সূক্ত 99

99.1

৮ নৃমেধ আঙ্গিরসঃ । ইন্দ্রঃ । প্রগাথঃ = ( বিষমা বৃহতী, সমা সতোবৃহতী ) ।

ত্বামিদা হ্যো নরোঽপীপ্যন্বজ্রিন্ভূর্ণয়ঃ । স ইন্দ্র স্তোমবাহসামিহ শ্রুধ্যুপ স্বসরমা গহি ॥১॥

99.2

মত্স্বা সুশিপ্র হরিবস্তদীমহে ত্বে আ ভূষন্তি বেধসঃ । তব শ্রবাংস্যুপমান্যুক্থ্যা সুতেষ্বিন্দ্র গির্বণঃ ॥২॥

99.3

শ্রায়ন্ত ইব সূর্যং বিশ্বেদিন্দ্রস্য ভক্ষত । বসূনি জাতে জনমান ওজসা প্রতি ভাগং ন দীধিম ॥৩॥

99.4

অনর্শরাতিং বসুদামুপ স্তুহি ভদ্রা ইন্দ্রস্য রাতয়ঃ ।
সো অস্য কামং বিধতো ন রোষতি মনো দানায় চোদয়ন্ ॥৪॥

99.5

ত্বমিন্দ্র প্রতূর্তিষ্বভি বিশ্বা অসি স্পৃধঃ । অশস্তিহা জনিতা বিশ্বতূরসি ত্বং তূর্য তরুষ্যতঃ ॥৫॥

99.6

অনু তে শুষ্মং তুরয়ন্তমীয়তুঃ ক্ষোণী শিশুং ন মাতরা ।
বিশ্বাস্তে স্পৃধঃ শ্নথয়ন্ত মন্যবে বৃত্রং যদিন্দ্র তূর্বসি ॥৬॥

99.7

ইত ঊতী বো অজরং প্রহেতারমপ্রহিতম্ । আশুং জেতারং হেতারং রথীতমমতূর্তং তুগ্র্যাবৃধম্ ॥৭॥

99.8

ইষ্কর্তারমনিষ্কৃতং সহস্কৃতং শতমূতিং শতক্রতুম্ । সমানমিন্দ্রমবসে হবামহে বসবানং বসূজুবম্ ॥৮॥