সর্গ 68

68.1

জনকেন সমাদিষ্টা দূতাঃ তে ক্লান্ত বাহনাঃ ।
ত্রি রাত্রম্ উষিতা মার্গে তে অয়োধ্যাম্ প্রাবিশন্ পুরীম্ ॥১-৬৮-১॥

তে রাজ বচনাৎ গত্বা রাজবেশ্ম প্রবেশিতাঃ ।
দদৃশুঃ দেব সংকাশম্ বৃদ্ধম্ দশরথম্ নৃপম্ ॥১-৬৮-২॥

বদ্ধ অংজলি পুটাঃ সর্বে দূতা বিগত সাধ্বসাঃ ।
রাজানম্ প্রশ্রিতম্ বাক্যম্ অব্রুবন্ মধুর অক্ষরম্ ॥১-৬৮-৩॥

মৈথিলো জনকো রাজা স অগ্নি হোত্র পুরস্কৃতঃ ।
মুহুর্ মুহুর্ মধুরয়া স্নেহ সংরক্তয়া গিরা ॥১-৬৮-৪॥

কুশলম্ চ অব্যয়ম্ চৈব স উপাধ্যায় পুরোহিতম্ ।
জনকঃ ত্বাম্ মহারাজ পৃচ্ছতে স পুরঃ সরম্ ॥১-৬৮-৫॥

পৃষ্ট্বা কুশলম্ অব্যগ্রম্ বৈদেহো মিথিলাধিপঃ ।
কৌশিক অনুমতে বাক্যম্ ভবন্তম্ ইদম্ অব্রবীৎ ॥১-৬৮-৬॥

পূর্বম্ প্রতিজ্ঞা বিদিতা বীর্য শুল্কা মম আত্মজা ।
রাজানঃ চ কৃত অমর্ষা নির্বীর্যা বিমুখী কৃতাঃ ॥১-৬৮-৭॥

সা ইয়ম্ মম সুতা রাজন্ বিশ্বামিত্র পুরস্কৃতৈঃ ।
যদৃচ্ছয়া আগতৈঃ বীরৈঃ নির্জিতা তব পুত্রকৈঃ ॥১-৬৮-৮॥

তৎ চ রত্নম্ ধনুর্ দিব্যম্ মধ্যে ভগ্নম্ মহাত্মনা ।
রামেণ হি মহাবাহো মহত্যাম্ জন সংসদি ॥১-৬৮-৯॥

অস্মৈ দেয়া ময়া সীতা বীর্য শুল্কা মহাত্মনে ।
প্রতিজ্ঞাম্ তর্তুম্ ইচ্ছামি তৎ অনুজ্ঞাতুম্ অর্হসি ॥১-৬৮-১০॥

স উপাধ্যায়ো মহারাজ পুরোহিত পুরস্কৃতঃ ।
শীঘ্রম্ আগচ্ছ ভদ্রম্ তে দ্রষ্টুম্ অর্হসি রাঘবৌ ॥১-৬৮-১১॥

প্রতিজ্ঞাম্ মম রাজেন্দ্র নির্বর্তয়িতুম্ অর্হসি ।
পুত্রয়োঃ উভয়োঃ এব প্রীতিম্ ত্বম্ অপি লপ্স্যসে ॥১-৬৮-১২॥

এবম্ বিদেহ অধিপতিঃ মধুরম্ বাক্যম্ অব্রবীৎ ।
বিশ্বামিত্র অভ্যনুজ্ঞাতঃ শতাঅনন্দ মতে স্থিতঃ ॥১-৬৮-১৩॥

দূত বাক্যম্ তু তৎ শ্রুত্বা রাজা পরম হর্ষিতঃ ।
বসিষ্ঠম্ বামদেবম্ চ মংত্রিণঃ চ এবম্ অব্রবীৎ ॥১-৬৮-১৪॥

গুপ্তঃ কুশিক পুত্রেণ কৌসল্য আনন্দ বর্ধনঃ ।
লক্ষ্মণেন সহ ভ্রাত্রা বিদেহেষু বসতি অসৌ ॥১-৬৮-১৫॥

দৃষ্ট বীর্যঃ তু কাকুত্স্থো জনকেন মহাত্মনা ।
সংপ্রদানম্ সুতায়াঃ তু রাঘবে কর্তুম্ ইচ্ছতি ॥১-৬৮-১৬॥

যদি বো রোচতে বৃত্তম্ জনকস্য মহাত্মনঃ ।
পুরীম্ গচ্ছামহে শীঘ্রম্ মা ভূৎ কালস্য পর্যয়ঃ ॥১-৬৮-১৭॥

মংত্রিণো বাঢম্ ইতি আহুঃ সহ সর্বৈঃ মহর্ষিভিঃ ।
সু প্রীতঃ চ অব্রবীৎ রাজা শ্বঃ যাত্রা ইতি চ মংত্রিণঃ ॥১-৬৮-১৮॥

মংত্রিণঃ তু নরেন্দ্রস্য রাত্রিম্ পরম সত্কৃতাঃ ।
ঊষুঃ প্রমুদিতাঃ সর্বে গুণৈঃ সর্বৈঃ সমন্বিতাঃ ॥১-৬৮-১৯॥