সর্গ 34

34.1

কৃত উদ্বাহে গতে তস্মিন্ ব্রহ্মদত্তে চ রাঘব ।
অপুত্রঃ পুত্র লাভায় পৌত্রীম্ ইষ্টিম্ অকল্পয়ৎ ॥১-৩৪-১॥

ইষ্ট্যাম্ তু বর্তমানায়াম্ কুশনাভম্ মহীপতিম্ ।
উবাচ পরমোদারঃ কুশো ব্রহ্মসুতঃ তদা ॥১-৩৪-২॥

পুত্রঃ তে সদৃশঃ পুত্র ভবিষ্যতি সুধার্মিকঃ ।
গাধিম্ প্রাপ্স্যসি তেন ত্বম্ কীর্তিম্ লোকে চ শাশ্বতীম্ ॥১-৩৪-৩॥

এবম্ উক্ত্বা কুশো রাম কুশনাভম্ মহীপতিম্ ।
জগাম আকাশম্ আবিশ্য ব্রহ্ম লোকম্ সনাতনম্ ॥১-৩৪-৪॥

কস্যচিৎ তু অথ কালস্য কুশনাভস্য ধীমতঃ ।
জজ্ঞে পরম ধর্মিষ্ঠো গাধিঃ ইতি এব নামতঃ ॥১-৩৪-৫॥

স পিতা মম কাকুত্স্থ গাধিঃ পরম ধার্মিকঃ ।
কুশ বংশ প্রসূতো অস্মি কৌশিকো রঘুনংদন ॥১-৩৪-৬॥

পূর্বজা ভগিনী চ অপি মম রাঘব সুব্রতা ।
নাম্না সত্যবতী নাম ঋচীকে প্রতিপাদিতা ॥১-৩৪-৭॥

সশরীরা গতা স্বর্গম্ ভর্তারম্ অনুবর্তিনী ।
কৌশিকী পরমোদারা সা প্রবৃত্তা মহানদী ॥১-৩৪-৮॥

দিব্যা পুণ্য উদকা রম্যা হিমবংতম্ উপাশ্রিতা ।
লোকস্য হিতকার্য অর্থম্ প্রবৃত্তা ভগিনী মম ॥১-৩৪-৯॥

ততো অহম্ হিমবৎ পার্শ্বে বসামি নিয়তঃ সুখম্ ।
ভগিন্যাম্ স্নেহ সংয়ুক্তঃ কৌশিক্যা রঘুনংদন ॥১-৩৪-১০॥

সা তু সত্যবতী পুণ্যা সত্যে ধর্মে প্রতিষ্ঠিতা ।
পতিব্রতা মহাভাগা কৌশিকী সরিতাম্ বরা ॥১-৩৪-১১॥

অহম্ হি নিয়মাৎ রাম হিত্বা তাম্ সমুপাগতঃ ।
সিদ্ধ আশ্রমম্ অনুপ্রাপ্তঃ সিদ্ধো অস্মি তব তেজসা ॥১-৩৪-১২॥

এষা রাম মম উত্পত্তিঃ স্বস্য বংশস্য কীর্তিতা ।
দেশস্য চ মহাবাহো যন্ মাম্ ত্বম্ পরিপৃচ্ছসি ॥১-৩৪-১৩॥

গতো অর্ধ রাত্রঃ কাকুত্স্থ কথাঃ কথয়তো মম ।
নিদ্রাম্ অভ্যেহি ভদ্রম্ তে মা ভূৎ বিঘ্নো অধ্বনি ইহ নঃ ॥১-৩৪-১৪॥

নিষ্পন্দাঃ তরবঃ সর্বে নিলীনা মৃগ পক্ষিণঃ ।
নৈশেন তমসা ব্যাপ্তা দিশঃ চ রঘুনংদন ॥১-৩৪-১৫॥

শনৈঃ বিসৃজ্যতে সংধ্যা নভো নেত্রৈঃ ইব আবৃতম্ ।
নক্ষত্র তারা গহনম্ জ্যোতির্ভিঃ অবভাসতে ॥১-৩৪-১৬॥

উত্তিষ্ঠতে চ শীতাংশুঃ শশী লোক তমো নুদঃ ।
হ্লাদয়ন্ প্রাণিনাম্ লোকে মনাংসি প্রভয়া স্বয়া ॥১-৩৪-১৭॥

নৈশানি সর্ব ভূতানি প্রচরংতি ততঃ ততঃ ।
যক্ষ রাক্ষস সংঘাঃ চ রৌদ্রাঃ চ পিশিত অশনাঃ ॥১-৩৪-১৮॥

এবম্ উক্ত্বা মহাতেজা বিররাম মহামুনিঃ ।
সাধু সাধু ইতি তে সর্বে মুনয়ো হি অভ্যপূজয়ন্ ॥১-৩৪-১৯॥

কুশিকনাম্ অয়ম্ বংশো মহান্ ধর্মপরঃ সদা ।
ব্রহ্ম উপমা মহাত্মনঃ কুশবংশ্যা নরোত্তম ॥১-৩৪-২০॥

বিশেষেণ ভবান্ এব বিশ্বামিত্র মহায়শঃ ।
কৌশিকী সরিতাম্ শ্রেষ্ঠঃ কুল উদ্যোতকরী তব ॥১-৩৪-২১॥

মুদিতৈঃ মুনি শার্দূলৈঃ প্রশস্তঃ কুশিক আত্মজঃ ।
নিদ্রাম্ উপাগমৎ শ্রীমান্ অস্তম্ গত ইব অংশুমান্ ॥১-৩৪-২২॥

রামো অপি সহ সৌমিত্রিঃ কিংচিৎ আগত বিস্ময়ঃ ।
প্রশস্য মুনি শার্দূলম্ নিদ্রাম্ সমুপসেবতে ॥১-৩৪-২৩॥