সূক্ত 8

8.1

৯ কাশ্যপোঽসিতো দেবলো বা । পবমানঃ সোমঃ । গায়ত্রী ।

এতে সোমা অভি প্রিয়মিন্দ্রস্য কামমক্ষরন্ । বর্ধন্তো অস্য বীর্যম্ ॥১॥

পুনানাসশ্চমূষদো গচ্ছন্তো বায়ুমশ্বিনা । তে নো ধান্তু সুবীর্যম্ ॥২॥

ইন্দ্রস্য সোম রাধসে পুনানো হার্দি চোদয় । ঋতস্য যোনিমাসদম্ ॥৩॥

মৃজন্তি ত্বা দশ ক্ষিপো হিন্বন্তি সপ্ত ধীতয়ঃ । অনু বিপ্রা অমাদিষুঃ ॥৪॥

দেবেভ্যস্ত্বা মদায় কং সৃজানমতি মেষ্যঃ । সং গোভির্বাসয়ামসি ॥৫॥

পুনানঃ কলশেষ্বা বস্ত্রাণ্যরুষো হরিঃ । পরি গব্যান্যব্যত ॥৬॥

মঘোন আ পবস্ব নো জহি বিশ্বা অপ দ্বিষঃ । ইন্দো সখায়মা বিশ ॥৭॥

বৃষ্টিং দিবঃ পরি স্রব দ্যুম্নং পৃথিব্যা অধি । সহো নঃ সোম পৃত্সু ধাঃ ॥৮॥

নৃচক্ষসং ত্বা বয়মিন্দ্রপীতং স্বর্বিদম্ । ভক্ষীমহি প্রজামিষম্ ॥৯॥