সর্গ 25

25.1

অথ তস্য অপ্রমেয়স্য মুনের্ বচনম্ উত্তমম্ ।
শ্রুত্বা পুরুষ শার্দূলঃ প্রত্যুবাচ শুভাম্ গিরম্ ॥১-২৫-১॥

অল্প বীর্যা যদা যক্ষী শ্রূয়তে মুনিপুঙ্গব ।
কথম্ নাগ সহস্রস্য ধারয়তি অবলা বলম্ ॥১-২৫-২॥

ইতি উক্ত,ম্ বচনম্ শ্রুত্বা রাঘবস্য অমিত ওজসা ।
হর্ষয়ন্ শ্লক্ষ্ণয়া বচা স লক্ষ্মণম্ অরিন্দমম্ ॥১-২৫-৩॥

বিশ্বামিত্রোঽব্রবীৎ বাক্যম্ শৃণু যেন বলোত্কটা ।
বর দান কৃতম্ বীর্যম্ ধারয়তি অবলা বলম্ ॥১-২৫-৪॥

পূর্বম্ আসীৎ মহা যক্ষঃ সুকেতুর্ নাম বীর্যবান্ ।
অনপত্যঃ শুভাচারঃ স চ তেপে মহৎ তপঃ ॥১-২৫-৫॥

পিতামহঃ তু সুপ্রীতঃ তস্য যক্ষপতেঃ তদা ।
কন্যা রত্নম্ দদৌ রাম তাটকাম্ নাম নামতঃ ॥১-২৫-৬॥

দদৌ নাগ সহস্রস্য বলম্ চ অস্যাঃ পিতামহঃ ।
ন তু এব পুত্রম্ যক্ষায় দদৌ চ অসৌ মহায়শাঃ ॥১-২৫-৭॥

তাম্ তু বালাম্ বিবর্ধন্তীম্ রূপ যৌবন শালিনীম্ ।
জংভ পুত্রায় সুন্দায় দদৌ ভার্যাম্ যশস্বিনীম্ ॥১-২৫-৮॥

কস্যচিৎ তু অথ কালস্য যক্ষী পুত্রম্ ব্যজায়ত ।
মারীচম্ নাম দুর্ধর্ষম্ যঃ শাপাৎ রাক্ষসোঽভবৎ ॥১-২৫-৯॥

সুন্দে তু নিহতে রাম সা অগস্ত্যম্ ঋষি সত্তমম্ ।
তাটকা সহ পুত্রেণ প্রধর্ষয়িতুম্ ইচ্ছতি ॥১-২৫-১০॥

ভক্ষার্থম্ জাত সংরম্ভা গর্জন্তী সা অভ্যধাবত ।
আপতন্তীম্ তু তাম্ দৃষ্ট্বা অগস্ত্যো ভগবান্ ঋষিঃ ॥১-২৫-১১॥

রাক্ষসত্বম্ ভজস্ব ইতি মারীচম্ ব্যাজহার সঃ ।
অগস্ত্যঃ পরম অমর্ষঃ তাটকাম্ অপি শপ্তবান্ ॥১-২৫-১২॥

পুরুষাদী মহায়ক্ষী বিরূপা বিকৃত আননা ।
ইদম্ রূপম্ বিহায়াশু দারুণম্ রূপম্ অস্তু তে ॥১-২৫-১৩॥

সৈষা শাপ কৃতাম্ অর্ষা তাটকা ক্রোধ মূর্ছিতা ।
দেশম্ উত্সাদয়তি এনম্ অগস্ত্যা চরিতম্ শুভম্ ॥১-২৫-১৪॥

এনাম্ রাঘব দুর্বৃত্তাম্ যক্ষীম্ পরম দারুণাম্ ।
গো ব্রাহ্মণ হিতার্থায় জহি দুষ্ট পরাক্রমাম্ ॥১-২৫-১৫॥

ন হি এনাম্ শাপ সংসৃষ্টাম্ কশ্চিৎ উত্সহতে পুমান্ ।
নিহন্তুম্ ত্রিষু লোকেষু ত্বাম্ ঋতে রঘু নন্দন ॥১-২৫-১৬॥

ন হি তে স্ত্রী বধ কৃতে ঘৃণা কার্যা নরোত্তম ।
চাতুর্ বর্ণ্য হিতার্থাম্ হি কর্তব্যম্ রাজ সূনুনা ॥১-২৫-১৭॥

নৃশংসম্ অনৃশংসম্ বা প্রজা রক্ষণ কারণাৎ ।
পাতকম্ বা সদোষম্ বা কর্তব্যম্ রক্ষতা সদা ॥১-২৫-১৮॥

রাজ্য ভার নিয়ুক্তানাম্ এষ ধর্মঃ সনাতনঃ ।
অধর্ম্যাম্ জহি কাকুত্স্থ ধর্মো হি অস্যাম্ ন বিদ্যতে ॥১-২৫-১৯॥

শ্রূয়তে হি পুরা শক্রো বিরোচন সুতাম্ নৃপ ।
পৃথিবীম্ হন্তুম্ ইচ্ছন্তীম্ মন্থরাম্ অভ্যসূদয়ৎ ॥১-২৫-২০॥

বিষ্ণুনা চ পুরা রাম ভৃগু পত্নী পতিব্রতা ।
অনিন্দ্রম্ লোকম্ ইচ্ছন্তী কাব্যমাতা নিষূদিতা ॥১-২৫-২১॥

এতৈঃ চ অন্যৈঃ চ বহুভী রাজপুত্রৈঃ মহাত্মভিঃ ।
অধর্ম সহিতা নার্যো হতাঃ পুরুষসত্তমৈঃ ।তস্মাদ্ এনাম্ ঘৃণাম্ ত্যক্ত্বা জহি মৎ শাসনান্ নৃপ ॥১-২৫-২২॥