3.47
ত্বরিতাঃ শীঘ্রমভ্যেত্য কৌসল্যায়ৈ ন্যবেদয়ন্ ।
সা হিরণ্যং চ গাশ্চৈব রত্নানি বিবিধানি চ ॥২-৩-৪৭॥
3.48
ব্যাদিদেশ প্রিয়াখ্যেভ্যঃ কৌসল্যা প্রমদোত্তমা ।
অথাভিবাদ্য রাজানং রথমারুহ্য রাঘবঃ ॥২-৩-৪৮॥
3.49
যয়ৌ স্বং দ্যুতিমদ্বেশ্ম জনৌঘৈঃ প্রতিপূজিতঃ ।
তে চাপি পৌরা নৃপতের্বচস্ত ।চ্ছ্রুত্বা তদা লাভমিবেষ্টমাশু ।নরেন্দ্রমামন্ত্র্য গৃহাণি গত্বা ।দেবান্ সমানর্চুরতিপ্রহৃষ্টাঃ ॥২-৩-৪৯॥