সূক্ত 94

94.1

৫ কণ্বো ঘৌরঃ । পবমানঃ সোমঃ । ত্রিষ্টুপ্ ।

অধি যদস্মিন্বাজিনীব শুভঃ স্পর্ধন্তে ধিয়ঃ সূর্যে ন বিশঃ ।
অপো বৃণানঃ পবতে কবীয়ন্ব্রজং ন পশুবর্ধনায় মন্ম ॥১॥

94.2

দ্বিতা ব্যূর্ণ্বন্নমৃতস্য ধাম স্বর্বিদে ভুবনানি প্রথন্ত ।
ধিয়ঃ পিন্বানাঃ স্বসরে ন গাব ঋতায়ন্তীরভি বাবশ্র ইন্দুম্ ॥২॥

94.3

পরি যত্কবিঃ কাব্যা ভরতে শূরো ন রথো ভুবনানি বিশ্বা ।
দেবেষু যশো মর্তায় ভূষন্দক্ষায় রায়ঃ পুরুভূষু নব্যঃ ॥৩॥

94.4

শ্রিয়ে জাতঃ শ্রিয় আ নিরিয়ায় শ্রিয়ং বয়ো জরিতৃভ্যো দধাতি ।
শ্রিয়ং বসানা অমৃতত্বমায়ন্ভবন্তি সত্যা সমিথা মিতদ্রৌ ॥৪॥

94.5

ইষমূর্জমভ্য১র্ষাশ্বং গামুরু জ্যোতিঃ কৃণুহি মত্সি দেবান্ ।
বিশ্বানি হি সুষহা তানি তুভ্যং পবমান বাধসে সোম শত্রূন্ ॥৫॥