Sukta 8

8.1

9 kashyaposito devalo va, pavamanah somah, gayatri

ए॒ते सोमा॑ अ॒भि प्रि॒यमिन्द्र॑स्य॒ काम॑मक्षरन् । वर्ध॑न्तो अस्य वी॒र्य॑म् ॥१॥

Ete soma abhi priyamindrasya kamamaksharan, vardhanto asya viryam

पु॒ना॒नास॑श्चमू॒षदो॒ गच्छ॑न्तो वा॒युम॒श्विना॑ । ते नो॑ धान्तु सु॒वीर्य॑म् ॥२॥

Punanasashchamushado gachchhanto vayumashvina, te no dhantu suviryam

इन्द्र॑स्य सोम॒ राध॑से पुना॒नो हार्दि॑ चोदय । ऋ॒तस्य॒ योनि॑मा॒सद॑म् ॥३॥

Indrasya soma radhase punano hardi chodaya, ritasya yonimasadam

मृ॒जन्ति॑ त्वा॒ दश॒ क्षिपो॑ हि॒न्वन्ति॑ स॒प्त धी॒तय॑ः । अनु॒ विप्रा॑ अमादिषुः ॥४॥

Mrijanti tva dasha kshipo hinvanti sapta dhitayah, anu vipra amadishuh

दे॒वेभ्य॑स्त्वा॒ मदा॑य॒ कं सृ॑जा॒नमति॑ मे॒ष्य॑ः । सं गोभि॑र्वासयामसि ॥५॥

Devebhyastva madaya kam srijanamati meshyah, sam gobhirvasayamasi

पु॒ना॒नः क॒लशे॒ष्वा वस्त्रा॑ण्यरु॒षो हरि॑ः । परि॒ गव्या॑न्यव्यत ॥६॥

Punanah kalasheshva vastranyarusho harih, pari gavyanyavyata

म॒घोन॒ आ प॑वस्व नो ज॒हि विश्वा॒ अप॒ द्विष॑ः । इन्दो॒ सखा॑य॒मा वि॑श ॥७॥

Maghona a pavasva no jahi vishva apa dvishah, indo sakhayama visha

वृ॒ष्टिं दि॒वः परि॑ स्रव द्यु॒म्नं पृ॑थि॒व्या अधि॑ । सहो॑ नः सोम पृ॒त्सु धा॑ः ॥८॥

Vrishtim divah pari srava dyumnam prithivya adhi, saho nah soma pritsu dhah

नृ॒चक्ष॑सं त्वा व॒यमिन्द्र॑पीतं स्व॒र्विद॑म् । भ॒क्षी॒महि॑ प्र॒जामिष॑म् ॥९॥

Nrichakshasam tva vayamindrapitam svarvidam, bhakshimahi prajamisham