সূক্ত 2

2.1

১০ মেধাতিথিঃ কাণ্বঃ । পবমানঃ সোমঃ । গায়ত্রী ।

পবস্ব দেববীরতি পবিত্রং সোম রংহ্যা । ইন্দ্রমিন্দো বৃষা বিশ ॥১॥

2.2

আ বচ্যস্ব মহি প্সরো বৃষেন্দো দ্যুম্নবত্তমঃ । আ যোনিং ধর্ণসিঃ সদঃ ॥২॥

2.3

অধুক্ষত প্রিয়ং মধু ধারা সুতস্য বেধসঃ । অপো বসিষ্ট সুক্রতুঃ ॥৩॥

2.4

মহান্তং ত্বা মহীরন্বাপো অর্ষন্তি সিন্ধবঃ । যদ্গোভির্বাসয়িষ্যসে ॥৪॥

2.5

সমুদ্রো অপ্সু মামৃজে বিষ্টম্ভো ধরুণো দিবঃ । সোমঃ পবিত্রে অস্ময়ুঃ ॥৫॥

2.6

অচিক্রদদ্বৃষা হরির্মহান্মিত্রো ন দর্শতঃ । সং সূর্যেণ রোচতে ॥৬॥

2.7

গিরস্ত ইন্দ ওজসা মর্মৃজ্যন্তে অপস্যুবঃ । যাভির্মদায় শুম্ভসে ॥৭॥

2.8

তং ত্বা মদায় ঘৃষ্বয় উ লোককৃত্নুমীমহে । তব প্রশস্তয়ো মহীঃ ॥৮॥

2.9

অস্মভ্যমিন্দবিন্দ্রয়ুর্মধ্বঃ পবস্ব ধারয়া । পর্জন্যো বৃষ্টিমাঁ ইব ॥৯॥

2.10

গোষা ইন্দো নৃষা অস্যশ্বসা বাজসা উত । আত্মা যজ্ঞস্য পূর্ব্যঃ ॥১০॥