সূক্ত 75

75.1

৫ কবির্ভার্গবঃ । পবমানঃ সোমঃ ।জগতী ।

অভি প্রিয়াণি পবতে চনোহিতো নামানি যহ্বো অধি যেষু বর্ধতে ।
আ সূর্যস্য বৃহতো বৃহন্নধি রথং বিষ্বঞ্চমরুহদ্বিচক্ষণঃ ॥১॥

75.2

ঋতস্য জিহ্বা পবতে মধু প্রিয়ং বক্তা পতির্ধিয়ো অস্যা অদাভ্যঃ ।
দধাতি পুত্রঃ পিত্রোরপীচ্যং১ নাম তৃতীয়মধি রোচনে দিবঃ ॥২॥

75.3

অব দ্যুতানঃ কলশাঁ অচিক্রদন্নৃভির্যেমানঃ কোশ আ হিরণ্যয়ে ।
অভীমৃতস্য দোহনা অনূষতাঽধি ত্রিপৃষ্ঠ উষসো বি রাজতি ॥৩॥

75.4

অদ্রিভিঃ সুতো মতিভিশ্চনোহিতঃ প্ররোচয়ন্রোদসী মাতরা শুচিঃ ।
রোমাণ্যব্যা সময়া বি ধাবতি মধোর্ধারা পিন্বমানা দিবেদিবে ॥৪॥

75.5

পরি সোম প্র ধন্বা স্বস্তয়ে নৃভিঃ পুনানো অভি বাসয়াশিরম্ ।
যে তে মদা আহনসো বিহায়সস্তেভিরিন্দ্রং চোদয় দাতবে মঘম্ ॥৫॥